Roma 3:5 - Perjanjian Baru Bahasa Melayu Maluku Utara

⁵ Torang orang Yahudi jaga biking barang yang tara butul. Deng bagitu, banya orang lebe tau Tuhan Allah itu salalu butul. Tapi jang sampe ada yang bilang bagini, “Itu berarti, ada dia pe bae torang biking dosa. Jadi, kalu torang dapa hukum, itu pe arti, Tuhan Allah tara butul.” Kalu dorang bilang bagitu, itu cuma manusia pe pikiran saja.

Roma 3:5 Referans Kwoze

Roma 6:19

Kita pake conto suru-suru, supaya ngoni bole capat mangarti yang kita bilang itu. Dulu, dosa so jadi ngoni pe tuang yang suru-suru pa ngoni. Ngoni so iko ngoni pe napsu sampe biking hal-hal kotor deng ngoni pe badan, deng ngoni malawang turus-turus Tuhan Allah pe parenta. Tapi skarang, ngoni musti serakan ngoni pe diri jadi Tuhan Allah pe suru-suru supaya ngoni biking turus yang butul pa Tuhan Allah pe muka. Deng bagitu, Tuhan Allah biking ngoni jadi Dia pe umat yang hidup cuma biking Dia pe mau.

Galatia 3:15

Sudara-sudara, kita mo kase conto satu dari hidup hari-hari. Kalu orang biasa biking janji, turus dorang biking sah dong pe janji itu, so tara ada lagi orang laeng yang bole mo kase batal atau bole mo tamba apa-apa di janji itu, biar lagi janji itu cuma manusia yang biking.

1 Korintus 9:8

Kita pe maksut, orang yang kase tau Tuhan pe firman pa orang-orang, dorang ada hak untuk hidup dari dong pe suar lala itu. Itu bukang cuma manusia pe pikiran saja, tapi itu sama deng yang tatulis di lima kitab Musa, to?

Roma 7:7

Kong, kalu gara-gara aturan di lima kitab Musa itu torang lebe tamba biking dosa, apa torang mo bilang aturan itu sala? Pasti tarada, to? Aturan di lima kitab Musa itu tara sala, mala karna aturan itu ada, kita sandiri baru tau apa itu dosa. Dia pe conto bagini: di lima kitab Musa ada aturan yang tatulis, “Tara bole ingin orang laeng pe barang.” Kita tara tau kalu ingin orang laeng pe barang itu dosa, kong kita baru tau itu dosa, karna aturan itu.

Roma 4:1

Jadi, apa yang musti torang biking supaya torang jadi orang yang tara sala pa Tuhan Allah pe muka? Torang ambe conto pa Abraham. Dia itu torang pe orang tua dulu-dulu.

Roma 2:5

Tapi ngoni ini kapala batu, ngoni tara mau bertobat. Karna itu, ngoni sandiri yang biking ngoni pe hukuman lebe tamba barát di hari kiamat. Di waktu itu, Tuhan Allah mo kase tunju Dia pe mara deng mo kase hukuman yang adil pa samua orang.

Wahyu 18:20

Abis itu, ada suara yang bilang bagini, “Ee ngoni yang hidup di sorga, sanang suda ngoni, barang kota Babel itu Tuhan Allah so hukum. Sanang suda ngoni orang-orang yang so jadi Tuhan Allah pe umat, ngoni Tuhan pe utusan-utusan yang orang sebut rasul-rasul, deng ngoni nabi-nabi yang jaga kase turus Tuhan Allah pe pasáng! Barang, Tuhan Allah so kase hukuman pa kota itu karna samua kajahatan yang orang-orang di kota itu perna biking pa ngoni.”

Wahyu 15:3

Dorang manyanyi nabi Musa pe lagu, nabi Musa itu yang jaga biking apa yang Tuhan Allah suru. Lagu itu me Anak Domba pe lagu. Lagu itu pe babunyi bagini, “Ya Tuhan, Tuhan Allah Yang Paling Berkuasa. Tuhan yang biking hal-hal yang luar biasa sampe orang herang. Oo, Tuhan, samua suku pe Raja. Samua yang Tuhan biking itu butul deng adil.

1 Korintus 15:32

Kong kalu orang mati tara akan hidup ulang, tarada guna lagi kita mangada siksa dari kita pe musu-musu di kota Efesus sini. Itu sama deng kita ada baku mangada deng binatang-binatang jahat. Kalu memang orang mati tara hidup ulang, lebe bae torang biking bagini suda, “Mari tong bapesta rame-rame deng mari tong makang minum saja, karna beso torang so mati kong!”

Roma 12:19

Sudara-sudara yang kita sayang, jang ngoni balas pa orang yang biking jahat pa ngoni, tapi kase biar suda Tuhan Allah yang mo hukum. Karna ada tatulis di Kitab Suci bagini, “Kita yang pe hak untuk mo balas. Kita yang mo hukum.”

Roma 6:1

Tuhan Allah so kase ampun pa torang, karna Dia pe bae pa torang. Tapi jang sampe ada orang yang bilang bagini, “Kalu bagitu, torang turus biking dosa saja supaya Tuhan Allah lebe tamba kase Dia pe bae pa torang.”

Roma 3:19

Samua tulisan itu ada di Kitab Suci. Torang so tau, aturan di lima kitab Musa itu Tuhan Allah kase supaya torang orang Yahudi iko. Jadi deng aturan itu, ada kase jelas, tarada satu orang yang bole bilang, dia itu so butul pa Tuhan Allah pe muka. Samua orang di dunia pantas dapa hukum dari Tuhan Allah.

Roma 3:7

Turus ada lagi yang bilang bagini kata, “Ternyata torang pe kalakuang yang jahat itu, biking orang lebe dapa lia Tuhan Allah itu butul sampe orang laeng lebe puji deng hormat pa Dia. Kalu bagitu, bikiapa kong Tuhan Allah musti mo hukum pa torang gara-gara torang pe dosa?”

Roma 5:8

Tapi Tuhan Allah pe sayang pa torang itu tara bagitu. Waktu torang masi berdosa, Yesus Kristus mati untuk torang. Itu yang kase tunju Tuhan Allah pe sayang yang basar pa torang.

Roma 8:31

Kalu torang inga samua yang Tuhan Allah so biking untuk torang, torang musti yakin Tuhan Allah ada sama-sama deng torang. Jadi sapa yang mampo lawan pa torang? Tarada, to?

Roma 9:30

Karna itu, torang bole bilang bagini: orang-orang yang bukang Yahudi, dorang tara berusaha supaya jadi orang yang butul pa Tuhan Allah pe muka. Tapi, biar bagitu, ada dari dorang yang percaya pa Yesus Kristus sampe Tuhan Allah biking dorang itu jadi orang yang tara sala pa Dia pe muka.

2 Korintus 6:4

Mala samua yang torang biking, torang biking bae-bae supaya jelas torang ini orang yang karja untuk Tuhan Allah, macam deng bagini: biar torang dapa siksa, susa deng sengsara, torang batahang turus.

2 Korintus 7:11

Coba ngoni inga sedi yang ngoni rasa waktu baca kita pe surat yang kamuka itu. Sedi itu yang Tuhan Allah mau, karna sedi itu biking ngoni berusaha untuk biking barang yang butul, bagini: ngoni dapa smangat untuk biking Tuhan pe mau, ngoni kase bersi ngoni pe nama dari apa yang orang tudu pa ngoni, ngoni mara pa orang-orang yang biking dosa, ngoni jadi tako kalu tara butul-butul iko pa Tuhan, ngoni ingin baku dapa deng torang, deng ngoni lagi tara tako untuk hukum pa orang-orang yang biking sala. Samua yang ngoni biking itu kase tunju ngoni tara sala.

Galatia 2:18

Karna kalu kita mo bale ulang untuk biking aturan-aturan di lima kitab Musa supaya Tuhan Allah biking kita jadi orang yang tara sala pa Dia pe muka, itu sama deng orang yang ada kase badiri ulang gedung tua yang dia so kase ancor. Kalu kita biking bagitu, itu jelas kita memang butul-butul so berdosa pa Tuhan Allah.