Wahyu 4:11 - Perjanjian Baru Bahasa Melayu Maluku Utara

¹¹ “Ya Tuhan Allah torang pe Tuhan. Cuma Tuhan saja yang pantas mo dapa puji deng hormat, deng Tuhan yang punya kuasa. Barang, Tuhan so cipta samua-samua yang ada, kong samua itu ada karna Tuhan suka itu ada, Tuhan yang biking samua itu.”

Wahyu 4:11 Referans Kwoze

Wahyu 5:12

Dorang manyanyi kuat-kuat bagini, “Dia ini Anak Domba yang so perna dapa bunu. Dia yang pantas tarima kuasa, kekayaan, deng pikiran bae untuk ator samua. Dia me pantas tarima kekuatan, puji deng hormat, deng Dia lagi luar biasa.”

Wahyu 10:6

Malaekat itu basumpa demi Tuhan Allah yang hidup slama-lamanya, deng yang so biking sorga deng dia pe isi, bumi deng dia pe isi, laut deng dia pe isi. Malaekat itu bilang bagini, “Tuhan Allah so tara tunda-tunda lagi. Apa yang Dia so bilang itu so mo jadi!

Wahyu 14:7

Malaekat itu bicara kuat-kuat bagini, “Ngoni musti tako pa Tuhan Allah kong puji deng hormat pa Dia! Karna dia pe waktu so sampe, Dia mo adili samua orang deng kase hukum pa dorang yang tara iko pa Dia. Semba suda pa Dia! Dia yang biking langit, bumi, laut deng samua mata aer.”

Wahyu 5:9

Kong dorang manyanyi puji pa Anak Domba itu deng lagu baru bagini: “Anak Domba ini yang pantas tarima kitab tagulung itu, deng yang pantas buka tuju segel yang talém di kitab itu. Barang, Anak Domba ini so perna dapa bunu, kong Dia pe dara so tatumpa untuk hapus orang-orang pe dosa dari tiap fam, suku, bahasa deng bangsa supaya dorang jadi Dia pe umat.

Ibrani 1:10

Tuhan Allah bilang lagi pa Dia pe Anak bagini, “Ngana itu Tuhan, yang dari pertama skali biking dunia ini. Deng Ngana sandiri yang biking samua yang ada di langit.

Roma 11:36

Karna samua yang ada di dunia ini Tuhan Allah yang biking, kong samua itu Dia yang ator. Dia biking samua itu supaya Dia bole dapa puji. Jadi, mari suda torang puji deng hormat pa Dia sampe slama-lamanya! Amin.

Efesus 3:9

Tuhan Allah yang biking samua-samua yang ada, Dia itu yang kase tugas itu pa kita, supaya samua orang dapa lia jelas Tuhan Allah pe rencana yang so deng ratus-ratus taong Dia bolong kase tau itu so jadi.

Kisah Para Rasul 14:15

“Ee ngoni samua, bikiapa kong ngoni biking bagini? Torang ini cuma manusia, sama deng ngoni. Torang datang kamari mo kase tau pa ngoni Kabar Bae tentang Yesus Kristus supaya ngoni bisa kase tinggal ngoni pe puji-puji yang tarada dia pe guna itu, kong percaya pa Tuhan Allah yang hidup itu. Dia itu suda yang biking langit, bumi, laut deng samua dia pe isi.

Kisah Para Rasul 17:24

Tuhan Allah itu yang biking dunia ini deng dia pe isi samua. Dia itu suda Tuhan yang berkuasa di langit deng di bumi. Dia tara tinggal di tampa-tampa semba yang manusia biking.

Wahyu 5:2

Turus kita lia lagi ada malaekat satu yang kuat. Dia tanya deng suara kuat bagini, “Sapa yang pantas buka Tuhan Allah pe tuju segel yang ada kase talém di kitab tagulung itu la bisa buka kitab itu?”

Ibrani 1:2

Tapi skarang, di waktu yang so dekat hari kiamat ini, Tuhan Allah so utus Dia pe Anak sandiri yang bicara langsung pa torang. Dia pe Anak itu yang dulu Tuhan Allah pake untuk biking dunia ini deng samua-samua dunia pe isi. Kong Dia pe Anak itu suda yang Tuhan Allah so tentukan supaya jadi ahli waris dari samua-samua yang ada.

Wahyu 1:6

Dia Raja, kong Dia pili pa torang jadi Dia pe rakyat. Dia me angka pa torang sama deng imam-imam yang pe tugas kusus untuk semba deng puji pa Tuhan Allah, Dia pe Bapa. Cuma pa Dia saja samua yang ada di dunia ini puji deng hormat, deng Dia yang berkuasa sampe slama-lamanya. Amin.

Wahyu 19:1

Abis itu, kita dengar di sorga, sama deng ada orang banya pe suara kuat skali. Dorang bicara kuat-kuat bilang bagini, “Haleluya, mari torang puji deng hormat pa Tuhan Allah! Dia itu torang pe Tuhan Allah. Dia yang kase slamat pa Dia pe umat. Dia itu yang berkuasa!