Matius 20:17 - Perjanjian Baru Bahasa Melayu Maluku Utara

¹⁷ Satu kali bagini, Yesus deng Dia pe murit-murit pigi ka atas di kota Yerusalem. Di tenga jalang, Dia pangge Dia pe murit-murit bapisa ka sana sadiki, baru Dia bilang bagini,

Matius 20:17 Referans Kwoze

Kisah Para Rasul 10:41

Tapi tara samua orang Yahudi yang bole dapa lia pa Dia. Cuma torang yang Tuhan Allah so pili kamuka yang bole dapa lia kong jadi Dia pe saksi-saksi itu. Torang ini yang so makang deng minum sama-sama deng Dia, waktu Dia so hidup ulang.

Yohanes 15:15

Kita tara sebut ngoni ini orang karja lagi, karna orang karja itu tara tau apa yang dia pe tuang biking. Tapi Kita bilang ngoni ini Kita pe tamang, karna samua yang Kita so dengar dari Kita pe Bapa, Kita so kase tau pa ngoni.

Yohanes 12:12

Dia pe beso, orang banya yang so ada di kota Yerusalem la mo biking agama Yahudi pe hari raya, dong dengar kata, Yesus ada di tenga jalang mo pi di kota Yerusalem.

Matius 16:13

Yesus deng Dia pe murit-murit sampe di daera dekat kota Kaisarea Filipi. Di situ, Yesus batanya pa Dia pe murit-murit, “Yang ngoni dengar, orang-orang jaga bilang Anak Manusia ini sapa?”

Matius 13:11

Kong Yesus jawab, “Tuhan Allah biking ngoni bisa tau rahasia tentang bagimana Tuhan Allah Berkuasa sebagai Raja, tapi pa orang laeng, tarada.