Yakobus 1:17 - Perjanjian Baru Bahasa Melayu Maluku Utara

¹⁷ Barang, samua yang bae deng sempurna yang torang dapa, itu datang dari Tuhan Allah yang di sorga. Dia itu torang pe Bapa yang biking matahari, bulan, deng bintang untuk kase tarang langit. Matahari, bulan, deng bintang itu basinar iko dia pe waktu untuk kase tarang dunia ini. Tapi Tuhan Allah tara bagitu, Dia tara beruba, Dia salalu bae.

Yakobus 1:17 Referans Kwoze

Yohanes 3:27

Yohanes jawab pa dorang, “Biar suda, tara apa-apa. Manusia cuma mampo biking apa yang Tuhan Allah kase pa dorang.

Matius 7:11

Jadi biar ngoni pe hati tara bae, tapi ngoni tau bagimana kase barang yang bae pa ngoni pe ana-ana. Apalagi ngoni pe Bapa yang di sorga! Dia pe hati paling bae, Dia pasti mo kase yang bae pa orang-orang yang minta pa Dia.

Ibrani 13:8

Yesus Kristus tetap sama, dari dulu, skarang deng sampe slama-lamanya.

Yohanes 8:12

Yesus kase turus Dia pe bicara pa orang banya yang masi ada di situ bagini, “Kita ini tarang dunia yang kase tarang manusia pe hati. Sapa saja yang iko pa Kita, dia itu tara akan hidup dalam galap, tapi dia akan hidup di dalam tarang, yang biking dia dapa hidup deng Tuhan Allah slama-lamanya.”

1 Yohanes 1:5

Ini berita yang torang so dengar dari Yesus, kong torang kase tau pa ngoni bagini: Tuhan Allah itu tarang, jadi pa Dia sama skali tarada galap.

Yakobus 3:17

Tapi orang yang dapa pande dari Tuhan, torang tau persis bagini: pertama, dia pe hati bersi, turus dia suka dame, suka baku bawa bae deng orang, dengar-dengaran, ada rasa kasiang, deng jaga biking hal-hal bae. Dia me tara barát sabla deng tara munafik.

Efesus 2:8

Tuhan Allah kase slamat pa torang yang so percaya pa Yesus Kristus karna Dia pe bae pa torang. Dia kase slamat pa torang dari dosa-dosa bukang karna torang pe usaha biking barang yang bae, tapi Dia kase slamat itu deng cuma-cuma pa torang.

Lukas 11:13

Jadi biar ngoni pe hati tara bae, tapi ngoni tau bagimana kase barang yang bae pa ngoni pe ana-ana. Apalagi ngoni pe Bapa yang di sorga! Dia pasti mo kase Roh Kudus pa orang-orang yang minta pa Dia.”

1 Korintus 4:7

Barang, kalu ngoni nilai pemimpin bagitu, itu sama deng ngoni anggap ngoni pe diri lebe penting dari orang laeng. Samua yang ngoni punya, itu dari Tuhan. Jadi bikiapa kong ngoni basombong, sama deng ngoni anggap apa yang ngoni tarima itu dari ngoni pe kemampuan sandiri, bukang dari Tuhan?

1 Yohanes 4:10

Sayang yang butul itu, bukang torang yang sayang pa Tuhan Allah, tapi Tuhan Allah yang sayang pa torang, sampe Dia utus Dia pe Ana untuk jadi korban supaya torang dapa ampun dari torang pe dosa-dosa.

Efesus 1:18

Kong kita minta lagi supaya Dia buka ngoni pe hati, la ngoni bisa mangarti butul samua hal yang ngoni bole harap pa Dia karna ngoni yang Dia so pili jadi Dia pe umat. Deng kita minta lagi supaya ngoni mangarti pe hebat skali samua janji yang Dia mo kase pa ngoni itu.

Yohanes 1:9

Tarang yang butul itu Yesus suda, kong Dia sementara datang di dunia. Dia mo kase tarang samua orang pe hati la dorang bole tau tentang Tuhan Allah.

Wahyu 21:23

Kota itu tara perlu sinar matahari deng bulan untuk kase tarang, karna Tuhan Allah pe cahaya yang luar biasa yang kase tarang kota itu, deng Anak Domba itu yang so jadi sama deng lampu yang manyala.

2 Korintus 4:6

Barang, waktu Tuhan Allah biking dunia ini, Dia bicara supaya galap jadi tarang. Bagitu lagi, Dia biking torang pe hati yang galap jadi tarang, supaya tong bole mangarti Tuhan Allah pe kuasa yang luar biasa, kong itu torang bole lia dari Yesus Kristus pe hidup.

Wahyu 22:5

Di kota itu, tarada malam. Jadi Tuhan Allah pe umat, dong so tara perlu lagi cahaya lampu atau sinar matahari, karna Tuhan Allah pe diri sandiri yang jadi sinar untuk kase tarang pa dorang. Kong dorang mo berkuasa sebagai raja sampe slama-lamanya.

Yakobus 1:5

Kalu ada dari ngoni yang tara tau mana yang bae yang dia musti biking, dia musti berdoa tanya pa Tuhan Allah supaya Tuhan Allah kase tau. Barang, Tuhan pe hati bae, sapa saja yang minta pa Dia, Dia tara mara tapi pasti Dia kase.

Roma 6:23

Karna orang yang jaga biking dosa, dia pe akibat dia mo mati kong tapisa deng Tuhan Allah slama-lamanya. Tapi Tuhan Allah kase deng cuma-cuma hidup deng Dia slama-lamanya karna torang so satu hati deng Kristus Yesus, torang pe Tuhan.

Yakobus 3:15

Kalu ngoni pe pande cuma itu, itu bukang pande yang dari Tuhan, tapi dari dunia ini, dari manusia pe keinginan yang tara bae deng dari setang-setang pe mau.

Filipi 1:29

Jang ngoni tako, karna Tuhan Allah kase Dia pe bae pa ngoni bukang supaya ngoni percaya pa Yesus Kristus saja, tapi Dia me ator supaya ngoni dapa siksa dari orang yang tara percaya, kong deng bagitu, Yesus Kristus dapa puji.

Kisah Para Rasul 11:18

Pe dengar bagitu, orang-orang Yahudi yang percaya pa Yesus so tara kase sala lagi pa Petrus. Dorang puji pa Tuhan Allah, bilang, “Jadi, orang-orang bukang Yahudi me Tuhan Allah so kase kesempatan untuk bertobat supaya dorang dapa hidup deng Tuhan Allah slama-lamanya.”

Kisah Para Rasul 5:31

Yesus itu suda yang Tuhan Allah so angka kong taru di tampa yang terhormat pa Tuhan Allah pe sabla kanan. Skarang Yesus so jadi Pemimpin deng yang kase slamat pa torang orang Israel, supaya torang bertobat kong iko pa Tuhan Allah, deng bagitu Tuhan Allah mo kase ampun pa torang.

Yohanes 3:3

Yesus bilang pa dia, “Inga bae-bae yang Kita mo bilang ini. Cuma orang yang lahir ulang, yang bisa jadi Tuhan Allah pe umat yang Dia Berkuasa sebagai Raja pa orang itu pe hidup.”

1 Timotius 6:16

Cuma Tuhan Allah saja yang tara perna mati. Dia hidup di dalam tarang. Tarang itu tarang skali, sampe orang me tara bole badekat pa Dia. Deng tarada orang yang perna lia pa Dia, deng memang butul tara orang bisa lia pa Dia. Samua hormat untuk Dia, deng samua kuasa ada pa Dia sampe slama-lamanya. Amin!