Biblia Todo Logo
Bib sou entènèt

- Piblisite -




Titus 2:13 - Perjanjian Baru Bahasa Melayu Maluku Utara

13 Sementara torang biking samua itu, torang batunggu hari yang nanti biking torang paling sanang waktu Tuhan Yesus Kristus datang lagi deng Dia pe kuasa yang luar biasa. Dia itu suda torang pe Tuhan Allah Yang Paling Berkuasa, deng yang kase slamat pa torang. Torang pe harapan cuma pa Dia.

Gade chapit la Kopi




Titus 2:13
42 Referans Kwoze  

Satu conto lagi, kalu orang iko lomba kong juara, dia dapa hadia. Bagitu lagi deng kita, Tuhan so kase sadia kita pe hadia karna Dia lia kita hidup butul pa Dia pe muka. Hadia itu Dia simpang kong nanti Dia mo kase pa kita di hari yang Dia mo adili pa samua orang deng adil. Hadia itu bukang cuma kita yang mo dapa, tapi samua orang yang percaya yang tunggu-tunggu Dia datang lagi, dorang me mo dapa.


Jadi deng ngoni so tarima karunia dari Roh Kudus itu, ngoni so tara kurang karunia apa-apa lagi. Ngoni so tarima samua karunia dari Roh Kudus waktu ngoni sementara tunggu-tunggu torang pe Tuhan Yesus Kristus datang ulang.


Barang, Anak Manusia yang dari sorga mo datang ulang di dunia ini, sama-sama deng Bapa pe malaekat-malaekat deng Dia pe kuasa yang luar biasa. Kong waktu itu, Anak Manusia mo balas pa tiap orang iko deng apa yang dorang so biking.


Kita ajar pa orang-orang yang percaya itu, supaya dorang bole baharap deng yakin, dorang bole dapa hidup deng Tuhan Allah slama-lamanya, sama deng Tuhan Allah so janji. Karna waktu Tuhan Allah bolong biking dunia ini, Dia so janji kamuka, Dia mo kase hidup slama-lamanya pa orang-orang yang percaya pa Dia. Dia pe janji itu pasti jadi, karna Tuhan Allah tara perna bafoya.


Turus Yesus jawab, “Butul, Dia itu Kita suda. Ngoni akan lia Anak Manusia yang dari sorga dudu di tampa yang terhormat pa Tuhan Allah Yang Paling Berkuasa pe sabla kanan, kong mo datang di tenga-tenga awan di langit.”


Bagitu lagi Yesus Kristus mati cuma satu kali saja, Dia mati itu supaya jadi korban persembahan untuk hapus banya orang pe dosa-dosa. Kong Dia akan datang lagi yang kedua kali, bukang untuk hapus manusia pe dosa-dosa, tapi untuk kase slamat pa orang-orang yang ada tunggu-tunggu Dia mo datang ulang.


Lebe bae tiap hari ngoni tamba sadar Yesus Kristus pe bae deng lebe tamba kanal pa Dia. Dia itu torang pe Tuhan Yesus Kristus yang kase slamat pa torang dari dosa-dosa. Kong untuk Dia suda puji deng hormat dari skarang sampe slama-lamanya. Amin.


Dorang tara percaya Kabar Bae itu karna Iblis, setang-setang pe raja, yang tutu dong pe pikiran. Iblis itu yang orang banya di dunia iko pa dia. Deng bagitu, dorang tara dapa tau Kabar Bae itu butul, deng dorang tara mangarti Yesus Kristus yang pe kuasa luar biasa itu sama persis deng Tuhan Allah.


Tuhan Allah itu yang biking torang bole baharap deng yakin, apa yang Dia janji Dia akan biking. Karna itu, kita minta pa Tuhan Allah supaya Dia biking ngoni pe hati sanang deng hati tenang, karna ngoni so percaya pa Dia. Kita minta itu supaya Roh Kudus pe kuasa bakarja di ngoni pe hati untuk biking ngoni tatamba baharap deng yakin turus pa Tuhan Allah.


Kong karna torang so baharap deng yakin pa Tuhan Allah, torang tau, torang tara akan kecewa karna Tuhan Allah akan kase samua yang Dia janji. Torang so tau itu butul karna Tuhan Allah so kase Roh Kudus yang bakarja di torang pe hati sampe torang bole rasa Dia pe sayang yang basar.


Sudara-sudara yang percaya, salam dari kita Simon Petrus. Kita ini orang yang jaga biking apa yang Yesus Kristus suru, deng kita ini me Dia pe utusan yang orang sebut rasul. Yesus Kristus itu Tuhan Allah, deng Dia me yang kase slamat pa torang dari dosa-dosa. Dia itu yang biking sampe ngoni percaya pa Dia sama deng torang yang so percaya pa Dia, karna Dia salalu biking barang yang butul.


Sengsara yang ngoni dapa itu jadi bukti, ngoni butul-butul percaya pa Tuhan. Itu sama deng mas yang kalu mo tau dia pe asli musti bakar dulu deng api. Tapi ngoni pe percaya lebe berharga dari mas, karna mas itu tara akan ada turus-turus. Kalu ngoni so lolos dari cobaan itu, nanti di hari kiamat, waktu Yesus Kristus datang ulang, Dia mo puji deng hormat pa ngoni.


Puji suda pa Tuhan Allah, Dia itu torang pe Tuhan Yesus Kristus pe Bapa. Dia pe rasa kasiang pa torang basar skali, sampe Dia kase pa torang hidup yang baru waktu Dia so kase hidup ulang pa Yesus Kristus. Kong karna itu, torang bole baharap deng percaya sunggu-sunggu pa Dia.


Yesus Kristus nanti mo datang ulang di dunia ini jadi Raja kong berkuasa. Dia yang mo adili orang-orang yang masi hidup deng yang so mati. Jadi skarang kita bilang deng butul-butul di Tuhan Allah deng Kristus Yesus pe muka, supaya ngana Timotius


Barang, waktu Tuhan Allah biking dunia ini, Dia bicara supaya galap jadi tarang. Bagitu lagi, Dia biking torang pe hati yang galap jadi tarang, supaya tong bole mangarti Tuhan Allah pe kuasa yang luar biasa, kong itu torang bole lia dari Yesus Kristus pe hidup.


Kong kita lagi sama deng dorang, kita percaya deng yakin pa Tuhan Allah, nanti samua orang yang so mati mo hidup ulang, biar dia itu orang yang hidup butul pa Tuhan Allah pe muka, deng yang tara hidup butul pa Tuhan Allah pe muka.


Orang-orang yang hidup skarang ini tara setia iko pa Tuhan Allah. Dorang lebe suka biking dosa. Kalu ada orang yang iko pa Kita deng Kita pe ajaran kong malu pa dorang itu, nanti Kita Anak Manusia me malu mo bilang, Kita kanal pa orang itu waktu Kita datang ulang deng Kita pe Bapa pe kuasa yang luar biasa, sama-sama deng malaekat-malaekat yang kudus.”


Jadi, ngoni dengar ini bae-bae! So tara lama Yesus mo datang di tenga-tenga awan. Kong samua orang akan lia pa Dia. Bagitu lagi deng orang-orang yang dulu tikam pa Dia pake tombak me akan lia pa Dia. Samua suku di dunia akan manyasal kong manangis waktu lia pa Dia. Samua itu memang pasti mo jadi. Amin.


Biar torang so jahat bagitu, tapi Tuhan Allah sayang pa torang kong kase tunju Dia pe bae pa torang sampe torang bole dapa slamat dari torang pe dosa-dosa.


Yesus Kristus itu suda yang ruba ngoni pe hidup jadi baru. Jadi nanti waktu Dia datang ulang yang kedua kali, samua orang akan lia pa Dia deng lia pa ngoni lagi, kong ngoni dapa puji deng hormat sama-sama deng Dia.


Yang penting, ngoni tetap percaya pa Yesus Kristus deng jang ragu. Percaya turus Kabar Bae tentang Yesus Kristus yang ngoni so dengar itu. Kabar Bae itu suda yang biking torang yakin, torang mo dapa apa yang Tuhan Allah so janji pa Dia pe umat. Kabar Bae itu so tasiar di seluru dunia, kong kita ini, Paulus yang Tuhan Allah so pili untuk kase tau Kabar Bae itu.


Torang ini so lia pa Anak Allah deng torang pe mata kapala sandiri kong so kase tau pa ngoni, butul Tuhan Allah torang pe Bapa so utus Dia pe Anak untuk kase slamat pa manusia yang ada di dunia ini.


Ngoni percaya deng sayang macam bagitu, barang ngoni so yakin, ngoni akan tarima apa yang Tuhan Allah so kase sadia untuk ngoni di sorga. Ngoni jadi yakin itu, mulai dari pertama kali ngoni dengar ajaran yang butul, itu Kabar Bae tentang Yesus Kristus.


Turus Yesus jawab, “Bapa sandiri so bilang bagitu. Tapi Kita bilang pa ngoni, nanti ngoni mo lia Anak Manusia yang dari sorga dudu di tampa yang terhormat pa Tuhan Allah Yang Paling Berkuasa pe sabla kanan, kong datang di atas awan-awan di langit.”


Yesus bilang lagi, “Anak Manusia yang dari sorga mo datang ulang deng Dia pe kuasa yang luar biasa deng samua malaekat sama-sama deng Dia, kong Dia mo dudu di kursi raja yang luar biasa.


Yesus Kristus, torang pe Tuhan, deng Tuhan Allah, torang pe Bapa, sayang skali pa torang deng salalu kase kuat torang pe hati sampe torang bole baharap deng yakin torang dapa hidup deng Dia slama-lamanya. Torang bole yakin bagitu, karna torang tau, Yesus Kristus pe bae pa torang.


Waktu itu, baru orang jahat itu mo muncul. Tapi waktu Tuhan Yesus datang ulang deng Dia pe kuasa yang hebat, orang jahat itu akan mati slama-lamanya. Tuhan Yesus bunu pa dia deng cara tiop pa dia, langsung dia mati.


Yang Tuhan Allah kase mangarti pa dorang itu, Dia pe rencana yang paling hebat deng luar biasa pa ngoni orang-orang bukang Yahudi. Dia pe rencana itu bagini: Yesus Kristus tinggal di ngoni pe hati, jadi ngoni bole baharap deng yakin, nanti ngoni me sama-sama deng Dia di Dia pe tampa yang luar biasa.


Kita yakin, torang pe sengsara yang torang dapa skarang di dunia ini, itu cuma kacil kalu kase banding deng sanang yang luar biasa yang nanti Tuhan Allah mo kase pa torang.


Timotius, salam dari kita Paulus, Kristus Yesus pe utusan yang orang sebut rasul. Kita jadi rasul, itu karna iko Tuhan Allah deng Kristus Yesus pe parenta. Tuhan Allah itu yang kase slamat pa torang, deng Kristus Yesus itu yang jadi torang pe harapan.


Timotius, kita sayang pa ngana sama deng kita pe ana sandiri. Kita minta pa Tuhan Allah, torang pe Bapa, deng pa Kristus Yesus, torang pe Tuhan, supaya kase yang bae pa ngana, sayang pa ngana, deng salalu biking ngana pe hati tetap tenang.


Titus, torang dua sama-sama percaya pa Yesus Kristus, jadi kita anggap ngana so sama deng kita pe ana sandiri. Kita minta pa Tuhan Allah, torang pe Bapa, deng pa Kristus Yesus yang kase slamat pa manusia, supaya kase yang bae pa ngana, deng salalu biking ngana pe hati tetap tenang.


Tuhan Allah sayang pa ngoni, jadi ngoni musti tetap yakin Dia pe sayang itu. Ngoni me musti tunggu-tunggu Yesus Kristus torang pe Tuhan datang ulang. Waktu Dia datang ulang, Dia mo kase tunju Dia pe rasa kasiang pa torang supaya torang bole hidup deng Tuhan Allah slama-lamanya.


Swiv nou:

Piblisite


Piblisite