Roma 5:10 - Perjanjian Baru Bahasa Melayu Maluku Utara

¹⁰ Karna dulu, waktu torang masi pangmalawang pa Tuhan Allah, Tuhan Allah sandiri yang kase bae-bae ulang torang pe hubungan deng Dia, deng cara Dia kase Dia pe Anak supaya mati untuk torang. Kong karna torang deng Dia pe hubungan so bae-bae ulang skarang, torang tau, torang pasti akan dapa slamat dari dosa-dosa karna Dia pe Anak so hidup ulang.

Roma 5:10 Referans Kwoze

Roma 8:32

Dia pe Anak sandiri saja Dia tara tahang-tahang, tapi Dia kase sampe mati di kayu salib supaya tebus torang pe dosa. Karna itu, torang jadi tau, apa saja yang bae untuk torang, pasti Dia kase.

Efesus 2:16

Jadi, deng Yesus Kristus so mati di kayu salib, Dia biking torang orang-orang Yahudi deng ngoni orang-orang bukang Yahudi pe hubungan so bae-bae ulang deng Tuhan Allah, kong torang samua so tara baku musu lagi.

Wahyu 1:18

Kita ini yang hidup! Memang Kita so perna mati, tapi lia skarang Kita so hidup ulang, kong Kita tetap hidup sampe slama-lamanya. Kita yang pegang samua kunci maut, itu berarti, Kita ada kuasa untuk kase hidup ulang orang yang so mati. Pa Kita me ada kunci kerajaan maut, itu berarti, Kita ada kuasa di tampa orang-orang yang mati.

Ibrani 7:25

Kong karna Dia Imam slama-lamanya, Dia ada kuasa kase slamat pa orang-orang yang mau datang pa Tuhan Allah, dari skarang sampe slama-lamanya. Dia kase slamat pa torang, barang Dia hidup slama-lamanya untuk kase berdoa pa torang pa Tuhan Allah.

Roma 8:34

Tarada yang bisa kase hukuman pa torang yang percaya, karna Kristus Yesus yang ada bela pa torang pa Tuhan Allah pe muka. Kristus Yesus mati supaya tebus torang pe dosa. Kong lebe dari itu lagi, skarang Dia so hidup ulang kong dudu di tampa yang terhormat, pa Tuhan Allah pe sabla kanan.

Roma 8:7

Barang, orang-orang yang hidup cuma iko manusia pe mau yang suka biking dosa, dorang itu jaga malawang pa Tuhan Allah. Dorang tara iko Tuhan Allah pe aturan, karna memang dorang tara mampo iko aturan itu.

Ibrani 2:17

Kong karna Dia mo tolong pa torang yang jadi Dia pe sudara, Tuhan Allah musti biking Yesus jadi sama persis deng torang manusia. Deng karna Yesus so rasa samua yang torang so rasa, Dia bole kase tunju Dia pe rasa kasiang pa torang manusia, sampe bole kase Dia pe diri mati untuk tebus torang pe dosa-dosa. Deng Dia mati itu, Yesus jadi Imam Basar yang setia pa Tuhan Allah supaya torang deng Tuhan Allah pe hubungan jadi bae ulang.

2 Korintus 5:21

Yesus Kristus tara perna biking dosa, tapi Tuhan Allah so kase hukuman pa Dia untuk ganti pa torang yang berdosa, supaya torang yang percaya pa Yesus Kristus, Tuhan Allah biking torang jadi orang yang tara sala pa Dia pe muka.

Roma 11:28

Biar bagitu me, banya dari kita pe sudara bangsa Yahudi yang tara percaya Kabar Bae tentang Yesus Kristus, karna itu dorang so jadi Tuhan Allah pe musu. Tapi karna dorang tara percaya Kabar Bae itu, biking ngoni untung, skarang Tuhan Allah so tarima pa ngoni. Cuma biar bagitu, orang-orang Yahudi tetap Tuhan Allah sayang, barang Tuhan Allah so pili pa dorang jadi Dia pe umat. Itu Dia pe janji dari dulu pa dorang pe orang tua dulu-dulu.

Roma 5:11

Deng torang sanang bukang cuma karna dapa slamat saja, tapi torang sanang karna torang ada hubungan bae deng Tuhan Allah. Torang pe hubungan deng Tuhan Allah so jadi bae ulang karna Yesus Kristus torang pe Tuhan.

Yohanes 14:19

So tara lama lagi orang-orang yang tara percaya, tara akan lia lagi pa Kita. Tapi ngoni mo lia lagi pa Kita barang Kita mo hidup ulang, kong karna Kita mo hidup ulang, Kita mo biking ngoni hidup deng Tuhan Allah slama-lamanya.

Yohanes 6:57

Kita pe Bapa yang utus pa Kita, Dia itu yang kase hidup pa samua yang hidup, deng Dia lagi yang kase hidup pa Kita. Jadi, sapa saja yang makang Kita pe badan, dia mo dapa hidup deng Tuhan Allah slama-lamanya karna dia percaya pa Kita.

Yohanes 6:40

Barang, ini yang Kita pe Bapa mau: Dia mau supaya tiap orang yang lia pa Dia pe Anak kong percaya pa Anak itu, dorang itu mo dapa hidup deng Tuhan Allah slama-lamanya, deng nanti di hari kiamat, Kita mo kase hidup ulang pa dorang.”

Yohanes 5:26

Barang, sama deng Bapa ada kuasa untuk kase hidup orang, bagitu lagi Dia kase kuasa itu pa Dia pe Anak untuk kase hidup pa orang.

Roma 5:6

Tuhan Allah pe sayang pa torang itu bagini: waktu torang tara bisa biking apa-apa la bebas dari dosa-dosa, Yesus Kristus mati untuk torang yang hidup tara iko Tuhan Allah pe mau. Yesus Kristus mati, pas di waktu yang Tuhan Allah so tentukan.

2 Korintus 5:20

Jadi torang biking tong pe tugas itu, Yesus Kristus yang utus pa torang. Torang kase tau tentang Dia, itu sama deng Tuhan Allah sandiri yang bicara pa ngoni pake torang pe kata-kata. Deng Yesus Kristus pe kuasa, tong dua minta supaya ngoni kase ngoni pe diri suda pa Tuhan Allah la Dia biking ngoni pe hubungan jadi bae-bae ulang deng Dia.

Efesus 2:3

Dulu torang samua itu sama deng dorang lagi, torang hidup cuma iko manusia pe mau yang suka biking dosa, deng torang cuma iko torang pe keinginan deng pikiran yang tara bae. Sebenarnya torang pantas dapa hukum dari Tuhan Allah, karna yang torang biking itu jahat, sama deng samua orang di dunia jaga biking.

1 Yohanes 2:1

Sudara-sudara yang kita sayang sama deng kita pe ana-ana, kita tulis surat ini pa ngoni supaya jang ngoni biking dosa lagi. Tapi kalu ada dari ngoni yang biking dosa, ada yang mo bela pa dia di Tuhan Allah torang pe Bapa pe muka. Yang mo bela itu, Yesus Kristus, Dia yang adil.

1 Yohanes 4:10

Sayang yang butul itu, bukang torang yang sayang pa Tuhan Allah, tapi Tuhan Allah yang sayang pa torang, sampe Dia utus Dia pe Ana untuk jadi korban supaya torang dapa ampun dari torang pe dosa-dosa.