Roma 3:21 - Perjanjian Baru Bahasa Melayu Maluku Utara

²¹ Tapi skarang, Tuhan Allah so kase tunju bagimana cara supaya torang jadi orang yang tara sala pa Dia pe muka. Kong itu bukang karna torang iko aturan yang ada di lima kitab Musa. Tapi cara itu dulu so tatulis di lima kitab Musa deng di nabi-nabi laeng pe kitab bagini,

Roma 3:21 Referans Kwoze

Kisah Para Rasul 10:43

Dulu, samua nabi so perna kase tau Tuhan Allah pe pasáng yang bilang, Yesus mo datang. Dorang bilang kalu orang percaya pa Dia, orang itu pe dosa-dosa pasti mo dapa ampun karna Yesus pe kuasa.”

Filipi 3:9

deng bole hidup satu hati deng Dia. Tuhan Allah biking kita jadi orang yang tara sala pa Dia pe muka, bukang karna kita berusaha iko aturan-aturan di lima kitab Musa, tapi itu cuma karna kita percaya pa Yesus Kristus. Jadi, cuma deng percaya saja pa Yesus Kristus, kita jadi orang yang tara sala pa Tuhan Allah pe muka.

Galatia 3:8

Di Kitab Suci, torang bole tau, dari dulu Tuhan Allah so rencana mo biking orang-orang bukang Yahudi itu jadi orang yang tara sala pa Dia pe muka, asal dorang percaya pa Yesus Kristus. Tuhan Allah so kase tau Kabar Bae tentang Yesus Kristus itu lebe kamuka pa Abraham bagini, “Dari ngana, samua suku bangsa di dunia mo dapa berkat.”

Roma 5:19

Karna Adam tara iko Tuhan Allah pe mau, itu biking samua orang berdosa. Tapi karna Yesus Kristus iko Tuhan Allah pe mau, itu biking samua orang bole jadi orang yang tara sala pa Tuhan Allah pe muka.

Roma 1:17

Kabar Bae itu ada kuasa dari Tuhan Allah, karna Kabar Bae itu kase tau bagimana supaya torang bole jadi orang yang tara sala pa Tuhan Allah pe muka. Dia pe cara, torang musti percaya pa Tuhan Allah, tarada cara laeng. Itu sama deng yang so tatulis di Kitab Suci bagini, “Orang yang percaya pa Tuhan, dia itu yang Tuhan biking jadi orang yang tara sala pa Tuhan pe muka, kong dia yang mo hidup deng Tuhan Allah slama-lamanya.”

Roma 1:2

Kabar Bae itu Tuhan Allah so janji dari dulu pa Dia pe nabi-nabi, kong dorang tulis itu di Kitab Suci.

Kisah Para Rasul 15:11

Jadi ngoni tara bole biking bagitu. Mala, torang orang Yahudi tau, torang dapa slamat dari dosa-dosa, cuma karna Tuhan Yesus pe bae yang cuma-cuma pa torang, sama deng Dia pe bae pa dorang orang-orang bukang Yahudi lagi.”

Lukas 24:44

Kong Dia bilang pa dorang, “Kita bilang ini pa ngoni waktu Kita masi sama-sama deng ngoni: samua yang tatulis tentang Kita di lima kitab Musa, nabi-nabi laeng pe kitab, deng kitab Mazmur, samua itu musti mo jadi.”

2 Petrus 1:1

Sudara-sudara yang percaya, salam dari kita Simon Petrus. Kita ini orang yang jaga biking apa yang Yesus Kristus suru, deng kita ini me Dia pe utusan yang orang sebut rasul. Yesus Kristus itu Tuhan Allah, deng Dia me yang kase slamat pa torang dari dosa-dosa. Dia itu yang biking sampe ngoni percaya pa Dia sama deng torang yang so percaya pa Dia, karna Dia salalu biking barang yang butul.

1 Petrus 1:10

Slamat itu suda yang Tuhan Allah kase untuk ngoni cuma karna Dia pe bae. Kong tentang slamat itu, itu so dari dulu Tuhan Allah kase tau pa nabi-nabi. Tapi, biar waktu itu nabi-nabi bolong mangarti, dorang masi tetap cari tau deng cari mangarti bae-bae tentang slamat itu.

Galatia 5:5

Tapi sudara-sudara, Roh Kudus bakarja di torang pe hati jadi torang percaya Tuhan Allah mo biking torang jadi orang yang tara sala pa Dia pe muka. Itu suda yang torang tunggu-tunggu.

Roma 16:26

tapi skarang baru Tuhan Allah kase tau pa torang manusia. Kabar Bae itu, Tuhan Allah so janji pa nabi-nabi dulu kong Dia suru dorang tulis itu supaya samua orang yang dari samua suku bangsa tau, kong dorang bole jadi percaya deng iko pa Yesus. Tuhan Allah itu salalu ada sampe slama-lamanya.

Kisah Para Rasul 26:22

Tapi Tuhan Allah salalu tolong pa kita, jadi kita masi bisa hidup sampe hari ini. Skarang kita badiri di sini, kita basaksi tentang Yesus pa ngoni samua, biar pejabat atau orang biasa. Samua yang kita bilang tentang Yesus so jadi sama deng yang Tuhan Allah bilang dulu pa nabi Musa deng nabi-nabi laeng.

Yohanes 1:45

Abis Yesus pangge pa Filipus untuk iko pa Dia, Filipus pigi cari baku dapa deng dia pe tamang Natanael kong bilang pa dia, “Natanael e, torang so baku dapa deng Dia yang Tuhan Allah so janji dulu mo datang! Dia yang nabi Musa tulis dulu di lima kitab Musa, deng nabi-nabi laeng jaga bilang lagi. Dia itu pe nama Yesus, Yusuf pe ana laki-laki dari kampong Nazaret.”

2 Korintus 5:21

Yesus Kristus tara perna biking dosa, tapi Tuhan Allah so kase hukuman pa Dia untuk ganti pa torang yang berdosa, supaya torang yang percaya pa Yesus Kristus, Tuhan Allah biking torang jadi orang yang tara sala pa Dia pe muka.

1 Korintus 1:30

Barang, Tuhan Allah sandiri yang buka jalang untuk ngoni, supaya ngoni bole percaya pa Kristus Yesus. Deng bagitu, torang bole tau Tuhan Allah pe rencana yang bijaksana untuk kase slamat pa manusia. Yesus Kristus itu yang biking torang jadi orang yang tara sala pa Tuhan Allah pe muka deng yang biking torang jadi Dia pe umat, deng Yesus me yang tebus torang pe dosa-dosa.

Roma 9:30

Karna itu, torang bole bilang bagini: orang-orang yang bukang Yahudi, dorang tara berusaha supaya jadi orang yang butul pa Tuhan Allah pe muka. Tapi, biar bagitu, ada dari dorang yang percaya pa Yesus Kristus sampe Tuhan Allah biking dorang itu jadi orang yang tara sala pa Dia pe muka.

Roma 5:21

Dulu, dosa kuasai pa samua orang, jadi torang musti mati kong tapisa deng Tuhan Allah slama-lamanya. Tapi skarang, karna apa yang Yesus Kristus torang pe Tuhan so biking, Tuhan Allah kase Dia pe bae pa torang, Dia biking torang jadi orang yang tara sala pa Dia pe muka. Turus, karna Tuhan Allah pe bae itu, samua orang bole hidup deng Dia slama-lamanya.

Kisah Para Rasul 28:23

Abis itu, dorang tentukan satu hari lagi la mo baku dapa ulang deng Paulus. Pas hari itu, banya skali orang datang pa Paulus pe tampa tinggal. Pagi sampe sore, Paulus kase tau deng basaksi pa dorang tentang Tuhan Allah Berkuasa sebagai Raja pa Dia pe umat. Paulus me pake ayat-ayat yang ada di lima kitab Musa deng ayat-ayat di nabi-nabi laeng pe kitab supaya dorang mangarti kong percaya pa Yesus.

Roma 3:28

Jadi, ini dia pe maksut: Tuhan Allah biking torang manusia jadi orang yang tara sala pa Dia pe muka, bukang karna torang so iko aturan di lima kitab Musa, tapi karna tong so percaya pa Yesus Kristus.

2 Korintus 3:9

Kita pe maksut itu bagini. Aturan yang Tuhan Allah kase pa nabi Musa itu biking manusia tau dorang so biking dosa kong musti dapa hukum. Tapi kalu janji yang lama itu saja datang dari Tuhan Allah pe kuasa yang hebat, apalagi deng janji yang baru, pasti datang dari Tuhan Allah pe kuasa yang lebe hebat lagi, karna janji yang baru itu yang bole biking torang jadi tara sala pa Tuhan Allah pe muka.