Titus 1:4 - Perjanjian Baru Bahasa Melayu Maluku Utara

⁴ Titus, torang dua sama-sama percaya pa Yesus Kristus, jadi kita anggap ngana so sama deng kita pe ana sandiri. Kita minta pa Tuhan Allah, torang pe Bapa, deng pa Kristus Yesus yang kase slamat pa manusia, supaya kase yang bae pa ngana, deng salalu biking ngana pe hati tetap tenang.

Titus 1:4 Referans Kwoze

2 Timotius 1:2

Timotius, kita sayang pa ngana sama deng kita pe ana sandiri. Kita minta pa Tuhan Allah, torang pe Bapa, deng pa Kristus Yesus, torang pe Tuhan, supaya kase yang bae pa ngana, sayang pa ngana, deng salalu biking ngana pe hati tetap tenang.

Yudas 1:3

Sudara-sudara yang kita sayang, sementara kita tulis surat pa ngoni tentang slamat yang torang so tarima, kita rasa ada yang musti kita tulis kamuka, supaya ngoni berusaha butul-butul untuk tetap batahang deng ngoni pe percaya. Kong ngoni pe percaya itu musti iko Tuhan Allah pe ajaran yang Dia so kase satu kali untuk slama-lamanya pa torang yang so jadi Dia pe umat.

2 Petrus 1:11

Deng bagitu, nanti Tuhan Allah akan buka pintu sorga untuk ngoni, Dia akan tarima pa ngoni di Tuhan Yesus Kristus pe tampa berkuasa sebagai Raja. Tuhan Yesus Kristus itu yang kase slamat pa torang, deng Dia itu yang jadi Raja slama-lamanya.

2 Petrus 1:1

Sudara-sudara yang percaya, salam dari kita Simon Petrus. Kita ini orang yang jaga biking apa yang Yesus Kristus suru, deng kita ini me Dia pe utusan yang orang sebut rasul. Yesus Kristus itu Tuhan Allah, deng Dia me yang kase slamat pa torang dari dosa-dosa. Dia itu yang biking sampe ngoni percaya pa Dia sama deng torang yang so percaya pa Dia, karna Dia salalu biking barang yang butul.

2 Korintus 2:13

tapi kita pe hati tara tenang, barang kita tara baku dapa deng kita pe sudara yang sama-sama percaya, yang pe nama Titus. Karna itu, kita basiloloa pa orang di sana kong kita pigi di daera Makedonia.

2 Petrus 3:18

Lebe bae tiap hari ngoni tamba sadar Yesus Kristus pe bae deng lebe tamba kanal pa Dia. Dia itu torang pe Tuhan Yesus Kristus yang kase slamat pa torang dari dosa-dosa. Kong untuk Dia suda puji deng hormat dari skarang sampe slama-lamanya. Amin.

2 Korintus 8:23

Kong tentang Titus, dia itu kita pe tamang yang bakarja sama-sama deng kita untuk bantu pa ngoni. Kong dua sudara yang percaya yang sama-sama deng Titus, dorang dua itu dapa utus dari jemaat-jemaat untuk antar doi sumbangan di Yerusalem. Apa yang dorang dua biking itu, biking Yesus Kristus dapa puji deng hormat.

Roma 1:12

Kita pe maksut, kalu kita ada sama-sama deng ngoni, torang bisa baku kase kuat torang pe percaya pa Yesus Kristus.

Yohanes 4:42

Dorang bilang pa parampuang itu, “Torang skarang percaya bukang cuma karna dengar apa yang ngana bilang, tapi karna torang sandiri so dengar dari Dia langsung kong torang so tau Dia itu memang butul-butul Orang yang mo kase slamat pa manusia dari dosa-dosa.”

1 Yohanes 5:14

Kong torang tara usa tako badekat pa Tuhan Allah. Barang, torang tau kalu torang minta apa saja iko Dia pe mau, torang bole yakin Dia dengar apa yang torang minta itu.

2 Petrus 3:2

Ngoni musti inga Tuhan Allah pe pasáng yang dulu Dia pe nabi-nabi so perna kase tau. Ngoni me musti inga parenta dari torang pe Tuhan Yesus yang kase slamat pa torang. Parenta itu, Yesus pe utusan-utusan yang orang sebut rasul ada kase tau pa ngoni.

2 Petrus 2:20

Kita pe maksut, kalu dorang itu so kanal pa Yesus Kristus torang pe Tuhan deng Juruslamat, dorang me so lapas dari dunia pe mau yang jahat. Tapi kalu dorang bale ulang untuk iko keinginan-keinginan yang jahat itu, dorang pe keadaan nanti mo lebe soe dari yang pertama.

Titus 1:3

Kong pas di waktu yang Tuhan Allah so tentukan, Dia kase tau Kabar Bae itu la orang tau cara mo dapa hidup deng Dia slama-lamanya. Kabar Bae ini yang Tuhan Allah so kase percaya pa kita la kita kase tau pa orang-orang. Tuhan Allah itu yang kase slamat pa torang.

Kolose 1:2

Salam untuk ngoni sudara-sudara yang percaya pa Kristus Yesus di kota Kolose, ngoni yang so jadi Tuhan Allah pe umat deng yang setia pa Kristus Yesus. Torang minta pa Tuhan Allah, torang samua pe Bapa, supaya kase yang bae pa ngoni, deng salalu biking ngoni pe hati tetap tenang.

Efesus 1:2

Kita minta pa Tuhan Allah, torang samua pe Bapa deng pa Tuhan Yesus Kristus, supaya yang kase bae pa ngoni, deng salalu biking ngoni pe hati tetap tenang.

Galatia 2:3

Tapi dorang setuju deng ajaran yang kita ajar pa orang bukang Yahudi, deng dorang me tarima pa Titus, orang bukang Yahudi yang ada sama-sama deng kita, deng dorang tara paksa pa dia la dapa sunat iko aturan di lima kitab Musa.

2 Korintus 12:18

Memang kita so suru pa Titus untuk pigi pa ngoni, sama-sama deng tong pe sudara yang percaya satu. Jadi kita tanya pa ngoni, waktu Titus datang pa ngoni, apa dia tipu pa ngoni kong ambe untung dari ngoni? Tarada to? Kita tau tarada, karna Titus deng kita itu, torang pe hati deng kalakuang itu sama untuk bantu pa ngoni.

2 Korintus 8:16

Torang bilang tarimakasi pa Tuhan Allah karna Dia yang biking sampe Titus suka bantu pa ngoni, sama deng torang suka bantu pa ngoni.

2 Korintus 8:6

Jadi, karna lia jemaat-jemaat di Makedonia pe hati bae, torang kirim lagi Titus pa ngoni untuk dia kase turus kumpul doi sumbangan yang tempo hari dia so perna suru ngoni kumpul. Dia bantu pa ngoni kumpul doi sumbangan untuk orang percaya di Yerusalem sampe samua siap.

2 Korintus 7:6

Tapi Tuhan Allah yang salalu kase kuat pa orang yang ilang smangat, Dia kirim Titus datang pa torang untuk kase kuat tong pe hati.

2 Korintus 4:13

Di Kitab Suci ada tatulis bagini, “Karna kita percaya, jadi kita barani bicara.” Bagitu lagi deng torang. Torang percaya, jadi torang tetap barani kase tau Kabar Bae tentang Yesus Kristus pa orang-orang.

Roma 1:7

Kita tulis surat ini pa ngoni samua yang percaya yang tinggal di kota Roma. Ngoni Tuhan Allah sayang, deng Dia so pili pa ngoni la jadi Dia pe umat. Kita minta pa Tuhan Allah torang pe Bapa, deng pa Tuhan Yesus Kristus, supaya kase yang bae pa ngoni, deng salalu biking ngoni pe hati tetap tenang.

Lukas 2:11

Kabar yang bae itu bagini: hari ini, Orang yang mo kase slamat pa manusia so lahir. Dia so lahir di Betlehem, raja Daud pe kota. Dia itu orang pangge Kristus, Raja yang Tuhan Allah janji mo kase slamat pa ngoni. Dia itu suda Tuhan.

Galatia 3:26

Jadi sudara-sudara, ngoni so jadi Tuhan Allah pe ana-ana karna ngoni so percaya pa Yesus Kristus.

Galatia 3:28

Karna itu, samua orang yang so percaya pa Yesus Kristus so tarada beda pa Tuhan Allah pe muka. Biar ngoni itu orang Yahudi atau orang bukang Yahudi, biar ngoni orang karja yang tara bebas atau orang bebas, deng biar ngoni itu laki-laki atau parampuang, Tuhan Allah lia ngoni samua itu sama, karna ngoni itu orang-orang yang so sama-sama percaya pa Kristus Yesus.

1 Timotius 1:12

Kita bersukur pa Kristus Yesus, torang pe Tuhan yang kase kuat pa kita. Kita bersukur pa Dia karna Dia anggap kita ini Dia pe orang yang setia sampe Dia kase percaya pa kita biking Dia pe tugas yang Dia suru.

2 Timotius 1:1

Timotius, salam dari kita Paulus. Kita ini Kristus Yesus pe utusan yang orang sebut rasul. Kita jadi rasul, itu karna Tuhan Allah pe mau. Tuhan Allah pili pa kita untuk kase tau pa orang-orang Tuhan Allah pe janji. Tuhan Allah janji, kalu orang percaya pa Kristus Yesus, orang itu mo dapa hidup deng Dia slama-lamanya.

2 Timotius 4:10

Karna Kreskes so pigi di Galatia, deng Titus so pigi di Dalmatia. Kong Demas so kase tinggal pa kita karna dia lebe suka iko hal-hal di dunia ini. Jadi dia so barangkat di Tesalonika.

Titus 2:13

Sementara torang biking samua itu, torang batunggu hari yang nanti biking torang paling sanang waktu Tuhan Yesus Kristus datang lagi deng Dia pe kuasa yang luar biasa. Dia itu suda torang pe Tuhan Allah Yang Paling Berkuasa, deng yang kase slamat pa torang. Torang pe harapan cuma pa Dia.