Titus 3:3 - Perjanjian Baru Bahasa Melayu Maluku Utara

³ Barang, dulu waktu torang bolong percaya pa Yesus, torang tara mangarti apa-apa. Jadi torang malawang pa Tuhan, torang me tapengaru deng hal-hal yang jahat. Napsu deng keinginan yang tara bae so kuasai di torang pe hati kong torang hidup baku mangiri deng orang laeng. Torang jahat pa orang deng torang salalu baku binci.

Titus 3:3 Referans Kwoze

Kolose 1:21

Dulu, waktu ngoni bolong percaya pa Tuhan Yesus, ngoni hidup jao dari Tuhan Allah. Waktu itu ngoni pe pikiran deng kalakuang jahat sampe ngoni biking Tuhan Allah jadi ngoni pe musu.

Roma 6:17

Kita bilang tarimakasi pa Tuhan Allah. Karna, biar dulu dosa jadi sama deng ngoni pe tuang, tapi skarang ngoni so butul-butul iko ajaran yang torang so kase ajar pa ngoni.

Kolose 3:7

Dulu, ngoni me biking hal-hal itu lagi waktu ngoni masi hidup iko dunia pe mau.

Roma 6:22

Tapi skarang Tuhan Allah so kase bebas pa ngoni dari dosa, jadi dosa so tara jadi ngoni pe tuang lagi. Deng ngoni so serakan ngoni pe diri jadi Tuhan Allah pe suru-suru. Dia pe untung, Tuhan Allah so biking ngoni jadi Dia pe umat yang hidup cuma biking Dia pe mau. Kong dia pe ahir kabawa, ngoni mo hidup deng Tuhan Allah slama-lamanya.

1 Petrus 1:14

Ngoni ini Tuhan Allah pe ana-ana, jadi ngoni dengar-dengaran suda pa Dia, deng jang ngoni iko keinginan yang tara bae yang kuasai ngoni pe hidup dulu waktu ngoni bolong percaya pa Tuhan.

2 Korintus 12:20

Kita hawater, kalu kita so datang pa ngoni nanti, ngoni bolong biking sama deng yang kita mau. Bagitu lagi deng ngoni, ngoni lia kita biking tara sama deng yang ngoni mau. Kita hawater, jang sampe kita dapa ada dari ngoni yang baku-baku malawang, baku mangiri, mara-mara, cuma pikir diri sandiri, carita busu orang pe nama, bamulu, basombong deng biking kaco.

Yohanes 8:34

Yesus bilang pa dorang, “Inga bae-bae yang Kita bilang ini. Tiap orang yang biking dosa, dia taika deng dosa, sama deng dosa itu biking dia jadi orang karja.

Matius 21:29

Tapi ana itu jawab, ‘Kita tara mau pigi, papa.’ Dia pe ahir kabawa, ana itu manyasal kong beruba pikiran, turus dia pigi di kobong anggur.

Yakobus 1:26

Kalu ada orang yang anggap dia pe diri rajin baibada, tapi dia salalu bicara yang tara bae atau tara jaga dia pe mulu, itu dia tipu dia pe diri sandiri. Jadi dia pe ibada pa Tuhan itu tarada guna.

Galatia 6:3

Karna kalu ada orang yang pikir kata, dia pe diri itu lebe penting dari orang laeng, padahal tara bagitu, dia itu so kase foya pa dia pe diri sandiri.

Lukas 21:8

Yesus bilang pa dorang, “Ngoni ati-ati e, jang sampe ngoni dapa tipu. Barang, banya orang akan datang pake Kita pe nama, deng dorang bilang bagini, ‘Kita ini Dia suda, Raja yang Tuhan Allah janji mo kase slamat pa manusia!’ Dorang me akan bilang, hari kiamat so dekat. Tapi jang ngoni iko pa dorang itu.

Wahyu 18:2

Malaekat itu bicara deng suara kuat bagini, “Ancor, so ancor, kota Babel yang basar itu so mo ancor. Kota itu mo jadi tampa tinggal setang-setang deng roh-roh jahat. Kota itu me so mo jadi tampa tinggal burung-burung tukang makang bangke deng binatang-binatang yang orang-orang binci.

Wahyu 13:14

Dia biking tanda-tanda itu di binatang pertama pe muka, sampe dia kase sesat orang-orang di bumi. Dia me suru dorang biking patong satu sama deng binatang yang pertama, binatang yang ada luka barát tapi so sembu itu.

Wahyu 12:9

Naga basar itu, setang-setang pe raja yang dong jaga bilang ‘Iblis’. Naga itu yang dari dulu salalu kase sesat orang-orang di seluru dunia ini. Dia deng malaekat-malaekat yang iko pa dia, samua dapa buang dari sorga di bumi.

Roma 6:6

Torang tau to, torang pe hidup lama yang suka biking dosa itu so mati sama-sama deng Yesus Kristus di kayu salib, supaya torang so tara iko lagi torang pe mau yang basar untuk mo biking dosa, itu sama deng torang so tara jadi dosa pe suru-suru lagi.

Roma 6:12

Karna itu, jang ngoni kase biar dosa kuasai pa ngoni pe hidup di dunia ini lagi, supaya ngoni tara iko keinginan yang jahat.

Roma 11:30

Dulu, ngoni orang-orang yang bukang Yahudi tara iko pa Tuhan Allah. Tapi skarang karna orang Yahudi tara dengar-dengaran pa Dia, Dia so kasiang pa ngoni sampe Dia kase bebas pa ngoni dari dosa-dosa.

2 Timotius 3:6

Babarapa orang dari dorang bawa ajaran yang tara butul di orang-orang pe ruma, kong tipu pa parampuang-parampuang yang dong pe dosa banya skali deng gampang tagoda. Parampuang-parampuang itu gampang dapa tipu deng macam-macam keinginan yang kuasai pa dorang.

2 Timotius 3:13

Tapi orang yang jahat deng yang tukang tipu, dorang itu lebe hari lebe tamba jahat. Dorang tipu pa orang-orang kong orang laeng me tipu pa dorang.

Titus 1:16

Dorang bilang kata, dorang kanal pa Tuhan Allah, padahal dong pe kalakuang itu kase tunju dorang itu tara kanal pa Dia. Orang-orang yang jahat bagitu, dorang tara iko Tuhan Allah pe mau, deng tara mampo biking barang yang bae.

Titus 2:12

Tuhan kase Dia pe bae itu, biking torang jadi sadar la kase tinggal torang pe kalakuang yang tara iko Tuhan Allah pe mau deng yang cuma iko dunia pe mau. Deng bagitu torang mampo kuasai diri dalam sagala hal, jadi orang yang hidup butul pa Tuhan Allah pe muka, deng setia pa Dia di dunia skarang ini.