Roma 12:3 - Perjanjian Baru Bahasa Melayu Maluku Utara

³ Tuhan Allah kase Dia pe bae pa kita, sampe Dia so pili pa kita. Karna itu, kita kase nasehat pa ngoni bagini: jang ngoni pikir tinggi-tinggi tentang ngoni pe diri. Tapi lebe bae ngoni pikir yang pas tentang ngoni pe diri, iko ngoni pe percaya yang Tuhan Allah so kase pa ngoni satu-satu.

Roma 12:3 Referans Kwoze

Galatia 6:3

Karna kalu ada orang yang pikir kata, dia pe diri itu lebe penting dari orang laeng, padahal tara bagitu, dia itu so kase foya pa dia pe diri sandiri.

1 Petrus 5:5

Bagitu lagi deng ngoni yang masi muda, ngoni musti dengar-dengaran pa orang-orang yang lebe tua. Ngoni samua musti baku bantu deng jang basombong satu deng yang laeng, karna ada tatulis di Kitab Suci bagini, “Tuhan Allah tara suka deng orang yang sombong, tapi Dia kase Dia pe bae pa orang yang tara sombong.”

Roma 12:16

Ngoni musti hidup satu hati deng ngoni pe sudara-sudara yang percaya. Jang basombong tapi musti batamang deng sapa saja, biar orang itu orang laeng anggap dia tara arti. Kong jang ngoni anggap ngoni pe diri so pande!

1 Petrus 5:8

Ngoni musti kuasai ngoni pe diri deng bajaga-jaga! Barang Iblis, yang jadi ngoni pe musu itu, dia sama deng singa yang bajalang kasana-kamari bacari makanang la mo talang manta-manta.

1 Petrus 4:7

Hari kiamat so dekat. Karna itu, ngoni musti kuasai ngoni pe diri, deng ngoni pe pikiran musti tenang supaya ngoni bisa berdoa.

Yakobus 4:6

Tapi untung bae Tuhan Allah kase Dia pe bae pa torang lebe basar. Jadi Dia bilang bagini, “Tuhan Allah tara suka deng orang yang sombong, tapi Dia kase Dia pe bae pa orang yang tara sombong.”

1 Petrus 4:11

Ambe conto bagini, kalu ada orang yang dapa karunia untuk kase tau Tuhan Allah pe firman pa orang-orang, dia musti pake karunia itu supaya orang mangarti Tuhan Allah pe firman. Kalu ada orang yang dapa karunia untuk bantu pa orang, dia pake karunia yang dia pe kekuatan dari Tuhan Allah itu untuk tolong pa orang. Jadi, pake karunia yang ada pa ngoni itu bae-bae la orang bole puji deng hormat pa Tuhan Allah. Tuhan Allah dapa puji karna ngoni itu Yesus Kristus pe umat. Tuhan Allah itu memang hebat deng Dia pe kuasa ada sampe slama-lamanya. Amin.

1 Korintus 7:17

Tiap orang percaya musti hidup iko apa yang Tuhan Yesus so kase pa dia, jadi dia bole hidup bagitu turus, sama deng waktu Tuhan Allah pangge pa dia untuk jadi percaya. Itu suda parenta yang kita kase ajar di tiap jemaat yang kita pigi.

Titus 2:12

Tuhan kase Dia pe bae itu, biking torang jadi sadar la kase tinggal torang pe kalakuang yang tara iko Tuhan Allah pe mau deng yang cuma iko dunia pe mau. Deng bagitu torang mampo kuasai diri dalam sagala hal, jadi orang yang hidup butul pa Tuhan Allah pe muka, deng setia pa Dia di dunia skarang ini.

Titus 2:2

Ngana kase ajar pa laki-laki yang so tua supaya dorang mampo batahang diri, deng dong pe kalakuang musti bae yang biking orang hormati pa dorang. Dorang musti tau bawa diri bae-bae, percaya kuat pa Tuhan, deng sayang pa orang laeng. Biar susa me, dorang musti tetap iko pa Tuhan.

2 Korintus 12:7

Jadi supaya kita tara jadi sombong deng penglihatan-penglihatan yang hebat itu, Tuhan Allah kase biar setang, Iblis pe ana bua kase sengsara pa kita deng panyake satu. Panyake itu bole kase sama deng duri yang tabiar pa kita pe dalam badan, kong panyake itu biking kita menderita supaya kita jang jadi sombong.

Roma 11:20

Memang, banya orang Yahudi yang Tuhan Allah so buang, itu karna dorang tara percaya. Tapi ngoni orang yang bukang Yahudi, Tuhan Allah tarima pa ngoni karna ngoni percaya pa Dia. Jadi ngoni tara bole basombong, tapi ngoni musti tako pa Tuhan Allah!

Roma 1:5

Kong karna Yesus Kristus itu, Tuhan Allah kase Dia pe bae pa kita sampe Dia pili pa kita jadi rasul untuk kase tau Kabar Bae tentang Yesus Kristus pa samua suku bangsa, supaya samua orang bole percaya, deng bole iko Yesus Kristus pe mau.

1 Petrus 1:13

Jadi karna ngoni so tau Kabar Bae itu, ngoni musti siap biking hal-hal yang bae, ngoni musti kuasai ngoni pe diri, deng ngoni musti baharap deng yakin Tuhan akan kase Dia pe bae pa ngoni waktu Yesus Kristus datang ulang.

Titus 2:4

Deng bagitu, dorang bole kase ajar pa parampuang-parampuang yang masi muda supaya sayang dong pe laki deng dong pe ana-ana,

1 Korintus 15:10

Tapi kita jadi rasul skarang, cuma karna Tuhan Allah pe bae pa kita. Deng Dia pe bae itu tara parcuma. Mala dari samua rasul, yang karja karas itu kita. Tapi samua karja itu kita mampo biking bukang karna kita pe kemampuan sandiri, tapi karna Tuhan Allah pe bae pa kita.

Yohanes 3:34

Barang, Dia yang Tuhan Allah utus, Dia itu yang kase tau Tuhan Allah pe kata-kata, karna Tuhan Allah kase Dia pe Roh pa Dia tara abis-abis.

Efesus 4:16

Kong Dia yang biking torang yang percaya jadi satu, sama deng torang ini satu badan: torang ini sama deng Dia pe kaki, tangan, deng samua-samua yang ada pa Dia pe badan. Dia pe kuasa ada pa torang samua, jadi kalu torang masing-masing biking tong pe tugas yang Dia so kase, kuasa itu biking torang lebe hari lebe tamba baku sayang deng lebe tamba baku kase kuat torang pe percaya.

Lukas 18:11

Orang dari aliran Farisi itu badiri basandiri kong dia berdoa bagini, ‘Ya Tuhan Allah, kita bilang tarimakasi, karna kita bukang orang berdosa sama deng orang laeng. Kita ini bukang orang yang suka rampas orang laeng pe barang, kita bukang orang yang tara butul, kita bukang orang yang jaga baku suka deng orang pe bini, deng kita bukang lagi sama deng tukang tagi pajak ini.

Titus 2:6

Bagitu lagi deng laki-laki yang masi muda, kase nasehat pa dorang supaya dorang kuasai dorang pe hidup dalam sagala hal.

1 Timotius 2:15

Biar bagitu me, Tuhan Allah akan kase slamat pa parampuang-parampuang waktu dorang melahirkan, asal parampuang itu tetap percaya pa Yesus Kristus, sayang pa orang laeng, hidup deng hati bersi pa Tuhan Allah pe muka, deng dia pe cara hidup musti sederhana.

1 Timotius 2:9

Bagitu lagi deng parampuang. Kita mau dorang pake baju yang sederhana, yang pantas deng sopan. Dorang tara perlu bagaya yang lebe-lebe macam deng pake mas, mutiara, atau pakeang mahal-mahal, atau rambu yang macam-macam.

1 Timotius 1:14

Mala, torang pe Tuhan kase Dia pe bae pa kita talebe-lebe, sampe kita jadi percaya pa Dia, deng jadi sayang pa orang laeng. Samua itu karna kita so hidup satu hati deng Kristus Yesus.

Efesus 3:4

Kong kalu ngoni baca surat ini, ngoni akan mangarti Tuhan Allah pe rencana tentang Yesus Kristus itu sama deng yang kita tau.

2 Korintus 12:13

Tapi cuma satu hal yang kita tara biking pa ngoni pe jemaat yang utusan laeng ada biking itu, kita tara minta ngoni tanggung kita pe perlu hari-hari. Apa kita pe perlu hari-hari musti jadi beban pa ngoni la jadi bukti kita me Tuhan Yesus pe utusan? Kong apa kita musti minta maaf pa ngoni karna itu? Tarada to?

1 Korintus 3:10

Tuhan Allah pe bae pa kita sampe Dia pili pa kita jadi Dia pe utusan, kong kita yang pertama kase tau Kabar Bae tentang Yesus Kristus pa ngoni. Deng bagitu, kita sama deng tukang yang tau skali kase badiri ruma, kita yang biking ruma pe fandasi. Turus, orang laeng datang ajar pa ngoni. Itu sama deng dong kase turus bangun ruma di atas fandasi itu. Tapi tiap orang yang mangajar, musti perhatikan bae-bae apa yang dia ajar itu. Itu sama deng tukang yang musti perhatikan bae-bae apa yang dia mo bangun di atas fandasi itu.

Roma 11:25

Sudara-sudara yang percaya yang bukang orang Yahudi, kita mo kase tau pa ngoni Tuhan Allah pe rencana yang bolong ada orang yang tau. Kita mo kase tau supaya jang ngoni baanggap diri pande. Ini Tuhan Allah pe rencana: biar skarang banya orang Yahudi tara mo percaya pa Yesus Kristus, tapi dorang tara akan bagitu turus. Dorang pe kapala batu itu cuma sampe di waktu samua orang bukang Yahudi yang Tuhan Allah so pili jadi percaya.

3 Yohanes 1:9

Kita so perna tulis surat sadiki untuk jemaat di situ, tapi Diotrefes tara mau dengar pa kita, barang dia suka skali jadi tuang basar di jemaat.

Kolose 2:13

Dulu waktu ngoni bolong percaya pa Tuhan, ngoni jaga langgar Tuhan Allah pe parenta, jadi Tuhan Allah lia pa ngoni sama deng orang yang so mati. Ngoni me tara dapa sunat karna ngoni bukang orang Yahudi, jadi ngoni bukang Tuhan Allah pe umat. Tapi skarang, karna Yesus Kristus so mati deng so hidup ulang, Dia so kase ampun ngoni pe dosa-dosa deng so kase pa ngoni hidup yang baru.

Kolose 1:29

Karna itu, kita berusaha sunggu-sunggu biking kita pe karja ini pake kekuatan yang luar biasa, yang Yesus Kristus kase pa kita.

Efesus 3:2

Pasti ngoni so dengar, Tuhan Allah pe bae pa kita sampe Dia so kase tugas pa kita untuk kase tau Kabar Bae tentang Yesus Kristus pa ngoni.

2 Korintus 10:13

Tapi torang tara bagitu. Torang cuma sanang deng karja yang Tuhan Allah kase pa torang untuk kase tau Kabar Bae di torang pe wilaya karja, bukang di orang laeng pe wilaya karja. Kong ngoni itu termasuk torang pe wilaya karja,

Filipi 2:13

Barang, Tuhan Allah sandiri yang bakarja di ngoni pe hati, supaya ngoni mau deng mampo iko apa yang Dia ingin ngoni biking.