Roma 12:8 - Perjanjian Baru Bahasa Melayu Maluku Utara

⁸ Kalu Tuhan Allah so kase karunia pa torang untuk kase smangat orang, torang musti biking itu. Kalu Tuhan Allah so kase karunia pa torang untuk kase pa orang apa yang torang punya, torang musti kase itu deng tulus. Kalu Tuhan Allah so kase karunia pa torang untuk jadi pemimpin, torang musti bapimpin bae-bae. Kong kalu Tuhan Allah so kase karunia pa torang untuk kasiang la tolong pa orang yang susa, torang musti biking itu deng hati sanang.

Roma 12:8 Referans Kwoze

2 Korintus 9:7

Jadi, tiap orang musti kase apa yang dia sandiri so putuskan mo bakase. Jang bakase deng hati barát atau karna terpaksa. Barang, Tuhan Allah sayang pa orang yang bakase deng hati sanang.

1 Timotius 5:17

Penatua-penatua jemaat yang biking dong pe tugas deng butul, dorang itu pantas dapa hormati deng kase honor dua kali lipa, lebe-lebe lagi deng dorang yang rajin kase tau Kabar Bae dari Tuhan Allah deng mangajar di jemaat.

1 Korintus 12:28

Jadi Tuhan Allah so kase pa ngoni tiap-tiap orang di jemaat, dia pe tugas masing-masing macam bagini: pertama, ada Yesus Kristus pe utusan-utusan yang kase tau Kabar Bae pa orang-orang, dorang itu orang sebut rasul-rasul. Kedua, ada yang jaga kase turus Tuhan Allah pe pasáng, dorang itu orang sebut nabi-nabi. Ketiga, ada yang jadi guru yang kase ajar Tuhan pe ajaran. Turus, ada orang-orang yang Tuhan kase karunia untuk biking mujizat, yang laeng Dia kase karunia untuk kase sembu orang saki, yang laeng Dia kase karunia untuk tolong pa orang-orang, deng yang laeng lagi dapa karunia untuk pimpin Tuhan Allah pe jemaat. Kong ada lagi yang dapa karunia untuk bicara pake macam-macam bahasa yang Roh Kudus kase.

Ibrani 13:17

Ngoni musti dengar-dengaran pa ngoni pe pemimpin-pemimpin deng biking apa yang dorang parenta. Barang, dorang yang Tuhan Allah kase tugas untuk jaga ngoni pe percaya. Deng nanti dorang me musti tanggung jawab pa Tuhan Allah apa yang dong so biking itu. Ngoni musti dengar-dengaran pa dorang, la deng bagitu, dong bisa karja deng hati yang sanang. Tapi kalu ngoni tara dengar-dengaran pa dorang, dong pe hati susa, kong itu nanti biking ngoni rugi.

Kisah Para Rasul 15:32

Yudas deng Silas itu nabi yang jaga kase turus Tuhan Allah pe pasáng. Dorang dua banya kase nasehat pa orang-orang percaya di kota Antiokhia untuk kase kuat dorang pe hati deng untuk biking dorang pe percaya lebe tamba kuat.

Kisah Para Rasul 13:15

Di situ, ada orang yang baca lima kitab Musa deng kitab nabi-nabi. Pe abis babaca, pemimpin-pemimpin ruma ibada itu suru orang bilang pa Paulus deng pa Barnabas, “Bapa-bapa, kalu ada yang ngoni ingin bilang untuk kase kuat torang pe percaya, bicara suda skarang!”

Ibrani 13:24

Ngoni kase sampe tong pe salam pa samua ngoni pe pemimpin jemaat deng pa samua orang yang so jadi Tuhan Allah pe umat di situ. Sudara-sudara yang percaya di Italia me ada kirim salam pa ngoni.

Ibrani 13:22

Sudara-sudara, kita minta deng sunggu-sunggu supaya ngoni dengar bae-bae kita pe nasehat ini, biar lagi cuma pende saja kita pe surat ini.

Ibrani 13:7

Ngoni inga pa ngoni pe pemimpin-pemimpin yang so kase tau Tuhan Allah pe firman pa ngoni. Ngoni perhatikan waktu dong masi hidup sampe dong pe ahir hidup, kong ngoni iko suda dong pe percaya pa Tuhan Allah.

Ibrani 10:25

Kong jang torang pamalas bakumpul deng orang-orang percaya, sama deng babarapa orang percaya laeng jaga biking. Tapi mari suda torang bakumpul turus-turus la baku kase kuat torang pe percaya, lebe-lebe lagi karna torang tau Tuhan Yesus pe waktu mo datang ulang yang kedua kali so lebe dekat.

2 Korintus 8:12

Karna kalu ngoni bakase deng hati yang sanang, tamba lagi yang ngoni kase itu iko apa yang ngoni mampo bakase, Tuhan akan tarima apa yang ngoni kase itu. Dia tara perna minta torang kase lebe dari apa yang ada pa torang.

1 Korintus 14:3

Padahal, orang yang dapa karunia untuk kase turus Tuhan Allah pe pasáng pa orang-orang, dia itu bicara pa manusia, kong dia pe kata-kata itu dia pe guna untuk tamba kase kuat dorang pe percaya, untuk kase smangat pa dorang, deng untuk kase hibur pa dorang.

Kisah Para Rasul 20:28

Karna itu sudara-sudara, ngoni musti jaga bae-bae ngoni pe diri, deng jemaat yang Roh Kudus so kase pa ngoni untuk ngoni jaga. Ngoni jaga Tuhan Allah pe jemaat sama deng gembala yang jaga dia pe domba. Jemaat-jemaat itu so jadi Tuhan Allah punya, barang Dia pe Anak Yesus so mati di kayu salib untuk tebus pa torang.

Kisah Para Rasul 20:2

Di daera Makedonia, dia basingga-singga pa orang-orang percaya di kampong-kampong, kong kase banya nasehat pa dorang la dorang pe percaya lebe tamba kuat. Abis dari Makedonia, dia pigi di daera Yunani.

1 Timotius 4:13

Sementara ngana tunggu pa kita mo datang di Efesus, ngana musti rajin baca Kitab Suci untuk orang-orang percaya di situ. Ngana me musti kase smangat pa dorang supaya dorang lebe percaya pa Tuhan deng ajar pa dorang bae-bae.

1 Tesalonika 2:8

Torang sayang skali pa ngoni. Jadi torang bukang cuma sanang kase tau pa ngoni Kabar Bae dari Tuhan Allah, tapi torang lagi serakan tong pe hidup untuk ngoni, karna torang memang sayang skali pa ngoni.

1 Tesalonika 2:3

Torang kase tau Kabar Bae itu, supaya ngoni percaya pa Tuhan Yesus, kong yang torang kase tau itu, bukang ajaran yang tara butul. Torang tara maksut jahat deng tara mau kase foya orang.

Kolose 3:22

Bagitu lagi deng ngoni orang-orang karja yang ngoni pe tuang so bili, ngoni musti dengar-dengaran pa ngoni pe tuang di dunia ini dalam sagala hal. Jang ngoni dengar-dengaran pa ngoni pe tuang cuma untuk cari muka pa dia. Tapi ngoni bakarja deng sunggu-sunggu karna ngoni tako pa Tuhan.

Efesus 6:5

Ngoni orang-orang karja yang ngoni pe tuang so bili, ngoni musti dengar-dengaran pa ngoni pe tuang yang ada di dunia ini. Ngoni musti hormati deng tako pa dorang deng hati yang sunggu-sunggu, sama deng ngoni dengar-dengaran pa Yesus Kristus.

2 Korintus 11:3

Tapi kita tako jang sampe ada yang pengaru pa ngoni deng dong pe ajaran yang sala sampe ngoni so tara percaya lagi pa Yesus Kristus deng hati yang sunggu-sunggu. Itu sama deng Hawa dulu yang dapa tipu dari ular sampe malawang Tuhan Allah pe parenta karna ular pe putar bale itu.

2 Korintus 9:13

Jadi waktu ngoni kase doi sumbangan yang talebe-lebe itu, itu biking banya orang mo puji deng hormat pa Tuhan Allah karna dorang lia ngoni butul-butul percaya Kabar Bae tentang Yesus Kristus, deng karna dorang lia ngoni pe hati bae waktu ngoni bakase pa orang laeng.

2 Korintus 9:11

Tuhan Allah akan kase sagala macam berkat pa ngoni supaya ngoni me suka bakase talebe-lebe pa orang laeng. Kong nanti waktu torang antar ngoni pe doi sumbangan pa orang-orang percaya di Yerusalem, banya orang akan bilang tarimakasi banya pa Tuhan Allah.

2 Korintus 1:12

Sudara-sudara, yang biking torang pe hati sanang, itu karna tong pe dalam hati sandiri yang kase tau ini butul: torang pe kalakuang pa samua orang di dunia itu bae deng lebe-lebe lagi tong pe hubungan deng ngoni me bae. Torang pe hidup jujur, deng tong pe tujuan butul iko Tuhan Allah pe mau. Kong samua yang tong biking itu bukang karna tong iko manusia pe pande, tapi karna Tuhan Allah pe bae sampe tong mampo biking samua itu.

Roma 13:6

Itu dia pe sebab bikiapa sampe ngoni bayar pajak. Deng ngoni bayar pajak, ngoni biking pemerinta bole biking dong pe tugas yang Tuhan Allah so kase pa dorang.

Roma 12:13

Ngoni musti tolong pa orang-orang yang so jadi Tuhan Allah pe umat yang pe hidup kekurangan. Kong ngoni musti tarima pa orang-orang di ngoni pe ruma deng hati sanang.

Matius 25:40

Kong nanti Raja itu akan bilang pa dorang bagini, ‘Inga bae-bae yang Kita bilang pa ngoni ini, samua yang ngoni biking untuk tolong pa satu orang dari Kita pe sudara-sudara yang orang anggap tara penting, itu sama deng ngoni so biking untuk Kita.’

Kisah Para Rasul 13:12

Waktu gubernur dapa lia itu, dia jadi percaya pa Tuhan. Dia me taherang-herang deng ajaran tentang Tuhan itu.

Kisah Para Rasul 4:36

Kong itu lagi yang Yusuf biking. Yusuf itu dari suku Lewi, lahir di pulo Siprus. (Rasul-rasul itu kase nama pa dia ‘Barnabas’, yang pe arti, ‘orang yang suka kase smangat pa orang laeng.’)

Kisah Para Rasul 11:23

Waktu Barnabas sampe di sana, dia lia memang Tuhan Allah so kase Dia pe bae sampe banya orang so jadi percaya pa Yesus. Pe lia itu, dia sanang skali. Turus, dia kase smangat pa dorang supaya dorang sunggu-sunggu tetap setia pa Tuhan Yesus.

1 Timotius 6:18

Kase inga pa orang-orang kaya itu supaya dorang biking banya barang yang bae. Dorang musti suka kase pa orang-orang apa yang dorang perlu, deng apa yang ada pa dorang musti kase bage-bage pa orang-orang deng sanang hati.