Titus 1:15 - Perjanjian Baru Bahasa Melayu Maluku Utara

¹⁵ Untuk orang yang dong pe hati bersi pa Tuhan, tarada aturan agama yang larang pa dorang. Tapi untuk orang-orang yang dong pe hati tara bae deng tara percaya pa Tuhan, dorang tara bisa biking barang yang bae karna dorang pe hati deng pikiran so tara tau mana yang butul.

Titus 1:15 Referans Kwoze

Roma 14:14

Deng karna kita so satu hati deng Tuhan Yesus, kita tau deng yakin, tara ada lagi makanang yang haram pa Tuhan Allah pe muka. Tapi kalu ada orang yang pikir ada makanang yang haram, makanang itu mo jadi haram untuk dia kalu dia makang.

Roma 14:20

Jang ngoni kase rusak Tuhan Allah pe karja pa orang-orang percaya pe hati cuma gara-gara makanang saja. Memang butul, so tarada lagi makanang yang Tuhan Allah larang ngoni makang. Tapi ngoni jadi sala, kalu cuma karna apa yang ngoni makang biking ngoni pe sudara jadi berdosa.

1 Korintus 10:23

Sudara-sudara, ada yang bilang bagini, “Torang bole biking apa saja yang torang mau.” Itu memang butul, tapi tara samua yang torang mo biking itu ada dia pe guna. Jadi biar lagi torang bole biking samua, tapi tara samua yang tong biking itu, biking torang pe percaya jadi lebe kuat.

Matius 15:18

Tapi kata-kata yang kaluar dari orang pe mulu, itu samua dia pe asal dari dalam hati, kong kata-kata itu suda yang biking sampe orang jadi berdosa.

Roma 14:23

Tapi kalu ngoni pikir makang satu macam makanang itu berdosa, kong ngoni tetap makang itu, ngoni itu so jadi sala karna yang ngoni ada biking itu tara iko ngoni pe percaya. Barang, kalu yang ngoni biking itu tara iko ngoni pe percaya, itu berarti ngoni so berdosa.

1 Korintus 10:31

Yang jelas itu bagini, kalu ngoni mo makang ka, mo minum ka, atau mo biking apa saja, biking saja samua itu supaya Tuhan Allah dapa puji deng hormat.

Kisah Para Rasul 10:15

Tapi suara itu bilang yang kedua kali pa dia, “Apa yang Tuhan Allah so biking jadi halal, tara bole ngana bilang haram.”

1 Korintus 8:7

Tapi biar bagitu, tara samua orang yang tau, orang pe puji-puji itu tarada dia pe kuasa. Ada orang yang waktu bolong percaya Tuhan, dorang kase-kase makang pa dong pe puji-puji. Kong biar dorang so tara semba lagi pa puji-puji itu, di dorang pe hati, dorang masi kira kata, kalu dong makang daging yang orang so kase pa puji-puji itu, dong itu so berdosa pa Tuhan Allah. Dorang pikir bagitu, karna dong pe percaya bolong kuat.

Ibrani 10:22

Dia so biking torang pe hubungan deng Tuhan Allah jadi bae-bae ulang, jadi mari suda torang datang pa Tuhan Allah deng hati yang tara ragu deng percaya butul-butul pa Dia. Barang, torang pe hati so jadi bersi dari yang jahat, deng tong pe badan so dapa kase bersi deng aer bersi.

1 Korintus 10:25

Samua daging yang orang jual di pasar, bole ngoni makang deng hati yang tara ragu. Tara usa ngoni mo cari tau kalu daging itu orang so kase pa puji-puji ka tarada.

1 Timotius 6:5

Orang yang jaga kase ajar ajaran sesat itu, dong pe hidup suka baku malawang, deng dorang itu tara tau apa yang butul, kong dong kira deng hidup iko Tuhan Allah pe mau, dong mo jadi kaya.

Ibrani 9:14

Jadi kalu dara deng abu binatang saja bisa kase bersi orang pe dosa-dosa, apalagi deng Yesus Kristus pe dara! Yesus Kristus so kase Dia pe diri sandiri pa Tuhan Allah jadi korban persembahan yang sempurna. Yesus Kristus jadi korban yang sempurna, barang Roh Kudus yang ada turus sampe slama-lamanya itu yang biking Dia mampo kase Dia pe diri bagitu. Dia pe dara itu yang kase bersi torang pe hati dari hal-hal yang tarada dia pe guna, supaya torang bole semba pa Tuhan Allah yang hidup.

Ibrani 12:15

Ngoni musti ati-ati. Jang sampe ada dari ngoni yang kase tinggal dia pe percaya pa Tuhan Allah sampe dia tara rasa lagi Tuhan Allah pe bae. Barang, orang yang kase tinggal dia pe percaya pa Tuhan Allah, dia itu pe hati saki, jadi jaga pengaru pa banya orang. Orang itu bole kase sama deng tanaman yang ada dia pe racong kong kase rusak tanaman laeng.