Matius 3:17 - Perjanjian Baru Bahasa Melayu Maluku Utara

¹⁷ Kong dapa dengar Tuhan Allah pe suara dari sorga bagini, “Ini Kita pe Anak, Kita paling sayang pa Dia. Dia yang biking Kita pe hati sanang.”

Matius 3:17 Referans Kwoze

Matius 17:5

Waktu Petrus masi bicara, kage-kage awan yang tarang turung tutu pa dorang. Kong dorang dengar dari dalam awan itu ada suara yang bilang bagini, “Ini Kita pe Anak yang Kita sayang. Dia biking Kita pe hati sanang. Dengar suda pa Dia!”

2 Petrus 1:17

Perna satu kali, torang nae gunung yang kudus satu sama-sama deng Yesus. Di situ torang dengar sandiri suara dari sorga, suara itu dari Tuhan Allah, torang pe Bapa yang paling hebat. Dia puji deng hormat pa Yesus, bilang bagini, “Ini Kita pe Anak yang Kita sayang. Dia biking Kita pe hati sanang.”

Lukas 9:35

Dorang dengar suara dari dalam awan itu bagini, “Ini Kita pe Anak yang Kita so pili. Dengar suda pa Dia!”

Matius 12:18

“Ini suda Dia yang Kita pili untuk biking apa yang Kita suru. Kita sayang pa Dia. Dia biking sanang Kita pe hati. Kita mo kase pa Dia Kita pe Roh, kong Dia yang mo kase tau pa suku-suku bangsa, Kita nanti mo adili pa samua orang deng cara yang adil.

Markus 9:7

Turus, awan turung tutu pa dorang. Kong, dorang dengar dari dalam awan itu ada suara yang bilang bagini, “Ini Kita pe Anak yang Kita sayang. Dengar suda pa Dia!”

Lukas 3:22

Turus, Roh Kudus datang pa Dia. Roh itu pe model sama deng burung pombo. Kong dapa dengar Tuhan Allah pe suara dari langit bagini, “Ngana ini Kita pe Anak, Kita paling sayang pa Ngana. Ngana yang biking Kita pe hati sanang.”

Markus 1:11

Kong, dapa dengar Tuhan Allah pe suara dari sorga bagini, “Ngana ini Kita pe Anak, Kita paling sayang pa Ngana. Ngana yang biking Kita pe hati sanang.”

Kolose 1:13

Tuhan Allah so kase bebas pa torang dari Iblis pe kuasa galap, kong so kase pinda pa torang di tarang, supaya Dia pe Anak yang Dia sayang Berkuasa sebagai Raja pa torang.

Efesus 1:6

Jadi mari suda, torang puji pa Tuhan Allah karna Dia so kase Dia pe bae yang hebat itu pa torang. Dia kase Dia pe bae itu karna torang so percaya pa Yesus Kristus yang Dia sayang.

Yohanes 5:37

Kong lebe dari itu lagi, Kita pe Bapa yang utus pa Kita, Dia sandiri yang basaksi kase tau pa manusia sapa itu Kita sebenarnya. Tapi ngoni pemimpin-pemimpin agama Yahudi tara perna dengar Dia pe suara, deng ngoni tara perna lia pa Dia.

Wahyu 14:2

Turus kita dengar ada suara dari sorga. Suara itu kuat skali, sama deng aer terjun basar deng guntur pe babunyi. Tapi suara itu bagus skali, sama deng alat musik kecapi yang banya, kong ada banya orang yang bakuti.

Yohanes 5:20

Barang, Bapa sayang pa Dia pe Anak kong Dia kase tunju pa Dia pe Anak samua yang Dia sementara biking. Deng nanti Dia akan kase tunju lagi hal yang lebe basar dari mujizat-mujizat yang Dia pe Anak so biking ini, supaya ngoni jadi herang skali.

1 Yohanes 5:9

Kalu manusia jadi saksi, torang percaya apa yang dia kase tau, apa lagi kalu Tuhan Allah yang jadi saksi, torang musti lebe percaya. Barang, yang Tuhan Allah kase tau itu tentang Dia pe Anak sandiri.