Yakobus 3:17 - Perjanjian Baru Bahasa Melayu Maluku Utara

¹⁷ Tapi orang yang dapa pande dari Tuhan, torang tau persis bagini: pertama, dia pe hati bersi, turus dia suka dame, suka baku bawa bae deng orang, dengar-dengaran, ada rasa kasiang, deng jaga biking hal-hal bae. Dia me tara barát sabla deng tara munafik.

Yakobus 3:17 Referans Kwoze

Yakobus 3:15

Kalu ngoni pe pande cuma itu, itu bukang pande yang dari Tuhan, tapi dari dunia ini, dari manusia pe keinginan yang tara bae deng dari setang-setang pe mau.

Roma 12:9

Ngoni musti sayang orang butul-butul, jang foya-foya! Ngoni musti binci samua barang yang jahat, kong ngoni biking suda samua yang bae.

Yakobus 1:17

Barang, samua yang bae deng sempurna yang torang dapa, itu datang dari Tuhan Allah yang di sorga. Dia itu torang pe Bapa yang biking matahari, bulan, deng bintang untuk kase tarang langit. Matahari, bulan, deng bintang itu basinar iko dia pe waktu untuk kase tarang dunia ini. Tapi Tuhan Allah tara bagitu, Dia tara beruba, Dia salalu bae.

Yakobus 1:5

Kalu ada dari ngoni yang tara tau mana yang bae yang dia musti biking, dia musti berdoa tanya pa Tuhan Allah supaya Tuhan Allah kase tau. Barang, Tuhan pe hati bae, sapa saja yang minta pa Dia, Dia tara mara tapi pasti Dia kase.

1 Yohanes 3:18

Jadi, ngoni yang kita sayang sama deng kita pe ana-ana, kalu torang sayang orang, jang cuma di mulu saja atau cuma bilang torang sayang pa dorang tapi torang tara biking apa-apa. Mari suda torang sayang pa orang butul-butul iko deng apa yang torang biking tiap hari pa orang laeng.

1 Petrus 1:22

Jadi karna ngoni so iko ajaran yang butul tentang Yesus Kristus, ngoni pe hati so jadi bersi. Deng bagitu, ngoni bisa baku sayang deng hati yang tulus di antara ngoni sudara-sudara yang sama-sama percaya. Karna itu, ngoni musti sunggu-sunggu baku sayang satu deng yang laeng deng hati yang tulus,

Matius 5:8

Paling sanang suda orang-orang yang pe hati bersi pa Tuhan Allah pe muka, karna dorang akan lia pa Tuhan Allah.

1 Yohanes 3:3

Samua orang yang baharap pa Tuhan sama deng itu, orang itu musti salalu hidup deng hati bersi sama deng Yesus Kristus yang suci itu.

Lukas 21:15

Barang, Kita sandiri yang mo biking ngoni pande bajawab, sampe ngoni pe musu-musu tara mampo mo balas ngoni pe bicara atau mo baku malawang deng ngoni.

Lukas 6:36

Ngoni musti kase tunju rasa kasiang pa orang-orang, sama deng torang pe Bapa di sorga yang kase tunju Dia pe rasa kasiang pa samua orang.”

Ibrani 12:14

Ngoni berusaha suda hidup baku bawa bae-bae deng samua orang, deng ngoni berusaha lagi hidup deng hati yang bersi pa Tuhan Allah pe muka. Kalu orang tara hidup deng hati bersi pa Tuhan Allah pe muka, orang itu nanti tara mo lia pa Tuhan Allah.

2 Timotius 2:24

Torang yang karja untuk Tuhan tara pantas baku malawang. Mala torang musti bae-bae pa samua orang, ajar bae-bae pa orang-orang, deng sabar pa samua orang.

1 Petrus 2:1

Karna ngoni so dapa hidup yang baru itu, berenti suda biking samua yang jahat. Jang bicara foya, jang pura-pura bae, jang mangiri, deng jang biking busu orang laeng pe nama.

Yakobus 2:4

Deng ngoni biking bagitu, itu ngoni so pili-pili orang, kong ngoni so jadi hakim deng maksut yang tara bae.

Ibrani 12:11

Memang tiap kali torang dapa togor, tong pe hati tara sanang, tapi tong sedi. Tapi kalu torang so abis dapa togor bagitu, dia pe hasil itu, torang bole jadi orang yang jaga biking barang yang butul pa Tuhan Allah pe muka, deng itu yang biking tong pe hati jadi tenang.

Kolose 1:10

Barang, kalu ngoni so tau Tuhan Allah pe mau, ngoni akan hidup deng kalakuang yang pantas dapa sebut orang yang percaya pa Tuhan, kong ngoni akan biking Dia pe hati sanang. Ngoni me akan biking hal-hal yang bae turus-turus, deng ngoni me akan lebe tamba kanal pa Tuhan Allah.

Roma 15:14

Sudara-sudara, kita tau butul ngoni so banya biking barang yang bae, ngoni so banya mangarti Tuhan pe ajaran, deng ngoni me so mampo untuk baku kase ajar satu deng yang laeng Tuhan pe ajaran itu.

1 Korintus 12:8

Pa yang satu, Roh Kudus kase karunia untuk pande bicara banya hal. Kong pa yang laeng, Roh Kudus yang sama itu kase karunia untuk mangarti banya hal, kong mampo kase tau tentang hal-hal itu.

Yakobus 4:8

Berusaha suda hidup dekat deng Tuhan Allah, supaya Dia badekat deng ngoni. Ee, ngoni orang-orang yang berdosa, kase bersi suda ngoni pe tangan yang jaga biking dosa! Deng ngoni yang masi tara tau mo iko yang mana: Tuhan Allah pe mau ka, dunia pe mau ka, ngoni musti kase bersi ngoni pe hati.

1 Timotius 5:21

Timotius, ngana musti biking tugas yang kita kase pa ngana ini, tara bole pili-pili orang. Kita bilang ini, Tuhan Allah, Kristus Yesus deng malaekat-malaekat yang Tuhan Allah pili me dengar.

Kisah Para Rasul 11:24

Barnabas itu orang yang bae, Roh Kudus kuasai pa dia deng dia percaya skali pa Tuhan. Banya orang yang dengar pa dia jadi lebe percaya pa Tuhan Yesus.

Matius 23:28

Itu sama deng ngoni, dari luar dapa lia ngoni sama deng orang yang jaga biking yang butul pa Tuhan Allah pe muka, padahal dari dalam ngoni pe hati, ngoni paling munafik deng jahat.

1 Tesalonika 2:7

Torang salalu bae-bae pa ngoni, sama deng mama yang urus deng jaga dia pe ana-ana bae-bae.

Filipi 4:8

Jadi sudara-sudara, ini kita pe nasehat terahir yang kita mo bilang pa ngoni. Ngoni musti pikir turus-turus samua yang ada guna macam bagini: samua yang butul, samua yang pantas orang hormati, samua yang adil, samua yang tara biking ngoni berdosa, samua yang bae, samua yang bagus yang orang suka mo kase carita, deng samua yang pantas untuk orang puji. Ngoni musti pikir turus samua itu.

Filipi 1:11

Kita minta lagi supaya Yesus Kristus bakarja di ngoni pe hati la ngoni bole biking barang yang butul pa Tuhan Allah pe muka. Turus orang-orang mo puji deng hormat pa Tuhan Allah karna dorang lia yang ngoni so biking itu.

Kisah Para Rasul 9:36

Di kota Yope, ada orang percaya satu yang pe nama Tabita. Dalam bahasa Yunani dia pe nama Dorkas. Tabita itu orang yang percaya pa Yesus. Dia jaga biking hal-hal bae deng jaga tolong pa orang-orang yang susa.

Yohanes 1:47

Turus dorang dua pigi pa Yesus. Pe lia Natanael datang pa Dia, Yesus bilang, “Coba ngoni lia, dia yang kamari ini butul-butul orang Israel, dia tara putar bale.”

Yohanes 1:14

Tuhan Allah pe Firman itu so jadi manusia, kong Dia tinggal di antara torang. Torang so lia Dia pe kuasa yang hebat, kuasa yang Dia dapa dari Tuhan Allah, Dia pe Bapa, karna Dia itu Tuhan Allah pe Anak. Kong Tuhan Allah pe Anak itu cuma satu itu saja. Dia yang biking torang bole tau yang butul tentang Tuhan Allah deng tentang Tuhan Allah pe sayang pa torang.

Titus 3:2

Dorang tara bole kase tara bae orang pe nama deng tara bole baku malawang. Tapi dorang musti tara kasar deng salalu baku bawa bae-bae pa samua orang.

Titus 1:15

Untuk orang yang dong pe hati bersi pa Tuhan, tarada aturan agama yang larang pa dorang. Tapi untuk orang-orang yang dong pe hati tara bae deng tara percaya pa Tuhan, dorang tara bisa biking barang yang bae karna dorang pe hati deng pikiran so tara tau mana yang butul.

Roma 12:18

Kong ngoni berusaha hidup dame turus deng samua orang, apalagi hidup dame itu musti ngoni yang kamuka biking!

Efesus 5:9

Karna orang yang hidup dalam tarang, dorang itu biking barang yang bae, yang butul, deng yang adil.

2 Korintus 10:1

Kita Paulus, minta pa ngoni supaya ngoni dengar bae-bae yang kita mo bilang ini. Ada dari ngoni yang bilang, kita tara barani togor karas pa ngoni waktu kita ada sama-sama deng ngoni. Kata, kita cuma barani togor karas waktu torang baku jao pake surat. Tapi skarang, sama deng Yesus Kristus pe sifat yang tara sombong deng tara kasar,

2 Korintus 9:10

Tuhan Allah yang kase sadia bibit untuk orang yang baambur bibit di kobong. Deng Dia yang kase makanang pa torang manusia la torang bisa makang. Jadi bagitu lagi, Tuhan Allah mo tamba apa yang ada pa ngoni la ngoni bisa biking banya skali barang yang bae pa orang laeng. Itu sama deng orang bapanen, kong dia pe hasil banya.

Matius 5:9

Paling sanang suda orang-orang yang kase baku dame pa orang laeng, karna Tuhan Allah akan bilang dong itu Dia pe ana-ana.

2 Korintus 6:6

Samua yang torang biking, tong biking deng hati bersi, torang lagi tau banya hal karna Tuhan Allah bantu pa torang, torang sabar, torang bae-bae deng orang, torang sayang orang butul-butul, deng Roh Kudus bakarja di torang pe hati.

2 Korintus 7:11

Coba ngoni inga sedi yang ngoni rasa waktu baca kita pe surat yang kamuka itu. Sedi itu yang Tuhan Allah mau, karna sedi itu biking ngoni berusaha untuk biking barang yang butul, bagini: ngoni dapa smangat untuk biking Tuhan pe mau, ngoni kase bersi ngoni pe nama dari apa yang orang tudu pa ngoni, ngoni mara pa orang-orang yang biking dosa, ngoni jadi tako kalu tara butul-butul iko pa Tuhan, ngoni ingin baku dapa deng torang, deng ngoni lagi tara tako untuk hukum pa orang-orang yang biking sala. Samua yang ngoni biking itu kase tunju ngoni tara sala.

Yakobus 2:13

Barang, waktu Tuhan Allah mo adili pa manusia nanti, Dia tara rasa kasiang pa orang-orang yang tara ada rasa kasiang pa orang laeng. Tapi orang-orang yang pe hidup ada rasa kasiang pa orang laeng, Tuhan Allah tara hukum pa dorang.

1 Petrus 2:18

Ee, ngoni orang-orang karja, ngoni musti dengar-dengaran pa ngoni pe tuang deng hormati butul-butul pa dorang, bukang cuma kalu dia bae deng tara kasar pa ngoni, tapi biar lagi dia jahat me, ngoni musti dengar-dengaran pa dia.