Kolose 2:18 - Perjanjian Baru Bahasa Melayu Maluku Utara

¹⁸ Jadi jang ngoni dengar pa orang-orang yang bilang kata, Tuhan Allah mo hukum pa ngoni karna ngoni tara iko dorang pe aturan agama. Dorang bapuasa banya-banya supaya orang lia kata, dorang hebat kong suru ngoni iko. Deng dorang suru pa ngoni semba pa malaekat-malaekat. Dorang suka bicara sombong tentang dong pe penglihatan-penglihatan yang dong dapa dari Tuhan. Dorang jaga kase sombong deng dong pe diri, itu karna yang dorang biking itu cuma iko manusia pe pikiran.

Kolose 2:18 Referans Kwoze

Kolose 2:8

Sudara-sudara, ngoni musti ati-ati, jang sampe ada orang yang pengaru pa ngoni untuk iko deng dong pe ajaran-ajaran agama yang tara butul. Dorang pe ajaran itu tara ada dia pe guna, karna bukang ajaran tentang Yesus Kristus. Tapi dorang pe ajaran itu dari dong pe orang tua dulu-dulu deng dari roh-roh yang berkuasa di dunia ini.

1 Timotius 1:7

Dorang itu cuma suka jadi guru agama untuk kase ajar aturan-aturan di lima kitab Musa, padahal dorang sandiri tara mangarti apa yang dorang ajar, deng dorang tara mangarti kitab-kitab itu pe arti yang dorang kase ajar deng smangat.

Kolose 2:23

Memang aturan-aturan itu dapa lia bae karna orang yang iko aturan itu dapa lia hebat kata. Dorang iko aturan-aturan yang biking orang bilang dong tara sombong, kong biking siksa diri sandiri supaya dapa puji. Padahal sebenarnya aturan-aturan itu tarada dia pe guna, karna tara biking orang beruba jadi bae. Dorang masi suka kase puas dorang pe diri iko manusia pe mau yang suka biking dosa.

1 Timotius 4:1

Roh Kudus so bilang deng jelas, nanti dekat-dekat hari kiamat, ada orang percaya yang akan kase tinggal lagi dorang pe percaya pa Tuhan Allah, kong taiko pa setang-setang yang jaga kase sesat pa manusia. Dorang itu cuma mo iko setang-setang pe ajaran.

2 Korintus 11:3

Tapi kita tako jang sampe ada yang pengaru pa ngoni deng dong pe ajaran yang sala sampe ngoni so tara percaya lagi pa Yesus Kristus deng hati yang sunggu-sunggu. Itu sama deng Hawa dulu yang dapa tipu dari ular sampe malawang Tuhan Allah pe parenta karna ular pe putar bale itu.

Roma 1:25

Apa yang butul dari Tuhan Allah, dorang tara iko. Dorang so tara puji deng semba pa Tuhan Allah yang so cipta langit deng bumi, mala dorang cuma puji deng semba pa apa yang Tuhan Allah so cipta. Padahal cuma Tuhan Allah saja yang pantas dapa puji slama-lamanya. Amin.

Matius 24:24

Karna nanti ada banya orang datang bilang kata, dorang Mesias, atau bilang kata, dorang nabi yang kase turus Tuhan Allah pe pasáng. Deng dorang me biking mujizat-mujizat deng tanda-tanda yang kase tunju dong pe kuasa yang hebat, supaya orang percaya pa dorang kong jang percaya pa Tuhan yang butul lagi. Deng kalu bisa, dorang me mo biking sesat pa orang-orang yang Tuhan Allah so pili.

Wahyu 3:11

So tara lama lagi Kita mo datang. Jadi jaga turus ngoni pe percaya pa Tuhan Allah supaya hadia makota yang Dia mo kase pa ngoni itu tarada orang yang mo rampas.

1 Yohanes 2:26

Samua yang kita tulis pa ngoni ini, mo kase tau pa ngoni tentang orang-orang yang berusaha mo tipu pa ngoni deng ajaran yang tara butul.

Filipi 3:14

Jadi kita berusaha turus supaya kita bole biking kita pe tujuan untuk hidup sama deng Kristus Yesus. Itu sama deng orang yang iko lomba lari, yang berusaha lari turus sampe garis finis supaya bole mo dapa hadia. Hadia yang kita mo dapa itu, hidup deng Tuhan Allah slama-lamanya. Kong Tuhan Allah pangge pa kita untuk dapa hidup itu, karna kita so percaya pa Kristus Yesus.

Efesus 5:6

Jang ngoni dapa kase bodo dari orang-orang yang bilang kata, hal-hal itu bukang dosa. Barang, Tuhan Allah pasti mo hukum pa orang-orang yang biking hal-hal itu, karna dorang tara dengar-dengaran pa Tuhan Allah.

1 Korintus 8:1

Skarang kita mo bicara tentang daging yang orang so biking persembahan untuk dorang pe puji-puji. Memang ngoni orang percaya so tau, orang pe puji-puji itu tarada kuasa. Tapi karna ngoni so tau itu, ada dari ngoni yang jadi sombong. Lebe bae ngoni baku sayang, itu yang bole kase kuat orang pe percaya.

Wahyu 19:10

Kong kita berlutut di malaekat itu pe muka la mo semba pa dia. Tapi dia togor pa kita bagini, “Jangan! Jang ngana semba pa kita! Semba saja pa Tuhan Allah. Karna kita ini cuma sama deng ngana deng sudara-sudara laeng yang jaga biking apa yang Tuhan suru. Torang samua ini yang jaga kase tau tentang Yesus pa orang-orang. Sapa yang kase tau itu, dia itu butul-butul yang Roh Kudus pake untuk kase tau Tuhan Allah pe pasáng.”

Wahyu 13:14

Dia biking tanda-tanda itu di binatang pertama pe muka, sampe dia kase sesat orang-orang di bumi. Dia me suru dorang biking patong satu sama deng binatang yang pertama, binatang yang ada luka barát tapi so sembu itu.

Wahyu 13:8

Kong samua orang yang tinggal di bumi mo semba pa binatang itu. Orang-orang yang semba itu, dorang yang pe nama tara tatulis di Anak Domba pe buku kehidupan waktu dunia ini bolong jadi. Buku kehidupan itu, Anak Domba yang so perna dapa bunu pe buku. Di buku itu, Tuhan Allah tulis orang-orang pe nama yang mo dapa hidup deng Tuhan Allah slama-lamanya.

Wahyu 12:9

Naga basar itu, setang-setang pe raja yang dong jaga bilang ‘Iblis’. Naga itu yang dari dulu salalu kase sesat orang-orang di seluru dunia ini. Dia deng malaekat-malaekat yang iko pa dia, samua dapa buang dari sorga di bumi.

2 Petrus 2:14

Dorang pe mata kalu lia parampuang, haga deng napsu. Dorang tara perna puas biking dosa. Dorang jaga goda pa orang-orang yang pe percaya bolong kuat pa Tuhan, supaya iko pa dorang untuk biking yang jahat. Dorang itu tara perna puas deng dong pe barang yang so ada, kong dong me mo ambe orang punya. Dorang itu Tuhan Allah pasti mo hukum!

Kolose 2:4

Kita tulis ini pa ngoni, supaya kalu ada orang yang kase ajar ajaran yang tara butul pa ngoni, biar itu menurut ngoni maso akal, tapi ngoni tara gampang taiko.

2 Korintus 12:20

Kita hawater, kalu kita so datang pa ngoni nanti, ngoni bolong biking sama deng yang kita mau. Bagitu lagi deng ngoni, ngoni lia kita biking tara sama deng yang ngoni mau. Kita hawater, jang sampe kita dapa ada dari ngoni yang baku-baku malawang, baku mangiri, mara-mara, cuma pikir diri sandiri, carita busu orang pe nama, bamulu, basombong deng biking kaco.

1 Korintus 13:4

Orang yang sayang pa orang laeng, dia itu sabar, hati bae, tara mangiri, tara angka-angka diri, deng tara sombong.

1 Korintus 9:24

Ngoni tantu tau conto ini. Samua orang yang iko lomba lari, dorang berusaha lari kuat-kuat la dapa juara, tapi yang mo dapa hadia cuma satu orang saja. Bagitu lagi deng ngoni, ngoni me musti berusaha iko Tuhan Allah pe mau sama deng dorang yang lari kuat untuk dapa hadia itu, supaya ngoni bole dapa hadia yang Tuhan Allah so sadia.

1 Korintus 4:18

Tapi ada laeng dari ngoni yang kira kata, kita tara mo datang togor pa ngoni lagi, jadi dorang so kapala basar.

1 Korintus 3:3

Barang sampe skarang, ngoni pe kalakuang masi iko manusia pe mau. Kita bilang bagitu, barang ada dari ngoni yang jaga baku mangiri, deng baku-baku ambe. Itu dia pe tanda ngoni masi iko manusia pe mau.

Roma 16:18

Barang orang-orang yang macam bagitu, sebenarnya dorang tara karja untuk Yesus Kristus torang pe Tuhan, tapi dorang karja iko dong pe mau sandiri. Dorang buju deng kata-kata yang kase sadap di talinga pa orang yang masi bolong mangarti mana yang bae deng mana yang tara bae, sampe orang-orang me iko pa dorang pe ajaran yang tara butul.

1 Korintus 4:6

Sudara-sudara, kita bicara tentang kita deng Apolos tadi, supaya ngoni balajar dari torang dua kong ngoni bole mangarti parenta yang bilang bagini, “Jang langgar parenta-parenta yang so tatulis.” Kalu ngoni biking bagitu, tarada dari ngoni yang jadi sombong sampe ngoni hormati pemimpin yang satu kong pemimpin yang laeng ngoni kase sala.

Efesus 4:17

Jadi, karna torang so jadi satu, kita kase inga bae-bae pa ngoni pake Tuhan pe kuasa: jang lagi ngoni hidup sama deng orang yang tara kanal pa Tuhan Allah, dorang yang cuma pikir hal-hal yang tarada dia pe guna.