Titus 2:11 - Perjanjian Baru Bahasa Melayu Maluku Utara

¹¹ Torang musti hidup macam bagitu, barang Tuhan Allah so kase jalang la torang samua bole dapa slamat dari torang pe dosa-dosa, supaya torang jang dapa hukuman. Itu Dia pe bae pa torang.

Titus 2:11 Referans Kwoze

1 Timotius 2:4

Dia mau samua orang dapa slamat deng mangarti ajaran yang butul.

Efesus 2:8

Tuhan Allah kase slamat pa torang yang so percaya pa Yesus Kristus karna Dia pe bae pa torang. Dia kase slamat pa torang dari dosa-dosa bukang karna torang pe usaha biking barang yang bae, tapi Dia kase slamat itu deng cuma-cuma pa torang.

Ibrani 2:9

Tapi yang so jelas itu, Yesus Kristus yang berkuasa pa samua-samua yang ada. Dia suda yang Tuhan Allah biking Dia pe posisi sadiki lebe randa dari malaekat-malaekat. Tapi itu cuma sementara saja, cuma waktu Dia ada di dunia ini. Skarang ini, Tuhan Allah so biking Dia jadi hebat deng dapa hormati sama deng Raja karna Dia so menderita sampe mati di kayu salib. Dia rasa samua itu karna Tuhan Allah kase Dia pe bae yang cuma-cuma pa torang samua, supaya torang samua dapa slamat dari dosa-dosa.

Efesus 2:5

Waktu torang masi jaga langgar Tuhan Allah pe parenta, itu bole mo kase sama deng torang so mati. Tapi biar bagitu, waktu Tuhan Allah kase hidup ulang pa Yesus Kristus, itu sama deng Dia so kase hidup ulang pa torang. Jadi, Dia kase slamat pa torang dari dosa-dosa cuma karna Dia pe bae pa torang.

2 Tesalonika 2:16

Yesus Kristus, torang pe Tuhan, deng Tuhan Allah, torang pe Bapa, sayang skali pa torang deng salalu kase kuat torang pe hati sampe torang bole baharap deng yakin torang dapa hidup deng Dia slama-lamanya. Torang bole yakin bagitu, karna torang tau, Yesus Kristus pe bae pa torang.

Roma 5:15

Tapi hasil dari apa yang Yesus Kristus biking deng apa yang Adam biking itu baku beda skali. Kalu Adam, dia langgar Tuhan Allah pe parenta, kong dia pe akibat samua orang mati. Tapi yang Yesus Kristus biking itu, jao lebe basar lagi. Karna Yesus, Tuhan Allah kase Dia pe bae yang cuma-cuma. Deng karna Tuhan Allah pe bae yang cuma-cuma itu, samua orang bole dapa slamat dari dosa-dosa.

Yohanes 1:14

Tuhan Allah pe Firman itu so jadi manusia, kong Dia tinggal di antara torang. Torang so lia Dia pe kuasa yang hebat, kuasa yang Dia dapa dari Tuhan Allah, Dia pe Bapa, karna Dia itu Tuhan Allah pe Anak. Kong Tuhan Allah pe Anak itu cuma satu itu saja. Dia yang biking torang bole tau yang butul tentang Tuhan Allah deng tentang Tuhan Allah pe sayang pa torang.

Kisah Para Rasul 11:23

Waktu Barnabas sampe di sana, dia lia memang Tuhan Allah so kase Dia pe bae sampe banya orang so jadi percaya pa Yesus. Pe lia itu, dia sanang skali. Turus, dia kase smangat pa dorang supaya dorang sunggu-sunggu tetap setia pa Tuhan Yesus.

Kisah Para Rasul 20:24

Biar bagitu, kita tara peduli deng kita pe hidup, tapi yang penting kita bisa kase selesai tugas yang Tuhan Yesus suru kita biking. Kita pe tugas itu, kita musti kase tau Kabar Bae tentang Tuhan Allah pe bae pa torang manusia.

Lukas 3:6

deng samua orang akan mo lia bagimana Tuhan Allah kase slamat manusia dari dorang pe dosa-dosa.”

1 Timotius 1:14

Mala, torang pe Tuhan kase Dia pe bae pa kita talebe-lebe, sampe kita jadi percaya pa Dia, deng jadi sayang pa orang laeng. Samua itu karna kita so hidup satu hati deng Kristus Yesus.

Roma 5:2

Kong karna apa yang Yesus Kristus so biking itu, torang dapa pintu maso untuk dapa Tuhan Allah pe bae asal torang percaya pa Yesus Kristus. Turus torang me bole sanang lagi, karna torang bisa baharap deng yakin nanti torang mo sama-sama deng Tuhan Allah dapa puji deng hormat.

Kolose 1:6

Kong Kabar Bae yang datang pa ngoni itu so tasiar di seluru dunia, sampe banya orang so percaya pa Tuhan kong dong pe hidup beruba. Bagitu lagi yang jadi pa ngoni waktu ngoni mulai dengar Kabar Bae itu kong mangarti butul Tuhan Allah pe bae pa manusia.

Galatia 2:21

Tuhan Allah biking torang jadi orang yang tara sala pa Dia pe muka, kong kita tara tolak Dia pe bae itu. Karna kalu saja torang bole jadi orang yang tara sala pa Tuhan Allah pe muka deng cara biking aturan-aturan di lima kitab Musa, itu berarti, Yesus Kristus pe kematian di kayu salib tarada dia pe guna.

2 Korintus 6:1

Torang deng Tuhan Allah karja sama-sama untuk kase tau Kabar Bae tentang Yesus Kristus pa orang-orang. Ngoni ini so tarima Tuhan Allah pe bae waktu Yesus Kristus dapa salib, jadi torang minta pa ngoni, jang kase sia-sia Tuhan Allah pe bae itu.

Kisah Para Rasul 13:47

Barang, Tuhan Allah parenta pa torang bagini, ‘Kita so pili pa ngana jadi sama deng lampu yang biking tarang pa orang-orang bukang Yahudi, supaya samua orang di dunia ini bisa tau tentang slamat yang Kita kase pa manusia.’ ”

Kisah Para Rasul 13:43

Abis itu, orang-orang kaluar dari ruma ibada kong ada banya orang yang iko pa Paulus deng Barnabas. Dorang itu orang-orang Yahudi deng orang-orang bukang Yahudi yang so maso agama Yahudi. Paulus deng Barnabas kase nasehat pa dorang supaya dong tetap percaya pa Tuhan Allah yang so kase Dia pe bae pa dorang sampe dong bole slamat dari dosa.

Yohanes 1:9

Tarang yang butul itu Yesus suda, kong Dia sementara datang di dunia. Dia mo kase tarang samua orang pe hati la dorang bole tau tentang Tuhan Allah.

Lukas 24:47

Deng nanti Kita pe umat mo bawa Kabar Bae pake Kita pe nama pa samua suku bangsa di dunia supaya dorang bertobat dari dorang pe dosa kong Tuhan Allah mo kase ampun pa dorang. Kong dorang mo kase tau Kabar Bae itu pa orang-orang, mulai dari kota Yerusalem.

Markus 16:15

Abis itu Yesus bilang pa dorang, “Pigi suda di seluru dunia ini, la kase tau Kabar Bae dari Tuhan Allah pa samua orang.

Matius 28:19

Karna itu, ngoni pigi suda kong biking samua bangsa jadi Kita pe murit. Ngoni baptis pa dorang dalam nama Bapa, Anak deng Roh Kudus.

Ibrani 12:15

Ngoni musti ati-ati. Jang sampe ada dari ngoni yang kase tinggal dia pe percaya pa Tuhan Allah sampe dia tara rasa lagi Tuhan Allah pe bae. Barang, orang yang kase tinggal dia pe percaya pa Tuhan Allah, dia itu pe hati saki, jadi jaga pengaru pa banya orang. Orang itu bole kase sama deng tanaman yang ada dia pe racong kong kase rusak tanaman laeng.

2 Timotius 4:17

Biar dorang kase tinggal pa kita, Tuhan Allah tetap sama-sama deng kita. Dia kase kuat pa kita supaya kita bole kase tau samua Kabar Bae tentang Yesus Kristus, deng supaya samua orang yang bukang Yahudi dengar. Dia kase slamat pa kita dari bahaya kematian, sama deng kita bebas dari singa pe mulu.

Kolose 1:23

Yang penting, ngoni tetap percaya pa Yesus Kristus deng jang ragu. Percaya turus Kabar Bae tentang Yesus Kristus yang ngoni so dengar itu. Kabar Bae itu suda yang biking torang yakin, torang mo dapa apa yang Tuhan Allah so janji pa Dia pe umat. Kabar Bae itu so tasiar di seluru dunia, kong kita ini, Paulus yang Tuhan Allah so pili untuk kase tau Kabar Bae itu.

Roma 10:18

Banya orang Israel bolong percaya pa Yesus Kristus, tapi itu bukang karna dorang tara dengar kabar itu, to? Pasti dorang so dengar, karna di Kitab Suci ada tatulis, “Orang-orang so bawa kabar itu sampe di seluru dunia, dorang pe kata-kata so tasiar sampe pa samua orang.”

Kisah Para Rasul 17:30

Dulu, torang manusia bolong tau cara mo percaya pa Tuhan Allah sampe torang biking dosa banya skali. Tapi Tuhan Allah so tara rekeng samua dosa-dosa itu. Kong skarang Tuhan Allah parenta pa samua orang di mana saja, la dorang bertobat kong iko pa Dia.

2 Timotius 1:10

Kong skarang Tuhan Allah so kase Dia pe bae itu pa torang. Yesus Kristus so datang deng kase slamat pa torang dari tong pe dosa, kong kase ancor kuasa yang biking sampe orang bisa mati slama-lamanya. Jadi sapa yang percaya Kabar Bae tentang Yesus Kristus, dia hidup deng Tuhan Allah sampe slama-lamanya.