Lukas 16:11 - Perjanjian Baru Bahasa Melayu Maluku Utara

¹¹ Jadi kalu ngoni tara bisa dapa kase percaya harta di dunia ini, tarada yang mo kase percaya pa ngoni harta yang di sorga.

Lukas 16:11 Referans Kwoze

Lukas 12:33

Jual suda ngoni pe harta kong kase dia pe doi untuk orang-orang miskin! Kalu ngoni biking bagitu, itu sama deng ngoni ada kumpul harta di sorga yang tara akan mo abis-abis. Karna di sorga tara ada papancuri yang mo ambe harta itu deng tarada gai yang mo kase rusak harta itu.

Yakobus 2:5

Sudara-sudara yang kita sayang, dengar yang kita mo bilang ini: orang miskin yang ada di dunia ini, Tuhan Allah so pili pa dorang la butul-butul percaya pa Dia. Dorang itu yang mo jadi Tuhan Allah pe umat yang Dia Berkuasa sebagai Raja pa dorang pe hidup, sama deng yang Dia so janji pa samua orang yang sayang pa Dia.

Efesus 3:8

Dari samua yang so jadi Tuhan Allah pe umat, kita ini suda yang paling tarada arti apa-apa. Tapi biar bagitu, Tuhan Allah kase Dia pe bae pa kita untuk kita kase tau Kabar Bae tentang Yesus Kristus pa orang-orang bukang Yahudi. Kita kase tau pa dorang tentang sagala hal yang talebe-lebe, yang Dia so rencana mo kase pa orang yang percaya pa Dia.

Lukas 18:22

Pe dengar itu, Yesus bilang, “Tapi masi ada satu yang ngana bolong biking. Ngana jual samua ngana pe harta kong kase bage-bage doi itu pa orang-orang miskin. Kalu ngana biking bagitu, ngana dapa harta di sorga. Abis itu, kamari suda la iko pa Kita.”

Lukas 16:9

Jadi ini yang Kita mo bilang pa ngoni: pake ngoni pe harta dunia untuk tolong orang supaya bole dapa banya tamang. Jadi kalu ngoni pe harta so abis, ngoni nanti mo dapa tarima di ngoni pe tampa tinggal di sorga.

Wahyu 3:18

Jadi Kita kase nasehat pa ngoni bagini: Kita so ada barang yang berharga sama deng mas yang dapa bakar di api supaya jadi murni, jadi ngoni musti bili suda supaya Kita lia ngoni butul-butul kaya pa Kita pe muka. Kita me ada baju puti bersi, ngoni musti bili kong pake la Kita lia ngoni tara talanjang lagi yang biking ngoni jadi malu. Kita me ada obat mata yang kase sembu mata. Jadi ngoni musti bili suda obat itu pa Kita la ngoni bisa lia butul-butul.

Matius 6:24

Tarada satu orang yang bisa bakarja satu kali pa dua tuang. Karna kalu dia pe tuang dua, pasti dia binci tuang yang satu kong tuang yang laeng dia sayang. Atau dia mo lebe setia pa dia pe tuang yang satu dari dia pe tuang yang laeng. Bagitu lagi deng ngoni, kalu ngoni hidup cuma mo kumpul harta dunia, tara mungkin ngoni mo karja untuk Tuhan Allah deng sunggu-sunggu.”

Lukas 16:12

Kalu ngoni tara bisa jaga orang laeng pe barang yang orang kase percaya pa ngoni, tarada yang nanti mo kase pa ngoni barang untuk jadi ngoni punya.