Roma 12:1 - Perjanjian Baru Bahasa Melayu Maluku Utara

¹ Sudara-sudara, Tuhan Allah bagitu kasiang pa torang. Karna itu, kita minta butul-butul pa ngoni: serakan suda ngoni pe diri pa Tuhan Allah untuk iko Dia pe mau, itu sama deng ngoni pe hidup so jadi korban persembahan pa Dia. Ngoni kase ngoni pe hidup jadi Dia punya, deng ngoni hidup untuk biking Dia pe hati sanang. Itu baru bilang ngoni pe ibada itu butul.

Roma 12:1 Referans Kwoze

1 Petrus 2:5

Turus ngoni ini me sama deng batu yang hidup, batu yang Tuhan Allah pake untuk kase badiri Dia pe tampa tinggal. Itu berarti, Tuhan Allah pe Roh Kudus mo tinggal pa ngoni orang-orang yang percaya pe tenga-tenga. Deng ngoni me so jadi sama deng imam-imam yang pe hati bersi pa Tuhan Allah pe muka, jadi ngoni kase persembahan iko Tuhan Allah pe mau. Kong Tuhan Allah sanang tarima ngoni pe persembahan itu karna apa yang Yesus Kristus so biking untuk torang samua.

Roma 6:13

Deng tara bole ngoni kase biar ngoni pe tangan, kaki deng samua-samua yang ada pa ngoni pe badan untuk dosa kuasai supaya biking barang yang jahat. Tapi ngoni kase ngoni pe diri pa Tuhan Allah supaya biking barang yang butul, karna ngoni sama deng orang yang so mati, kong skarang Dia so kase pa ngoni hidup yang baru. Ngoni kase biar suda ngoni pe tangan, kaki, deng samua-samua yang ada di ngoni pe badan untuk Tuhan Allah pake supaya mo biking barang yang butul.

Roma 6:19

Kita pake conto suru-suru, supaya ngoni bole capat mangarti yang kita bilang itu. Dulu, dosa so jadi ngoni pe tuang yang suru-suru pa ngoni. Ngoni so iko ngoni pe napsu sampe biking hal-hal kotor deng ngoni pe badan, deng ngoni malawang turus-turus Tuhan Allah pe parenta. Tapi skarang, ngoni musti serakan ngoni pe diri jadi Tuhan Allah pe suru-suru supaya ngoni biking turus yang butul pa Tuhan Allah pe muka. Deng bagitu, Tuhan Allah biking ngoni jadi Dia pe umat yang hidup cuma biking Dia pe mau.

Roma 12:2

Jang ngoni iko dunia ini pe mau. Lebe bae ngoni kase biar la Tuhan Allah ruba ngoni pe pikiran jadi baru supaya ngoni pe kalakuang me beruba. Karna deng ngoni pe pikiran yang baru, ngoni bole tau Tuhan Allah pe mau: yang bagus, yang butul, deng yang biking Dia pe hati sanang.

Efesus 4:1

Sudara-sudara, karna Tuhan so kase Dia pe bae yang basar itu pa torang, jadi ini nasehat dari kita yang skarang ada di penjara gara-gara kita jaga biking apa yang Tuhan suru. Tuhan so pangge pa ngoni la iko pa Dia, jadi kita bilang pa ngoni supaya ngoni hidup butul sama deng yang pantas untuk orang yang so iko pa Dia.

Roma 6:16

Ngoni tau to, kalu ngoni serakan ngoni pe diri pa satu orang untuk iko apa yang dia suru, ngoni itu so jadi dia pe suru-suru. Bagitu lagi, kalu ngoni jaga iko ngoni pe mau yang jahat, itu berarti, dosa itu so jadi tuang pa ngoni, kong dia suru-suru pa ngoni, deng bagitu ngoni mo mati kong tapisa deng Tuhan Allah slama-lamanya. Tapi kalu ngoni dengar-dengaran pa Tuhan Allah, itu berarti, ngoni so kase ngoni pe diri jadi Tuhan Allah pe suru-suru, kong Dia biking ngoni jadi orang yang tara sala pa Dia pe muka.

2 Korintus 4:16

Kong karna torang tau Tuhan akan kase kuat pa torang, torang tara ilang smangat waktu kase tau Kabar Bae tentang Yesus Kristus. Tiap hari torang pe badan lebe tara kuat deng saki lagi, tapi biar bagitu me, tong pe hati lebe hari lebe tamba percaya deng lebe kuat.

1 Tesalonika 4:1

Sudara-sudara, torang so kase ajar pa ngoni cara hidup untuk biking sanang Tuhan Allah pe hati, kong ngoni so hidup sama deng itu. Tapi skarang karna torang samua so satu hati deng Tuhan Yesus, torang minta supaya ngoni lebe tamba berusaha biking sanang Tuhan Allah pe hati.

2 Korintus 5:20

Jadi torang biking tong pe tugas itu, Yesus Kristus yang utus pa torang. Torang kase tau tentang Dia, itu sama deng Tuhan Allah sandiri yang bicara pa ngoni pake torang pe kata-kata. Deng Yesus Kristus pe kuasa, tong dua minta supaya ngoni kase ngoni pe diri suda pa Tuhan Allah la Dia biking ngoni pe hubungan jadi bae-bae ulang deng Dia.

Efesus 5:10

Deng ngoni lagi musti berusaha cari tau apa saja yang biking Tuhan Allah pe hati sanang.

Filipi 2:17

Dulu waktu pertama kita kase tau Kabar Bae tentang Yesus Kristus pa ngoni, ngoni jadi percaya deng ngoni kase ngoni pe diri untuk biking Dia pe mau. Jadi biar lagi orang mo bunu pa kita nanti gara-gara kita so kase tau Kabar Bae, itu tara apa-apa. Barang, itu sama deng kita pe dara so tatumpa untuk jadi korban persembahan pa Tuhan Allah. Jadi biar kita pe dara tatumpa sampe mati, kita pe hati tetap sanang deng kita rasa sanang sama-sama deng ngoni samua.

1 Korintus 1:10

Sudara-sudara, karna kita ini torang pe Tuhan Yesus Kristus pe utusan, jadi kita minta pa ngoni samua supaya ngoni baku dengar satu deng yang laeng. Ngoni tara bole tapisa satu deng yang laeng, tapi ngoni musti tetap jadi satu, satu pikiran deng satu tujuan.

Roma 2:4

Ngoni so tau Tuhan Allah pe hati itu bae skali, Dia itu sabar deng Dia pe sayang itu tara abis-abis. Tapi jang ngoni pandang enteng kong bilang kata, ngoni so butul jadi tara usa suda ngoni bertobat. Pasti ngoni so tau, Tuhan Allah pe sabar deng pe bae pa ngoni itu ada dia pe maksut, Dia mau supaya ngoni bertobat.

1 Petrus 2:20

Barang, kalu ngoni menderita karna biking dosa, apa dia pe untung? Tarada to? Tapi kalu ngoni menderita karna biking barang yang bae kong ngoni tetap sabar, Tuhan Allah pasti kase Dia pe bae pa ngoni.

Filipi 4:18

Skarang kita so tarima samua yang kita perlu dari ngoni, mala so talebe-lebe lagi. Samua itu Epafroditus yang bawa. Apa yang ngoni kase pa kita, itu biking Tuhan Allah pe hati sanang, kong apa yang ngoni kase itu pantas Tuhan Allah tarima, sama deng dulu orang bakar binatang korban persembahan yang bobou sadap pa Tuhan Allah.

2 Korintus 6:1

Torang deng Tuhan Allah karja sama-sama untuk kase tau Kabar Bae tentang Yesus Kristus pa orang-orang. Ngoni ini so tarima Tuhan Allah pe bae waktu Yesus Kristus dapa salib, jadi torang minta pa ngoni, jang kase sia-sia Tuhan Allah pe bae itu.

Roma 15:30

Sudara-sudara, torang so percaya pa Yesus Kristus torang pe Tuhan, deng Roh Kudus me bakarja di torang pe hati sampe torang bole baku sayang satu deng yang laeng. Karna itu, kita minta pa ngoni supaya ngoni turus-turus berdoa untuk kita pa Tuhan Allah.

Roma 15:16

Dia pangge pa kita jadi Yesus Kristus pe utusan untuk kase tau Kabar Bae dari Tuhan Allah pa orang-orang yang bukang Yahudi. Kita pe tugas itu kita kase sama deng orang Yahudi pe imam pe tugas, karna kalu kita kase tau Kabar Bae itu pa orang bukang Yahudi kong dorang jadi percaya pa Yesus, itu kita so kase sanang Tuhan Allah pe hati, sama deng imam kase binatang korban persembahan pa Tuhan Allah. Kong Tuhan Allah tarima pa dorang karna Roh Kudus so biking dong jadi Tuhan Allah pe umat sandiri.

Filipi 1:20

Kong yang butul-butul kita ingin deng harap itu, kita barani biking apa saja yang Yesus Kristus suru pa kita, sama deng yang kita so biking dari dulu, supaya kita tara biking apa-apa yang biking malu kita pe diri. Yang penting itu Yesus Kristus dapa puji deng hormat dalam kita pe hidup, waktu kita masi hidup atau kita so mati.

1 Timotius 2:3

Kalu torang berdoa untuk samua orang, itu yang bagus, deng yang biking Tuhan Allah sanang. Dia itu yang kase slamat pa torang,

1 Tesalonika 5:12

Sudara-sudara, torang minta supaya ngoni hormati orang-orang yang Tuhan so pili untuk pimpin pa ngoni. Dorang itu yang karja karas di ngoni pe jemaat, deng dong lagi yang kase nasehat pa ngoni supaya ngoni tetap percaya pa Tuhan.

Lukas 7:47

Karna itu, dengar bae-bae e, parampuang ini pe dosa yang banya itu so dapa ampun. Kong karna dia so dapa ampun, dia kase tunju dia pe sayang yang basar pa Kita. Tapi kalu orang yang pe dosa cuma sadiki, cuma sadiki lagi dia kase tunju dia pe sayang, karna cuma sadiki dia pe dosa yang dapa ampun.”

Ibrani 13:22

Sudara-sudara, kita minta deng sunggu-sunggu supaya ngoni dengar bae-bae kita pe nasehat ini, biar lagi cuma pende saja kita pe surat ini.

1 Timotius 5:4

Tapi kalu janda yang ada ana atau cucu, ana deng cucu itu yang musti urus pa dia. Dorang musti balajar la balas dorang pe orang tua pe bae pa dorang. Deng biking bagitu, dorang so biking sanang Tuhan Allah pe hati.

1 Tesalonika 4:10

Kong ngoni memang so sayang pa samua sudara yang percaya di seluru daera Makedonia. Tapi sudara-sudara, biar bagitu, kita minta pa ngoni supaya ngoni lebe tamba sayang pa orang-orang.

Roma 9:23

Tuhan Allah sabar pa dorang supaya mo kase tunju Dia pe sayang yang luar biasa pa dorang yang Dia rasa kasiang. Dorang itu, Dia so pili dari dulu supaya dapa Dia pe sayang yang luar biasa itu.

2 Korintus 4:1

Karna Tuhan Allah pe sayang pa torang, Dia pili pa torang untuk kase tau Kabar Bae tentang Yesus Kristus pa orang-orang. Kong karna itu, torang tara ilang smangat waktu biking tugas ini.

2 Korintus 10:1

Kita Paulus, minta pa ngoni supaya ngoni dengar bae-bae yang kita mo bilang ini. Ada dari ngoni yang bilang, kita tara barani togor karas pa ngoni waktu kita ada sama-sama deng ngoni. Kata, kita cuma barani togor karas waktu torang baku jao pake surat. Tapi skarang, sama deng Yesus Kristus pe sifat yang tara sombong deng tara kasar,

Filemon 1:9

Tapi kita inga ngana pe sayang pa orang-orang percaya. Karna itu, kita tara mo suru-suru pa ngana, tapi kita lebe suka minta pa ngana. Kita ini so tua, deng apalagi skarang kita me ada dapa kase maso dalam penjara karna kita kase tau tentang Kristus Yesus pa orang-orang.

Filemon 1:10

Kita minta tolong pa ngana tentang Onesimus, ngana pe orang karja yang ngana bili itu. Waktu dia datang lia pa kita di dalam penjara, kita kase tau pa dia tentang Tuhan Yesus kong dia so jadi percaya. Karna itu, kita so anggap dia sama deng kita pe ana sandiri.