Matius 6:10 - Perjanjian Baru Bahasa Melayu Maluku Utara

¹⁰ Torang minta Bapa datang la Berkuasa sebagai Raja pa torang pe hidup. Deng biar samua Bapa pe mau jadi di dunia ini, sama deng yang so jadi di sorga.

Matius 6:10 Referans Kwoze

Ibrani 10:36

Karna itu, ngoni musti batahang percaya biar dapa siksa, supaya kalu ngoni so biking apa yang Tuhan Allah mau, ngoni mo tarima apa yang Dia so janji itu.

Yohanes 4:34

Yesus bilang pa dorang, “Kita pe makanang itu, Kita biking apa yang Tuhan Allah mau. Tuhan Allah itu yang utus pa Kita deng Kita musti kase abis Kita pe karja yang Dia suru Kita biking.

Matius 26:42

Abis itu, Yesus pigi berdoa lagi yang kedua kali. Dia berdoa bagini, “Ya Bapa, kalu penderitaan ini memang Kita musti dapa, biar suda Bapa pe mau yang jadi!”

Matius 12:50

Karna sapa saja yang biking Kita pe Bapa di Sorga pe mau, dia itu suda Kita pe sudara laki-laki, dia itu suda Kita pe sudara parampuang, deng dia itu suda Kita pe mama.”

1 Tesalonika 5:18

Ada apa saja, mo susa ka sanang ka, ngoni musti bilang tarimakasi turus pa Tuhan Allah. Barang, itu Tuhan Allah pe mau untuk samua orang yang percaya pa Kristus Yesus.

Roma 12:2

Jang ngoni iko dunia ini pe mau. Lebe bae ngoni kase biar la Tuhan Allah ruba ngoni pe pikiran jadi baru supaya ngoni pe kalakuang me beruba. Karna deng ngoni pe pikiran yang baru, ngoni bole tau Tuhan Allah pe mau: yang bagus, yang butul, deng yang biking Dia pe hati sanang.

Yohanes 6:40

Barang, ini yang Kita pe Bapa mau: Dia mau supaya tiap orang yang lia pa Dia pe Anak kong percaya pa Anak itu, dorang itu mo dapa hidup deng Tuhan Allah slama-lamanya, deng nanti di hari kiamat, Kita mo kase hidup ulang pa dorang.”

Kolose 1:9

Jadi, mulai dari torang dengar tentang ngoni pe percaya itu, torang tara berenti-berenti berdoa untuk ngoni. Torang minta pa Tuhan Allah, supaya Dia pe Roh Kudus buka ngoni pe pikiran deng biking ngoni lebe mangarti tentang Tuhan Allah, supaya ngoni butul-butul tau Dia pe mau.

Efesus 6:6

Jang ngoni dengar-dengaran cuma waktu ngoni pe tuang ada lia-lia saja, la ngoni dapa puji. Tapi ngoni musti dengar-dengaran pa dorang, karna ngoni itu so kase ngoni pe diri jadi Yesus Kristus pe orang-orang karja, kong ngoni musti biking apa yang Tuhan Allah mau deng hati yang sunggu-sunggu.

Matius 7:21

Yesus bilang lagi, “Tara samua orang yang pangge pa Kita, ‘Tuhan, Tuhan’ akan jadi Kita pe umat kong Tuhan Allah Berkuasa sebagai Raja pa dorang pe hidup, tapi cuma orang yang jaga biking Kita pe Bapa di sorga pe mau saja.

1 Petrus 2:15

Barang, Tuhan Allah pe mau ngoni biking barang yang bae, supaya orang yang tara tau apa-apa tara barani lagi mo bicara tara bae tentang ngoni, karna so jelas yang dorang mo bicara itu tara butul.

Ibrani 13:21

supaya Dia kase pa ngoni samua yang ngoni perlu la ngoni bisa biking Dia pe mau, deng supaya Yesus Kristus bakarja di torang pe hati la biking torang mampo biking Tuhan Allah pe hati sanang. Puji deng hormat suda pa Dia sampe slama-lamanya! Amin.

Matius 3:2

“Bertobat suda kong iko pa Tuhan Allah, karna so tara lama lagi Tuhan Allah mo Berkuasa sebagai Raja pa orang-orang yang percaya pa Dia.”

Lukas 22:42

“Ya Bapa, kalu Bapa mau, Bapa kase jao samua penderitaan ini dari Kita. Tapi jang iko Kita pe mau, iko saja Bapa pe mau.”

Yohanes 7:17

Cuma orang yang mau biking Tuhan Allah pe mau yang bisa tau kalu Kita pe ajaran ini datang dari Tuhan Allah sandiri atau dari Kita pe pikiran sandiri.

Wahyu 19:6

Turus kita dengar banya orang pe suara. Suara itu kuat skali, sama deng aer terjun basar pe babunyi deng sama deng guntur pe babunyi. Suara itu bilang bagini, “Haleluya, puji pa Tuhan Allah! Barang, Tuhan itu torang pe Tuhan Allah Yang Paling Berkuasa, kong Dia suda yang jadi Raja skarang.”

1 Tesalonika 4:3

Ini Tuhan Allah pe mau: serakan ngoni pe hidup pa Dia la ngoni hidup deng hati bersi. Jang ngoni baseks sabarang.

Kisah Para Rasul 21:14

Paulus tara mau dengar apa yang torang bilang, jadi torang pasra kong bilang bagini, “Biar suda Tuhan Yesus pe mau yang jadi.”

Kisah Para Rasul 13:22

Abis itu, Tuhan Allah kase berenti pa Saul jadi raja. Turus Dia pili pa Daud jadi raja la mo ganti pa Saul. Tentang Daud ini Tuhan Allah so perna bilang, ‘Kita so perhatikan pa Daud, Isai pe ana itu. Dia jaga biking Kita pe hati jadi sanang, deng dia jaga biking samua Kita pe mau.’

Matius 4:17

Waktu di Kapernaum, Yesus mulai kase tau Tuhan Allah pe pasáng pa orang-orang, “Bertobat suda kong iko pa Tuhan Allah, karna so tara lama lagi Tuhan Allah mo Berkuasa sebagai Raja pa orang-orang yang percaya pa Dia!”

Wahyu 12:10

Abis itu, kita dapa dengar suara yang kuat skali dari sorga bilang bagini, “Iblis itu yang dulu siang malam lapor pa Tuhan Allah pe muka tentang torang pe sudara-sudara yang percaya pa Tuhan. Tapi skarang dia so dapa buang dari sorga. Jadi so sampe dia pe waktu Tuhan Allah mo kase slamat Dia pe umat. Dia kase tunju Dia pe kuasa, Dia mo Berkuasa sebagai Raja pa dorang pe hidup. Deng skarang lagi so dia pe waktu untuk Yesus Kristus, Raja yang Tuhan Allah pili, kase tunju Dia pe kuasa di dunia.

1 Petrus 4:2

Jadi selama ngoni masi hidup di dunia, ngoni pake waktu yang ada untuk iko Tuhan Allah pe mau, jang iko manusia pe keinginan.

Ibrani 10:7

Turus, Kita bilang, ‘Tuhan Allah! Lia, ini Kita. Kita datang untuk biking Tuhan Allah pe mau, itu sama deng Tuhan Allah janji dulu mo jadi pa Kita kong ada tatulis di Kitab Suci.’ ”

Lukas 19:38

Dorang bilang, “Puji pa Dia yang Tuhan Allah so utus datang kamari sebagai Raja! Skarang Tuhan Allah di sorga deng manusia di dunia so baku dame. Mari torang puji deng hormat pa Tuhan Allah yang Paling Tinggi!”

Markus 3:35

Barang, sapa yang biking Tuhan Allah pe mau, dia itu suda Kita pe sudara-sudara deng Kita pe mama.”

Matius 16:28

Dengar bae-bae yang Kita bilang pa ngoni. Dari antara ngoni yang ada di sini, ada yang tara akan mati sebelum dorang lia Anak Manusia datang Berkuasa sebagai Raja.”

Markus 11:10

Puji pa Dia ini yang mo jadi Raja, sama deng torang pe orang tua dulu-dulu raja Daud. Hosana! Puji pa Tuhan Allah yang Paling Tinggi!”

Wahyu 11:15

Malaekat yang ketuju tiop dia pe trompet, turus kita dengar banya suara yang kuat skali dari sorga bilang bagini, “Skarang yang berkuasa di dunia cuma torang pe Tuhan Allah deng Yesus Kristus, Raja yang Tuhan Allah pili untuk kase slamat pa manusia. Dia itu akan Berkuasa sebagai Raja sampe slama-lamanya.”

Wahyu 20:4

Turus kita lia ada kursi-kursi raja. Orang-orang yang dudu di kursi raja itu, orang-orang yang dapa kuasa untuk adili pa manusia. Kita me lia roh-roh dari orang-orang yang dulu dapa potong kapala kong mati karna dorang kase tau tentang Yesus deng Tuhan Allah pe firman. Orang-orang itu tara perna semba pa binatang jahat deng dia pe patong, jadi dorang me tara perna dapa binatang itu pe cap di dong pe testa deng di dong pe tangan. Tuhan Allah kase hidup ulang pa dorang, turus dong berkuasa sebagai raja sama-sama deng Yesus Kristus selama saribu taong.

Ibrani 1:14

Jadi, malaekat-malaekat tara lebe hebat dari Yesus to, karna dorang itu roh-roh yang biking apa yang Tuhan Allah suru. Tuhan Allah utus pa dorang untuk layani pa orang-orang yang mo dapa slamat dari dosa-dosa.

Kolose 1:13

Tuhan Allah so kase bebas pa torang dari Iblis pe kuasa galap, kong so kase pinda pa torang di tarang, supaya Dia pe Anak yang Dia sayang Berkuasa sebagai Raja pa torang.

Lukas 19:11

Yesus so dekat di kota Yerusalem. Karna itu, orang banya kira kata, Tuhan Allah so langsung mo Berkuasa sebagai Raja pa Dia pe umat sama deng Dia janji dulu. Karna Yesus tau itu, waktu dorang masi dengar pa Dia, Yesus tamba Dia pe carita satu pake umpama.

Kisah Para Rasul 22:14

Abis itu, Ananias bilang pa kita bagini, ‘Tuhan Allah yang torang orang Yahudi pe orang tua dulu-dulu jaga semba, Dia itu so pili pa ngana supaya ngana tau Dia pe mau. Dia me pili pa ngana supaya ngana lia pa Orang yang Butul itu, deng supaya ngana dengar Dia pe suara.