Roma 15:1 - Perjanjian Baru Bahasa Melayu Maluku Utara

¹ Torang yang pe percaya so kuat pa Tuhan, torang musti sabar pa orang-orang yang pe percaya bolong kuat pa Tuhan. Jang torang cuma cari tong pe sanang sandiri.

Roma 15:1 Referans Kwoze

1 Tesalonika 5:14

Torang minta lagi pa ngoni, togor bae-bae pa orang yang pamalas supaya dong rajin bakarja, kase kuat orang yang panako pe hati supaya percaya butul-butul pa Tuhan, tolong orang yang perlu mo dapa tolong, deng sabar pa samua orang.

Roma 14:1

Ada orang-orang yang so percaya pa Tuhan tapi dorang pe percaya bolong kuat. Dorang itu bolong talalu tau bagimana mo hidup butul pa Tuhan Allah pe muka. Ngoni musti tarima pa dorang, jang baku malawang deng dorang tentang dong pe pendapat.

1 Korintus 9:22

Waktu kita sama-sama deng orang yang dong pe percaya pa Tuhan Yesus bolong kuat, kita batamang deng dorang kong tara biking apa-apa yang dong anggap tara bagus, supaya kita bole pengaru pa dorang la jadi percaya kuat pa Tuhan Yesus, biar cuma sadiki orang dari dorang yang iko.

1 Yohanes 2:14

Ana-ana, kita tulis surat ini pa ngoni, karna ngoni so kanal pa Tuhan Allah, torang pe Bapa. Bapa-bapa, kita tulis surat ini pa ngoni, barang ngoni so kanal pa Dia yang so ada dari dulu waktu dunia bolong ada. Kita me tulis surat ini pa ngoni pemuda-pemuda, karna ngoni pe percaya kuat, Tuhan Allah pe firman ada di ngoni pe hati, deng ngoni so kase kala pa Iblis, setang-setang pe raja.

2 Timotius 2:1

Timotius, ngana so sama deng kita pe ana sandiri! Kristus Yesus so kase Dia pe bae pa ngana, jadi pake itu untuk kase kuat ngana pe hati karna ngana so percaya pa Dia.

Roma 4:20

Abraham tetap percaya kong tara ragu deng Tuhan Allah pe janji. Mala dia pe percaya lebe tamba kuat, deng dalam dia pe hidup, dia salalu puji deng hormat pa Tuhan Allah.

Efesus 6:10

Ahirnya, kita mo bilang pa ngoni bagini, kase kuat suda ngoni pe hati deng Tuhan pe kuasa yang Dia so kase pa ngoni karna ngoni so satu hati deng Tuhan.

2 Korintus 12:10

Jadi, kita sanang saja, biar lagi kita rasa kita tara kuat, dapa siksa, menderita, dapa aniaya deng sengsara. Barang waktu kita tara kuat, waktu itu suda, Yesus Kristus biking kita mampo hadapi samua itu.

1 Korintus 4:10

Torang ini orang anggap bodo karna torang jaga kase tau tentang Yesus Kristus. Tapi ngoni, orang anggap ngoni pande, barang ngoni so percaya pa Yesus Kristus. Torang ini orang anggap tara ada pengaru, tapi ngoni, orang anggap Tuhan Allah pe kuasa basar ada pa ngoni. Ngoni dapa hormati dari orang-orang, tapi pa torang, orang hina-hina.

Roma 14:2

Ada conto bagini: orang yang pe percaya so kuat pa Tuhan, dorang itu so tau tarada makanang yang haram lagi. Tapi orang yang pe percaya bolong kuat pa Tuhan, dorang tako makang daging, dong cuma makang sayor saja.

Filipi 2:4

Jang ngoni cuma pikir diri sandiri saja, tapi ngoni musti pikir pa orang laeng lagi.