Titus 1:16 - Perjanjian Baru Bahasa Melayu Maluku Utara

¹⁶ Dorang bilang kata, dorang kanal pa Tuhan Allah, padahal dong pe kalakuang itu kase tunju dorang itu tara kanal pa Dia. Orang-orang yang jahat bagitu, dorang tara iko Tuhan Allah pe mau, deng tara mampo biking barang yang bae.

Titus 1:16 Referans Kwoze

1 Yohanes 2:4

Sapa saja yang bilang, “Kita kanal pa Tuhan Allah,” tapi dia tara biking Tuhan Allah pe parenta-parenta, dia itu pangbafoya kong ajaran yang butul tara ada di dia pe dalam hati.

Efesus 5:6

Jang ngoni dapa kase bodo dari orang-orang yang bilang kata, hal-hal itu bukang dosa. Barang, Tuhan Allah pasti mo hukum pa orang-orang yang biking hal-hal itu, karna dorang tara dengar-dengaran pa Tuhan Allah.

Yudas 1:4

Barang, ada orang-orang yang bawa ajaran yang tara butul yang so maso pa ngoni pe jemaat, tapi ngoni tara sadar. Dorang itu tara iko Tuhan Allah pe mau. Dorang memang so tarima ajaran tentang torang pe Tuhan Allah pe bae, tapi dorang kase putar bale ajaran itu la orang bisa iko dorang pe napsu yang tara bae. Deng dorang me manyangkal, Yesus Kristus yang cuma satu itu saja torang pe Tuhan, yang berkuasa pa samua-samua. Orang-orang model bagini, dari dulu ada tatulis di Kitab Suci, dorang memang akan dapa hukuman.

Roma 1:28

Deng karna dorang rasa dong tara perlu tau tentang Tuhan Allah, jadi Tuhan Allah kase biar dorang pe pikiran yang tara guna itu kuasai pa dorang. Dia pe ahir kabawa, dorang biking barang yang tara pantas dong biking.

Wahyu 21:27

Tapi samua yang jahat, atau orang yang jaga biking hal-hal yang cafarune atau yang jaga kase foya orang, dorang tara akan maso di kota itu. Yang bisa maso di kota itu cuma orang-orang yang dong pe nama ada tatulis di Anak Domba pe buku kehidupan. Di buku itu ada tulis orang-orang pe nama yang dapa hidup deng Tuhan Allah slama-lamanya.

Wahyu 21:8

Tapi ada orang-orang yang dapa hukum, dorang itu: orang yang stenga-stenga hati iko pa Tuhan, yang tara percaya, yang jaga biking hal-hal tara bae, yang jaga bunu orang, yang baseks sabarang, yang pake tiop-tiop, yang jaga semba pa dong pe puji-puji, deng samua orang yang pangbafoya. Dorang samua akan dapa hukum, dapa buang di api belerang yang luas deng mamanyala. Itu dia pe nama kematian yang kedua.”

1 Timotius 5:8

Karna kalu ada orang yang tara mau urus orang-orang yang ada hubungan keluarga deng dia, apalagi dia pe keluarga yang satu ruma deng dia, itu sama saja dia so manyangkal pa Tuhan Yesus. Orang itu lebe soe dari orang yang tara percaya pa Tuhan.

1 Timotius 1:9

Torang tau aturan-aturan yang ada di lima kitab Musa itu Tuhan Allah pe tujuan bukang untuk orang yang so hidup butul pa Dia pe muka, tapi untuk larang orang-orang yang bagini: yang malawang Tuhan Allah pe parenta, yang tara iko Tuhan Allah pe aturan, yang jaga biking dosa, yang cuma iko dorang pe mau sandiri, yang tara percaya pa Tuhan, yang bunu pa dorang pe papa deng mama deng pa orang laeng,

2 Timotius 3:17

Deng bagitu, Kitab Suci biking torang yang jadi Tuhan Allah pe umat, mampo biking samua yang bae.

Titus 3:1

Titus, ngana musti kase inga pa orang-orang percaya supaya dorang salalu dengar-dengaran pa pemerinta deng pa sapa saja yang berkuasa. Kong dorang me musti salalu siap biking apa saja yang bae.

Titus 3:3

Barang, dulu waktu torang bolong percaya pa Yesus, torang tara mangarti apa-apa. Jadi torang malawang pa Tuhan, torang me tapengaru deng hal-hal yang jahat. Napsu deng keinginan yang tara bae so kuasai di torang pe hati kong torang hidup baku mangiri deng orang laeng. Torang jahat pa orang deng torang salalu baku binci.