Lukas 15:22 - Perjanjian Baru Bahasa Melayu Maluku Utara

²² Tapi dia pe papa pangge pa orang-orang karja kong bilang pa dorang, ‘Capat suda bawa kamari juba yang paling bagus kong kase pake pa dia. Kong kase pake lagi cincin pa dia pe jari deng sandal pa dia pe kaki.

Lukas 15:22 Referans Kwoze

Wahyu 6:11

Abis itu, samua orang mati itu pe roh masing-masing tarima dong pe juba puti, kong ada yang bilang pa dorang, supaya tunggu sadiki karna dong pe jumla bolong genap. Barang, masi ada lagi dong pe sudara-sudara yang percaya, deng orang laeng yang jaga biking apa yang Tuhan suru yang nanti mo mati dapa bunu sama deng dorang itu. Waktu itu, baru dong pe jumla jadi genap, kong Tuhan mo hukum pa orang-orang di dunia.

Wahyu 19:8

Tuhan Allah so kase pa dia pakeang pengantin parampuang yang bagus warna puti mangkilat dari kaeng alus.” (Pakeang pengantin bagus itu, dia pe arti kalakuang yang butul yang orang-orang yang so jadi Tuhan Allah pe umat jaga biking).

Wahyu 7:9

Abis itu, kita lia ada orang pe banya skali, sampe tara mampo mo rekeng pa dorang. Dorang itu dari samua bangsa, suku bangsa, fam deng bahasa. Dorang samua badiri di muka Tuhan Allah pe kursi raja deng di muka Anak Domba itu. Dorang pake juba puti deng masing-masing orang ada pegang daong-daong palem.

Roma 8:15

Torang tau, tong itu Tuhan Allah pe ana-ana, karna Tuhan Allah pe Roh yang Dia so kase pa torang itu, tara biking torang tako sama deng orang karja yang tako dia pe tuang. Tapi Tuhan Allah pe Roh itu so biking torang jadi Tuhan Allah pe ana-ana, sampe torang me bole pangge pa Dia itu, “Papa e, ya Bapa!”

Wahyu 2:17

Jadi dengar bae-bae apa yang Tuhan Allah pe Roh kase tau pa Dia pe jemaat-jemaat, bagini, ‘Sapa yang menang dari pengaru jahat, nanti Kita kase pa dia makanang dari sorga yang orang sebut manna yang tasambunyi. Nanti Kita mo kase lagi pa dia batu puti satu yang ada tatulis dia pe nama baru. Nama baru itu, cuma orang yang tarima batu itu saja yang tau, orang laeng tara tau.’ ”

Galatia 3:27

Ngoni so dapa baptis, itu satu tanda ngoni so percaya pa Yesus Kristus. Karna itu, ngoni so tarima Yesus Kristus pe sifat pa ngoni pe diri. Jadi tiap hari ngoni so iko Dia pe sifat, itu sama deng ngoni pe baju yang ngoni pake tiap hari.

Roma 13:14

Tapi lebe bae tiap hari torang iko cara hidup yang Yesus Kristus torang pe Tuhan so kase conto. Deng jang sama skali torang iko manusia pe mau yang suka biking dosa untuk kase puas torang pe keinginan.

Wahyu 3:18

Jadi Kita kase nasehat pa ngoni bagini: Kita so ada barang yang berharga sama deng mas yang dapa bakar di api supaya jadi murni, jadi ngoni musti bili suda supaya Kita lia ngoni butul-butul kaya pa Kita pe muka. Kita me ada baju puti bersi, ngoni musti bili kong pake la Kita lia ngoni tara talanjang lagi yang biking ngoni jadi malu. Kita me ada obat mata yang kase sembu mata. Jadi ngoni musti bili suda obat itu pa Kita la ngoni bisa lia butul-butul.

Efesus 6:15

Ngoni lagi musti salalu siap untuk kase tau Kabar Bae tentang Yesus Kristus yang bisa biking sampe orang bole baku bae deng Tuhan Allah. Kalu ngoni salalu siap bagitu, ngoni itu bole kase sama deng tentara yang pake spatu la siap mo bajalang ka mana saja, deng bisa badiri kuat waktu baku prang.

Roma 3:22

torang bole jadi orang yang tara sala pa Dia pe muka karna torang percaya pa Yesus Kristus. Itu mo jadi pa samua orang yang percaya, karna Tuhan Allah tara pili-pili orang.

Lukas 15:21

Kong ana itu bilang pa dia pe papa, ‘Papa, kita so berdosa skali pa Tuhan Allah yang di sorga deng pa papa. Kita tara pantas lagi dapa bilang kita ini papa pe ana.’

Lukas 15:23

Abis itu, potong sapi paranggang satu yang bagumu kong momasa. Mari torang makang sama-sama, deng abis itu, baronggeng.