Titus 1:10 - Perjanjian Baru Bahasa Melayu Maluku Utara

¹⁰ Kita suru ngana cari orang yang pimpin macam bagitu, karna dorang itu musti kuat hadapi banya orang yang tantang ajaran yang butul skarang ini. Orang-orang itu suka pengaru orang laeng supaya iko pa dorang, padahal dorang pe ajaran itu ajaran yang sala deng tara guna. Lebe-lebe lagi, ada dari dorang itu, orang agama Yahudi yang so percaya pa Yesus, tapi dong kase ajar kata, kalu orang bukang Yahudi yang mo iko pa Yesus, musti sunat dulu.

Titus 1:10 Referans Kwoze

1 Timotius 1:6

Tapi ada orang yang so tara iko nasehat itu, mala cuma suka bacarita yang tara dia pe guna.

1 Yohanes 4:1

Sudara-sudara yang kita sayang, jang ngoni percaya pa samua orang yang bilang, pa dorang ada Tuhan Allah pe Roh. Lebe bae ngoni lia dulu bae-bae kalu dorang butul dari Tuhan ka bukang, karna banya orang yang datang skarang bilang kata, dong kase turus Tuhan Allah pe pasáng, padahal bafoya. Dorang cuma nabi palsu.

Galatia 2:4

Memang ada babarapa orang laeng yang tantang supaya Titus dapa sunat. Dorang itu maso babadiam di jemaat, biking diri percaya pa Yesus Kristus sama deng torang, padahal dorang itu cuma mo cari tau pa torang. Dorang lia torang so bebas dari aturan-aturan di lima kitab Musa karna torang so percaya pa Kristus Yesus, kong dorang mo biking torang taika ulang deng aturan-aturan itu, sama deng orang karja yang taika pa dia pe tuang.

Efesus 4:14

Kalu torang pe percaya so kuat bagitu, torang so tara gampang dapa tipu sama deng ana kacil. Jadi kalu ada orang yang datang kase ajar ajaran macam-macam yang tara butul untuk pengaru pa torang, torang tara akan gampang taiko pa dorang. Torang tara akan sama deng omba yang kasana-kamari iko angin batiop.

Yakobus 1:26

Kalu ada orang yang anggap dia pe diri rajin baibada, tapi dia salalu bicara yang tara bae atau tara jaga dia pe mulu, itu dia tipu dia pe diri sandiri. Jadi dia pe ibada pa Tuhan itu tarada guna.

2 Timotius 3:13

Tapi orang yang jahat deng yang tukang tipu, dorang itu lebe hari lebe tamba jahat. Dorang tipu pa orang-orang kong orang laeng me tipu pa dorang.

Kisah Para Rasul 11:2

Jadi, waktu Petrus pulang di Yerusalem di daera Yudea, babarapa orang Yahudi di sana kase sala pa Petrus. Dorang itu so percaya pa Yesus tapi masi pegang kuat orang Yahudi pe aturan sunat.

Wahyu 2:14

Tapi biar bagitu me, Kita mo bilang pa ngoni, ngoni pe sala bagini: ada babarapa orang dari ngoni yang jaga iko Bileam pe ajaran sesat. Bileam itu yang ajar pa Balak supaya pengaru pa orang Israel la biking dosa. Lebe kusus Bileam ajar pa dorang untuk makang makanang yang so kase pa dong pe puji-puji, deng dong me jaga baseks sabarang.

Wahyu 2:6

Tapi ada yang ngoni jaga biking yang Kita sanang, ngoni tara suka Nikolaus pe ajaran yang dia pe orang-orang jaga iko. Kita me tara suka yang dorang biking itu.

1 Yohanes 2:18

Ngoni yang kita sayang sama deng kita pe ana-ana, hari kiamat so dekat, kong ngoni so dengar to, satu orang yang musu pa Yesus Kristus akan datang. Mala skarang dorang itu so banya yang datang. Itu dia pe tanda torang bole tau, hari kiamat so dekat.

2 Timotius 4:4

Dorang tara mau dengar ajaran yang butul. Dorang lebe suka dengar carita-carita dulu-dulu yang tara guna.

1 Timotius 1:4

Dorang me jang dengar carita dulu-dulu deng lagi carita tentang orang tua dulu-dulu pe asal usul yang tara abis-abis. Karna orang yang carita itu, dia pe ahir kabawa salalu baku mara. Apalagi itu tara bantu orang la percaya pa Tuhan Allah.

Galatia 3:1

Ee ngoni orang-orang percaya di Galatia! Tuhari, kita so kase tau deng jelas di ngoni pe muka-muka to, Yesus Kristus mati di kayu salib untuk tebus torang pe dosa. Tapi skarang orang so kase tipu pa ngoni untuk iko dorang pe ajaran yang sala, kata, musti iko aturan-aturan di lima kitab Musa baru dapa slamat. Ngoni memang bodo!

Kisah Para Rasul 20:29

Kita tau kalu kita so kase tinggal pa ngoni nanti, ada orang-orang yang dong pe sifat sama deng anjing utang yang jahat mo maso pa ngoni pe tenga-tenga, kong dorang berusaha mo kase ancor jemaat yang ngoni jaga itu.

Kisah Para Rasul 15:1

Waktu Paulus deng Barnabas masi di kota Antiokhia, ada babarapa orang Yahudi yang percaya pa Yesus yang datang dari Yudea ka sana di Antiokhia. Dorang mangajar pa orang-orang percaya yang bukang Yahudi. Dorang bilang bagini, “Kalu ngoni tara dapa sunat iko aturan di lima kitab Musa, ngoni tara dapa slamat.”

Kisah Para Rasul 15:24

Torang tulis surat ini, barang torang dengar ada babarapa orang dari torang pe jemaat di Yerusalem yang so pigi pa ngoni. Kong dorang kase ajar pa ngoni deng dong pe ajaran sandiri yang biking bingung deng biking ngoni pe hati tara tenang. Padahal torang tara perna suru orang-orang itu pigi pa ngoni.

1 Timotius 1:9

Torang tau aturan-aturan yang ada di lima kitab Musa itu Tuhan Allah pe tujuan bukang untuk orang yang so hidup butul pa Dia pe muka, tapi untuk larang orang-orang yang bagini: yang malawang Tuhan Allah pe parenta, yang tara iko Tuhan Allah pe aturan, yang jaga biking dosa, yang cuma iko dorang pe mau sandiri, yang tara percaya pa Tuhan, yang bunu pa dorang pe papa deng mama deng pa orang laeng,

Titus 1:6

Tiap orang yang ngana pili mo jadi penatua, dia pe cara hidup musti butul, deng dia musti hidup setia pa satu bini saja. Dia pe ana-ana me musti percaya pa Yesus Kristus, deng tarada orang yang bilang ana-ana itu suka biking barang yang jahat atau dorang itu pangmalawang.

1 Yohanes 2:4

Sapa saja yang bilang, “Kita kanal pa Tuhan Allah,” tapi dia tara biking Tuhan Allah pe parenta-parenta, dia itu pangbafoya kong ajaran yang butul tara ada di dia pe dalam hati.

Matius 23:14

Cilaka suda ngoni guru-guru agama Yahudi yang ahli lima kitab Musa deng orang-orang Yahudi dari aliran Farisi! Ngoni munafik samua. Barang ngoni suka biking bodo pa janda-janda la ambe dong pe ruma. Baru ngoni kalu berdoa, suka kase panjang-panjang supaya orang tau ngoni itu orang bae, padahal tarada. Karna itu, ngoni pasti mo dapa hukuman yang paling barát].