Yakobus 1:25 - Perjanjian Baru Bahasa Melayu Maluku Utara

²⁵ Tapi kalu orang cari tau deng perhatikan bae-bae kong biking firman itu, bukang cuma dengar kong lupa, pasti Tuhan Allah akan biking dia jadi orang yang paling sanang. Tuhan Allah pe firman itu, aturan yang sempurna, deng yang bole kase lapas orang dari dosa-dosa.

Yakobus 1:25 Referans Kwoze

Lukas 11:28

Tapi Yesus bilang pa dia, “Lebe sanang lagi orang yang suka badengar Tuhan Allah pe firman kong iko itu!”

Yohanes 13:17

Skarang ini, ngoni so tau yang Kita so kase ajar pa ngoni, jadi ngoni lagi musti iko Kita pe conto untuk layani orang supaya ngoni butul-butul sanang.

1 Petrus 2:16

Ngoni ini Tuhan Allah so kase bebas pa ngoni dari kuasa dosa, tapi jang ngoni pake hak itu jadi alasan untuk biking barang yang jahat lagi. Tapi lebe bae ngoni hidup untuk biking apa yang Tuhan Allah suru.

Yakobus 2:12

Jadi kalu torang bicara atau biking satu barang, torang musti ati-ati, karna torang tau nanti Tuhan Allah mo adili pa orang-orang pake aturan yang kase lapas pa manusia dari dosa-dosa.

Galatia 5:1

Sudara-sudara, torang skarang so bebas, karna Yesus Kristus so kase bebas pa torang dari aturan-aturan di lima kitab Musa la torang dapa slamat. Karna itu, torang musti tetap kuat percaya, jang kase biar torang pe diri taika deng aturan-aturan itu lagi, barang itu sama deng torang jadi aturan itu pe suru-suru.

1 Korintus 15:58

Jadi sudara-sudara yang kita sayang, ngoni pe percaya musti tetap kuat. Jang kase biar ada yang pengaru pa ngoni sampe ngoni ragu deng ngoni pe percaya itu. Ngoni karja turus untuk Tuhan butul-butul, karna ngoni tau, apa yang ngoni biking untuk Tuhan itu tara akan parcuma.

1 Timotius 4:16

Ngana musti jaga bae-bae ngana pe cara hidup, deng jaga supaya ngana cuma ajar ajaran yang butul. Ngana musti biking samua itu turus. Kalu ngana biking samua itu, Tuhan Allah mo kase slamat pa ngana deng orang-orang yang dengar pa ngana.

2 Korintus 13:5

Coba ngoni uji ngoni pe diri sandiri, ngoni butul-butul percaya ka tarada. Priksa ngoni pe hati, apa ngoni tau pasti, Kristus Yesus ada di ngoni pe hati? Kalu tarada, berarti ngoni tara tahang uji.

Roma 11:22

Dari samua yang kita so bilang tadi, torang bole tau, Tuhan Allah itu bae, deng Dia lagi tegas kalu kase hukuman. Dia mo hukum pa orang Yahudi yang tara percaya pa Dia, tapi Dia kase Dia pe bae pa ngoni orang bukang Yahudi, asal ngoni tetap percaya pa Dia. Kalu tarada, Tuhan Allah mo buang lagi pa ngoni sama deng cabang yang so potong dari dia pe pohong yang ada tanam di kobong.

Roma 8:15

Torang tau, tong itu Tuhan Allah pe ana-ana, karna Tuhan Allah pe Roh yang Dia so kase pa torang itu, tara biking torang tako sama deng orang karja yang tako dia pe tuang. Tapi Tuhan Allah pe Roh itu so biking torang jadi Tuhan Allah pe ana-ana, sampe torang me bole pangge pa Dia itu, “Papa e, ya Bapa!”

Galatia 2:4

Memang ada babarapa orang laeng yang tantang supaya Titus dapa sunat. Dorang itu maso babadiam di jemaat, biking diri percaya pa Yesus Kristus sama deng torang, padahal dorang itu cuma mo cari tau pa torang. Dorang lia torang so bebas dari aturan-aturan di lima kitab Musa karna torang so percaya pa Kristus Yesus, kong dorang mo biking torang taika ulang deng aturan-aturan itu, sama deng orang karja yang taika pa dia pe tuang.

Yohanes 8:36

Jadi kalu Anak Allah kase bebas pa ngoni dari dosa, ngoni butul-butul so bebas.

Wahyu 14:13

Kong kita dengar suara dari sorga bilang bagini, “Yohanes, tulis ini: mulai skarang, orang-orang yang mati karna percaya pa Tuhan, dorang itu paling sanang suda!” Kong Tuhan Allah pe Roh bilang bagini, “Butul, butul dorang itu paling sanang suda! Dorang akan istrahat dari dong pe karja karas, jadi Tuhan akan balas dong pe lala itu deng apa yang bae di sorga.”

1 Timotius 2:15

Biar bagitu me, Tuhan Allah akan kase slamat pa parampuang-parampuang waktu dorang melahirkan, asal parampuang itu tetap percaya pa Yesus Kristus, sayang pa orang laeng, hidup deng hati bersi pa Tuhan Allah pe muka, deng dia pe cara hidup musti sederhana.

Roma 7:12

Jadi, aturan-aturan di lima kitab Musa itu suci, kong samua parenta yang ada di aturan-aturan itu me butul deng bagus. Samua aturan itu dari Tuhan Allah.

Kisah Para Rasul 26:22

Tapi Tuhan Allah salalu tolong pa kita, jadi kita masi bisa hidup sampe hari ini. Skarang kita badiri di sini, kita basaksi tentang Yesus pa ngoni samua, biar pejabat atau orang biasa. Samua yang kita bilang tentang Yesus so jadi sama deng yang Tuhan Allah bilang dulu pa nabi Musa deng nabi-nabi laeng.

Kisah Para Rasul 13:43

Abis itu, orang-orang kaluar dari ruma ibada kong ada banya orang yang iko pa Paulus deng Barnabas. Dorang itu orang-orang Yahudi deng orang-orang bukang Yahudi yang so maso agama Yahudi. Paulus deng Barnabas kase nasehat pa dorang supaya dong tetap percaya pa Tuhan Allah yang so kase Dia pe bae pa dorang sampe dong bole slamat dari dosa.

Ibrani 12:15

Ngoni musti ati-ati. Jang sampe ada dari ngoni yang kase tinggal dia pe percaya pa Tuhan Allah sampe dia tara rasa lagi Tuhan Allah pe bae. Barang, orang yang kase tinggal dia pe percaya pa Tuhan Allah, dia itu pe hati saki, jadi jaga pengaru pa banya orang. Orang itu bole kase sama deng tanaman yang ada dia pe racong kong kase rusak tanaman laeng.

Kisah Para Rasul 2:42

Orang-orang percaya itu jaga bakumpul sama-sama untuk baku kase kuat dorang pe percaya pa Yesus. Dorang rajin dengar ajaran tentang Yesus dari rasul-rasul. Dorang pela-pela roti kong makang sama-sama, supaya inga Tuhan Yesus pe sengsara deng kematian. Dorang me berdoa sama-sama.

Wahyu 22:14

Orang-orang yang pe hati so bersi, dorang sama deng orang yang cuci dong pe pakeang sampe bersi. Dorang itu paling sanang suda, karna nanti dong bole maso di dalam kota itu iko pintu-pintu gerbang, deng dorang lagi ada hak untuk makang bua yang biking dorang hidup deng Tuhan Allah sampe slama-lamanya.

1 Yohanes 2:24

Jadi apa yang ngoni so dengar dari dulu waktu ngoni baru jadi percaya, ngoni simpang di ngoni pe hati bae-bae. Deng bagitu, ngoni tetap hidup satu hati deng Anak deng Bapa.

Kolose 1:23

Yang penting, ngoni tetap percaya pa Yesus Kristus deng jang ragu. Percaya turus Kabar Bae tentang Yesus Kristus yang ngoni so dengar itu. Kabar Bae itu suda yang biking torang yakin, torang mo dapa apa yang Tuhan Allah so janji pa Dia pe umat. Kabar Bae itu so tasiar di seluru dunia, kong kita ini, Paulus yang Tuhan Allah so pili untuk kase tau Kabar Bae itu.

Roma 2:13

Karna bukang orang-orang yang dengar aturan di lima kitab Musa yang Tuhan Allah bilang dorang itu orang butul, tapi orang-orang yang biking aturan itu.

Roma 8:2

Barang, Roh Kudus itu suda yang biking torang bole hidup satu hati deng Yesus Kristus. Roh Kudus itu tolong pa torang supaya torang tara iko dosa pe mau lagi yang biking torang mati tapisa deng Tuhan Allah slama-lamanya.

Galatia 6:2

Ngoni baku-baku bantu suda satu deng yang laeng, karna itu sama deng ngoni ada bantu pikul orang laeng pe beban. Kalu ngoni biking bagitu, ngoni so biking parenta yang Yesus Kristus ada suru untuk ngoni mo biking.