Roma 1:21 - Perjanjian Baru Bahasa Melayu Maluku Utara

²¹ Dorang so tau Tuhan Allah itu ada, tapi dorang tara puji deng hormat pa Dia. Dorang me tara bilang tarimakasi pa Dia. Dorang so tara pikir tentang Dia tapi dorang cuma pikir barang yang tarada dia pe guna, deng dong pe hati so tara mangarti apa yang butul.

Roma 1:21 Referans Kwoze

2 Timotius 3:2

Hari-hari itu, orang-orang cuma sayang dorang pe diri sandiri, deng dong pe doi. Dorang suka bicara tinggi deng sombong. Dorang suka kase tara bae orang pe nama, malawang pa dong pe orang tua, deng tara tau batarimakasi. Dorang sama skali tara mau iko Tuhan pe mau.

Wahyu 14:7

Malaekat itu bicara kuat-kuat bagini, “Ngoni musti tako pa Tuhan Allah kong puji deng hormat pa Dia! Karna dia pe waktu so sampe, Dia mo adili samua orang deng kase hukum pa dorang yang tara iko pa Dia. Semba suda pa Dia! Dia yang biking langit, bumi, laut deng samua mata aer.”

Yohanes 3:19

Tuhan Allah so sadia hukuman itu karna bagini: Anak Allah datang di dunia ini untuk kase tarang manusia pe hati, tapi manusia lebe suka galap daripada tarang, karna manusia pe kalakuang jahat.

Wahyu 15:4

Samua orang pasti akan tako pa Tuhan, kong puji deng hormat Tuhan pe nama. Barang cuma Tuhan saja yang kudus. Samua suku mo datang kong berlutut untuk semba pa Tuhan. Karna samua orang so lia apa yang Tuhan biking itu butul.”

1 Petrus 2:9

Tapi ngoni ini suda yang Tuhan Allah so pili jadi Dia pe umat, kong biking ngoni jadi sama deng imam yang jaga layani pa Dia yang jadi torang pe Raja. Dia kase pisa pa ngoni dari samua orang untuk jadi Dia pe umat sandiri, kong ngoni jadi Dia pe rakyat yang pe hati bersi pa Dia pe muka. Ngoni jadi bagitu, supaya ngoni bole kase tau pa orang-orang hal-hal luar biasa yang Dia so biking. Dia itu suda yang so pangge pa ngoni kaluar dari galap, maso pa Dia pe tarang yang luar biasa.

Roma 11:10

Kase biar dorang tara tau apa-apa sampe dong tara tau jalang yang butul, itu sama deng dong pe mata so kabur sampe tara bisa lia apa-apa. Kong kase biar la dorang tanggung turus dong pe hukuman sampe dong rasa sengsara, sama deng orang yang ada pikul barang di balakang sampe dia bongko.”

Roma 1:28

Deng karna dorang rasa dong tara perlu tau tentang Tuhan Allah, jadi Tuhan Allah kase biar dorang pe pikiran yang tara guna itu kuasai pa dorang. Dia pe ahir kabawa, dorang biking barang yang tara pantas dong biking.

Roma 1:19

Dorang tara alasan mo bela dong pe diri, karna sebenarnya dorang bisa tau ada Tuhan Allah yang berkuasa. Barang, Tuhan Allah sandiri so biking jelas pa dorang tentang sapa Dia.

Roma 15:9

Deng, Yesus Kristus datang di dunia untuk orang-orang yang bukang Yahudi lagi karna Tuhan Allah rasa kasiang pa dorang, supaya dorang me bole puji deng hormat pa Tuhan Allah. Tuhan Allah janji nanti orang-orang Yahudi mo puji pa Dia sama-sama deng orang-orang yang bukang Yahudi. Itu sama deng Tuhan Allah pe nabi tulis di Kitab Suci bagini, “Kita mo puji-puji pa Tuhan Allah di orang-orang yang bukang Yahudi pe tenga-tenga. Deng kita mo manyanyi untuk puji Tuhan Allah pe nama.”

Kisah Para Rasul 26:18

Ngana ka sana untuk buka dorang pe pikiran supaya dorang tara hidup lagi di galap tapi hidup di tarang, supaya dorang talapas dari Iblis, setang-setang pe raja pe kuasa, kong Tuhan Allah pe kuasa mo ada sama-sama deng dorang. Kong karna dorang so percaya pa Kita, dorang pe dosa-dosa mo dapa ampun deng dorang mo dapa samua yang Tuhan Allah janji mo kase pa orang-orang yang Dia so biking jadi Dia pe umat.’

1 Petrus 1:18

Barang ngoni tau, Tuhan Allah bayar mahal supaya ngoni dapa bebas dari ngoni pe cara hidup yang lama yang tara ada dia pe guna. Cara hidup yang lama itu yang ngoni tarima dari ngoni pe orang tua dulu-dulu. Tuhan Allah bayar mahal supaya ngoni bole bebas, itu Dia tara bayar deng barang yang nanti mo rusak macam deng mas atau perak,