Roma 2:10 - Perjanjian Baru Bahasa Melayu Maluku Utara

¹⁰ Tapi samua orang yang biking barang yang bae, nanti Tuhan Allah mo puji deng hormat pa dorang, deng Dia salalu biking dorang pe hati tetap tenang, bukang cuma pa orang-orang Yahudi saja, tapi pa orang-orang bukang Yahudi lagi.

Roma 2:10 Referans Kwoze

1 Petrus 1:7

Sengsara yang ngoni dapa itu jadi bukti, ngoni butul-butul percaya pa Tuhan. Itu sama deng mas yang kalu mo tau dia pe asli musti bakar dulu deng api. Tapi ngoni pe percaya lebe berharga dari mas, karna mas itu tara akan ada turus-turus. Kalu ngoni so lolos dari cobaan itu, nanti di hari kiamat, waktu Yesus Kristus datang ulang, Dia mo puji deng hormat pa ngoni.

Yakobus 3:13

Kalu dari ngoni ada yang pande deng tau ator samua, dia musti kase tunju itu deng dia pe cara hidup yang bae. Dia musti pake dia pe pande itu untuk biking hal-hal bae deng hati yang tara sombong.

Roma 8:6

Orang-orang yang hidup cuma iko manusia pe mau yang suka biking dosa, dorang itu nanti mo dapa hukum tapisa deng Tuhan Allah slama-lamanya. Tapi kalu orang-orang yang hidup iko Roh Kudus pe mau, dorang pe hati salalu rasa tenang. Deng dorang itu mo hidup deng Tuhan Allah slama-lamanya.

Roma 2:7

Ada orang yang biking barang yang bae turus, karna dorang suka dapa puji deng hormat dari Tuhan Allah, deng dorang suka hidup deng Tuhan Allah slama-lamanya. Jadi pa dorang itu, Tuhan Allah mo kase hidup deng Dia slama-lamanya.

Lukas 1:79

la kase sinar. Dia itu mo datang kase tarang pa orang-orang yang hidup dalam galap, deng pa orang-orang yang hidup deng rasa tako. Dia mo datang pa torang supaya torang tau jalang hidup yang biking torang pe hati salalu tenang.”

Yakobus 2:22

Abraham biking dua hal ini: dia percaya pa Tuhan Allah, deng dia lagi biking Tuhan Allah pe mau. Deng bagitu, Abraham pe percaya pa Tuhan Allah jadi sempurna.

Galatia 5:6

Karna untuk torang yang so sama-sama percaya pa Kristus Yesus, torang mo iko aturan sunat itu ka, tarada ka, itu tara penting, tapi yang paling penting torang pe percaya pa Yesus Kristus yang dapa lia dari torang pe sayang pa orang laeng.

Roma 5:1

Tuhan Allah so biking torang jadi orang yang tara sala pa Dia pe muka karna torang percaya pa Yesus Kristus. Jadi torang deng Tuhan Allah pe hubungan so bae-bae ulang karna apa yang torang pe Tuhan Yesus Kristus so biking.

Roma 2:9

Tuhan Allah akan kase hukuman pa samua orang yang suka biking barang yang jahat, sampe dorang sengsara deng menderita skali. Kong bukang cuma orang Yahudi saja, tapi orang-orang bukang Yahudi lagi me mo dapa hukuman.

Yohanes 16:33

Kita kase tau samua yang mo jadi itu, supaya ngoni bole hidup deng hati tenang, karna ngoni so percaya pa Kita. Di dunia ini ngoni mo rasa menderita karna mo dapa siksa, tapi kase kuat suda ngoni pe hati! Barang, Kita so kase kala samua kuasa di dunia ini.”

Filipi 4:7

Kalu ngoni biking bagitu, Tuhan Allah mo biking ngoni pe hati tetap tenang, hati tenang itu yang tara mungkin manusia mo mangarti. Rasa tenang itu akan salalu biking ngoni pe hati deng pikiran tenang, karna ngoni so satu hati deng Kristus Yesus.

Galatia 5:22

Tapi orang yang Roh Kudus kuasai itu dapa lia dari dorang pe hidup macam bagini: pangsayang, hati sanang, hati tenang, pangsabar, pangbae, biking barang yang bae, setia,

Roma 15:13

Tuhan Allah itu yang biking torang bole baharap deng yakin, apa yang Dia janji Dia akan biking. Karna itu, kita minta pa Tuhan Allah supaya Dia biking ngoni pe hati sanang deng hati tenang, karna ngoni so percaya pa Dia. Kita minta itu supaya Roh Kudus pe kuasa bakarja di ngoni pe hati untuk biking ngoni tatamba baharap deng yakin turus pa Tuhan Allah.

Roma 14:17

Karna kalu Tuhan Allah Berkuasa sebagai Raja pa torang pe hidup, yang penting itu bukang apa yang torang makang deng minum. Tapi Tuhan Allah mau torang hidup butul, baku bawa bae-bae, deng torang pe hati sanang karna Roh Kudus ada di torang pe hati.

Roma 9:23

Tuhan Allah sabar pa dorang supaya mo kase tunju Dia pe sayang yang luar biasa pa dorang yang Dia rasa kasiang. Dorang itu, Dia so pili dari dulu supaya dapa Dia pe sayang yang luar biasa itu.

Roma 9:21

Dia pe conto sama deng tukang biking pot, dia pe hak biking pot iko dia pe mau. Tana liat satu gumpal dia bisa biking pot dua. Pot yang satu, dia biking supaya mo pake di acara-acara penting, kong yang satu lagi, dia biking cuma mo pake di ruma.

Kisah Para Rasul 10:35

Tapi, Tuhan Allah tarima samua orang dari samua suku bangsa yang tako pa Dia deng yang jaga biking yang butul pa Dia pe muka.

Yohanes 12:26

Sapa yang suka biking apa yang Kita suru, dia musti iko pa Kita, kong di mana saja Kita ada, dia lagi musti ada di situ. Kong sapa yang biking apa yang Kita suru, Kita pe Bapa akan hormati pa dia.”

Lukas 22:14

Pas so dia pe waktu mo makang di hari raya itu, Yesus dudu makang sama-sama deng Dia pe murit-murit yang orang sebut rasul.

Lukas 19:42

Dia bilang, “Ado, kasiang, ngoni orang-orang Yerusalem! Kita paling harap suda, ngoni so mangarti apa yang ngoni musti biking supaya ngoni bole dapa dame. Tapi skarang so terlambat, itu so tasambunyi dari ngoni.

Lukas 12:37

Orang-orang karja itu paling sanang skali karna waktu dorang pe tuang pulang, dong pe tuang dapa riki dorang masi bajaga tunggu pa dia. Kita mo bilang pa ngoni: dorang itu paling sanang skali karna dong pe tuang akan pake baju karja kong siap-siap layani pa dorang. Turus dia mo suru dia pe orang-orang karja itu dudu la makang, kong nanti dia sandiri yang mo layani pa dorang.

Lukas 9:48

Turus, Dia bilang pa dorang, “Sapa yang tarima pa orang biasa-biasa saja sama deng ana kacil ini karna orang itu percaya pa Kita, itu sama deng dia so tarima pa Kita. Deng sapa yang tarima pa Kita, dia me tarima pa Tuhan Allah yang utus pa Kita. Karna sapa yang anggap dia pe diri biasa-biasa saja dari antara ngoni, dia itu suda yang Tuhan Allah anggap paling hebat.”

Matius 10:13

Kalu dorang tarima pa ngoni, berkat yang ngoni minta itu akan ada pa dorang. Tapi kalu dorang tara tarima pa ngoni, berkat yang ngoni minta itu tara jadi pa dorang.

1 Petrus 5:4

Nanti waktu Yesus Kristus yang jadi Gembala di atas samua gembala itu datang ulang, ngoni akan tarima hadia yang luar biasa yang tara akan ilang sampe slama-lamanya.

Yohanes 14:27

Skarang Kita mo pigi, tapi hati tenang yang ada pa Kita, Kita mo kase itu pa ngoni. Hati tenang yang Kita kase itu, dunia tara bisa mo kase pa ngoni. Jang ngoni hawater deng tako.

1 Timotius 1:17

Mari torang hormati pa Tuhan Allah. Dia itu Raja sagala jaman. Tarada yang bisa lia Dia, Dia ada slama-lamanya, deng Dia cuma satu saja. Puji deng hormat pa Dia sampe slama-lamanya. Amin.

Ibrani 2:7

Tapi Tuhan Allah so biking dia pe posisi cuma sadiki lebe randa dari malaekat-malaekat. Tapi itu cuma sementara saja. Tuhan Allah biking dia jadi hebat, kong dia dapa hormati sama deng raja.