Lukas 2:10 - Perjanjian Baru Bahasa Melayu Maluku Utara

¹⁰ Tapi malaekat itu bilang pa dorang, “Jang tako! Dengar bae-bae. Kita datang kamari ini untuk kase tau kabar yang bae pa ngoni. Kabar yang bae ini biking samua orang yang dengar pe hati sanang skali.

Lukas 2:10 Referans Kwoze

Matius 28:18

Yesus badekat pa dorang kong bilang, “Kita so tarima samua kuasa di sorga deng di bumi.

Matius 14:27

Tapi Yesus langsung bilang pa dorang, “Tenang, jang tako! Ini Kita!”

Lukas 1:30

Turus malaekat itu bilang pa dia, “Maria, jang ngana tako, barang Tuhan Allah kase Dia pe bae pa ngana.

Kolose 1:23

Yang penting, ngoni tetap percaya pa Yesus Kristus deng jang ragu. Percaya turus Kabar Bae tentang Yesus Kristus yang ngoni so dengar itu. Kabar Bae itu suda yang biking torang yakin, torang mo dapa apa yang Tuhan Allah so janji pa Dia pe umat. Kabar Bae itu so tasiar di seluru dunia, kong kita ini, Paulus yang Tuhan Allah so pili untuk kase tau Kabar Bae itu.

Kisah Para Rasul 13:32

Jadi, skarang ini torang dua mo kase tau Kabar Bae tentang Yesus Kristus pa ngoni. Kabar Bae itu, yang Tuhan Allah janji pa torang pe orang tua dulu-dulu.

Lukas 24:47

Deng nanti Kita pe umat mo bawa Kabar Bae pake Kita pe nama pa samua suku bangsa di dunia supaya dorang bertobat dari dorang pe dosa kong Tuhan Allah mo kase ampun pa dorang. Kong dorang mo kase tau Kabar Bae itu pa orang-orang, mulai dari kota Yerusalem.

Lukas 8:1

Abis itu, Yesus pigi bajalang bakuliling di kota-kota deng di kampong-kampong, Dia kase tau Kabar Bae tentang Tuhan Allah mo Berkuasa sebagai Raja pa orang-orang yang percaya pa Dia. Dia pe murit dua blas orang itu ada iko sama-sama deng Dia,

Efesus 3:8

Dari samua yang so jadi Tuhan Allah pe umat, kita ini suda yang paling tarada arti apa-apa. Tapi biar bagitu, Tuhan Allah kase Dia pe bae pa kita untuk kita kase tau Kabar Bae tentang Yesus Kristus pa orang-orang bukang Yahudi. Kita kase tau pa dorang tentang sagala hal yang talebe-lebe, yang Dia so rencana mo kase pa orang yang percaya pa Dia.

Lukas 1:19

Kong malaekat bilang pa dia, “Kita ini Gabriel yang salalu ada deng Tuhan Allah untuk layani pa Dia. Dia utus pa kita untuk bilang kabar yang bae ini pa ngana.

Lukas 1:13

Tapi malaekat itu bilang pa dia, “Zakharia, jang ngana tako! Tuhan Allah so dengar ngana pe doa. Ngana pe bini Elisabet akan melahirkan ana laki-laki satu. Ana itu ngana musti kase nama pa dia, Yohanes.

Markus 1:15

Dia bilang bagini, “Dia pe waktu yang Tuhan Allah tentukan so sampe. Tuhan Allah so mo Berkuasa sebagai Raja pa orang-orang yang percaya pa Dia. Jadi, bertobat suda deng percaya Kabar Bae itu.”

Roma 10:15

Bagitu me, tarada orang yang akan kase tau kabar tentang Dia kalu tarada yang utus pa dorang, to? Jadi sama deng di Kitab Suci ada tatulis, “Pe sanang skali dapa lia orang yang datang untuk kase tau Kabar Bae dari Tuhan Allah!”

Markus 16:15

Abis itu Yesus bilang pa dorang, “Pigi suda di seluru dunia ini, la kase tau Kabar Bae dari Tuhan Allah pa samua orang.

Matius 28:5

Kong malaekat itu bilang pa parampuang-parampuang itu, “Jang ngoni tako! Kita tau ngoni cari pa Yesus yang dapa salib itu.

Lukas 2:11

Kabar yang bae itu bagini: hari ini, Orang yang mo kase slamat pa manusia so lahir. Dia so lahir di Betlehem, raja Daud pe kota. Dia itu orang pangge Kristus, Raja yang Tuhan Allah janji mo kase slamat pa ngoni. Dia itu suda Tuhan.