Wahyu 5:9 - Perjanjian Baru Bahasa Melayu Maluku Utara

⁹ Kong dorang manyanyi puji pa Anak Domba itu deng lagu baru bagini: “Anak Domba ini yang pantas tarima kitab tagulung itu, deng yang pantas buka tuju segel yang talém di kitab itu. Barang, Anak Domba ini so perna dapa bunu, kong Dia pe dara so tatumpa untuk hapus orang-orang pe dosa dari tiap fam, suku, bahasa deng bangsa supaya dorang jadi Dia pe umat.

Wahyu 5:9 Referans Kwoze

1 Yohanes 1:7

Tapi kalu torang hidup di tarang, sama deng Tuhan Allah ada di tarang, pasti torang so hidup satu hati satu deng yang laeng. Dia kase bersi pa torang dari torang pe dosa samua, karna Yesus, Dia pe Anak so mati di kayu salib.

Matius 26:28

Barang, ini Kita pe dara. Waktu Kita mati, Kita pe dara akan tatumpa untuk kase sah Tuhan Allah pe janji pa manusia. Kong Kita pe dara yang tatumpa itu untuk tebus banya orang pe dosa.

Wahyu 14:6

Abis itu, kita lia satu malaekat laeng lagi ada terbang di langit. Dia itu bawa pasáng dari Tuhan Allah yang tara beruba slama-lamanya. Dia mo kase tau pasáng itu pa orang-orang yang tinggal di bumi, pa orang-orang dari samua fam, samua suku, samua bahasa deng samua bangsa.

1 Korintus 6:20

Barang, waktu Tuhan Yesus mati untuk tebus ngoni pe dosa, itu pe arti, Dia so bili pa ngoni untuk jadi Dia pe umat. Jadi, ngoni musti pake ngoni pe badan untuk biking apa yang bae, supaya Tuhan Allah dapa puji deng hormat.

Wahyu 5:12

Dorang manyanyi kuat-kuat bagini, “Dia ini Anak Domba yang so perna dapa bunu. Dia yang pantas tarima kuasa, kekayaan, deng pikiran bae untuk ator samua. Dia me pantas tarima kekuatan, puji deng hormat, deng Dia lagi luar biasa.”

Wahyu 4:11

“Ya Tuhan Allah torang pe Tuhan. Cuma Tuhan saja yang pantas mo dapa puji deng hormat, deng Tuhan yang punya kuasa. Barang, Tuhan so cipta samua-samua yang ada, kong samua itu ada karna Tuhan suka itu ada, Tuhan yang biking samua itu.”

Kisah Para Rasul 20:28

Karna itu sudara-sudara, ngoni musti jaga bae-bae ngoni pe diri, deng jemaat yang Roh Kudus so kase pa ngoni untuk ngoni jaga. Ngoni jaga Tuhan Allah pe jemaat sama deng gembala yang jaga dia pe domba. Jemaat-jemaat itu so jadi Tuhan Allah punya, barang Dia pe Anak Yesus so mati di kayu salib untuk tebus pa torang.

Matius 20:28

Itu sama deng Anak Manusia yang dari sorga datang di dunia ini bukang untuk dapa layani, tapi untuk layani deng kase diri mati la tebus orang banya pe dosa.”

Wahyu 5:6

Abis itu, kita lia Anak Domba satu badiri di pinggir Tuhan Allah pe kursi raja. Kong ampa binatang luar biasa itu, deng samua dua pulu ampa pemimpin itu kuliling pa Dia. Anak Domba itu dapa lia sama deng so perna dapa bunu, tapi so hidup ulang. Dia pe tandu ada tuju deng mata tuju. Mata tuju itu pe arti, tuju Roh yang Tuhan Allah utus di seluru dunia ini.

Titus 2:14

Dia yang so serakan Dia pe diri untuk mati la kase bebas pa torang dari torang pe dosa. Dia biking torang pe hati jadi bersi, sampe torang jadi Dia pe umat sandiri yang suka biking barang yang bae.

2 Petrus 2:1

Dulu, ada orang-orang yang muncul di orang Israel pe tenga-tenga, yang bilang kata, dorang itu Tuhan Allah pe nabi yang kase turus Tuhan Allah pe pasáng, padahal dong foya. Kong sama deng itu, skarang ini akan ada lagi di ngoni pe tenga-tenga guru-guru agama palsu. Guru-guru palsu itu mo kase ajar ajaran yang orang kira butul, padahal tarada, kong ajaran itu biking rusak orang pe hidup. Kong bukang cuma itu, orang yang iko ajaran itu me mo manyangkal Tuhan Yesus yang so tebus pa dorang. Jadi, apa yang guru-guru palsu biking itu cuma mo biking dong sandiri capat mati kong tapisa deng Tuhan Allah slama-lamanya.

Kolose 1:14

Dia pe Anak itu suda yang so tebus pa torang kong so kase ampun pa torang dari torang pe dosa-dosa.

Efesus 1:7

Barang, deng Yesus Kristus mati kong Dia pe dara tatumpa untuk tebus pa torang, torang bole dapa ampun dari torang pe dosa-dosa. Samua itu torang dapa, karna Tuhan Allah pe bae yang basar skali pa torang.

1 Yohanes 2:2

Dia mati jadi korban supaya torang pe dosa dapa ampun. Kong bukang cuma torang pe dosa, tapi samua orang di dunia ini pe dosa-dosa lagi.

1 Korintus 7:23

Ngoni, Tuhan Allah so bili deng bayar mahal waktu Yesus Kristus dapa salib untuk tebus ngoni pe dosa-dosa. Karna itu, jang lagi kase ngoni pe diri untuk dapa bili jadi manusia pe orang karja.

Wahyu 13:8

Kong samua orang yang tinggal di bumi mo semba pa binatang itu. Orang-orang yang semba itu, dorang yang pe nama tara tatulis di Anak Domba pe buku kehidupan waktu dunia ini bolong jadi. Buku kehidupan itu, Anak Domba yang so perna dapa bunu pe buku. Di buku itu, Tuhan Allah tulis orang-orang pe nama yang mo dapa hidup deng Tuhan Allah slama-lamanya.

Wahyu 11:9

Orang-orang dari samua fam, suku bangsa, bangsa deng bahasa cuma haga-haga dorang dua pe mayat itu selama tiga hari stenga karna dorang tara kase ijin kubur dua mayat itu.

Ibrani 11:14

Orang-orang yang sebut dong pe diri itu pendatang di dunia, itu jelas dorang ada rindu dong pe tampa tinggal yang tetap, tampa yang tarada di dunia ini.

Kolose 1:23

Yang penting, ngoni tetap percaya pa Yesus Kristus deng jang ragu. Percaya turus Kabar Bae tentang Yesus Kristus yang ngoni so dengar itu. Kabar Bae itu suda yang biking torang yakin, torang mo dapa apa yang Tuhan Allah so janji pa Dia pe umat. Kabar Bae itu so tasiar di seluru dunia, kong kita ini, Paulus yang Tuhan Allah so pili untuk kase tau Kabar Bae itu.

Efesus 5:19

Deng ngoni baku kase kuat suda ngoni pe hati satu deng yang laeng pake lagu-lagu mazmur, lagu-lagu yang puji pa Tuhan, deng lagi lagu-lagu laeng yang Roh Kudus kase langsung pa ngoni. Ngoni manyanyi puji pa Tuhan suda deng hati yang sunggu-sunggu, jang cuma di mulu saja.

Wahyu 10:11

Abis itu, kita dengar ada suara yang parenta pa kita bagini, “Ngana musti kase tau pa orang-orang apa yang Tuhan Allah bilang mo jadi di dunia ini nanti. Ngana kase tau tentang apa yang mo jadi nanti pa banya bangsa, suku bangsa, bahasa, deng raja.”

Wahyu 13:7

Tuhan Allah kase ijin pa dia lagi untuk baku prang lawan pa orang-orang yang so jadi Tuhan Allah pe umat, kong kase kala pa dorang. Dia me dapa hak untuk berkuasa pa samua orang dari samua fam, suku bangsa, bahasa deng samua bangsa.

Wahyu 15:3

Dorang manyanyi nabi Musa pe lagu, nabi Musa itu yang jaga biking apa yang Tuhan Allah suru. Lagu itu me Anak Domba pe lagu. Lagu itu pe babunyi bagini, “Ya Tuhan, Tuhan Allah Yang Paling Berkuasa. Tuhan yang biking hal-hal yang luar biasa sampe orang herang. Oo, Tuhan, samua suku pe Raja. Samua yang Tuhan biking itu butul deng adil.

Wahyu 17:15

Turus malaekat itu bilang lagi pa kita, “Samua kali yang ngana so lia, tampa yang parampuang tara bae dudu itu, dia so kuasai. Kali-kali itu pe arti, samua orang deng kumpulan manusia, samua suku bangsa deng bahasa.