Ibrani 3:1 - Perjanjian Baru Bahasa Melayu Maluku Utara

¹ Sudara-sudara yang so jadi Tuhan Allah pe umat, yang so dapa pangge untuk hidup sama-sama deng Dia di sorga, coba ngoni pikir bae-bae tentang Yesus Kristus yang torang so percaya. Dia itu Tuhan Allah pe Utusan deng Dia lagi Imam Basar, karna Dia biking sampe torang manusia deng Tuhan Allah pe hubungan bisa jadi bae ulang.

Ibrani 3:1 Referans Kwoze

2 Timotius 1:9

Tuhan Allah yang so kase slamat pa torang dari dosa-dosa deng Dia pangge pa torang untuk jadi Dia pe umat sandiri la hidup deng hati bersi. Dia biking samua itu bukang karna torang ada biking yang bae, tapi karna Tuhan Allah pe mau deng karna Dia pe hati bae pa manusia. Memang, dari dulu waktu Tuhan Allah bolong biking dunia ini, Dia so sayang pa torang, jadi Tuhan Allah biking rencana Kristus Yesus datang di dunia.

Filipi 3:14

Jadi kita berusaha turus supaya kita bole biking kita pe tujuan untuk hidup sama deng Kristus Yesus. Itu sama deng orang yang iko lomba lari, yang berusaha lari turus sampe garis finis supaya bole mo dapa hadia. Hadia yang kita mo dapa itu, hidup deng Tuhan Allah slama-lamanya. Kong Tuhan Allah pangge pa kita untuk dapa hidup itu, karna kita so percaya pa Kristus Yesus.

Ibrani 7:26

Yesus Kristus itu cocok skali jadi torang pe Imam Basar yang kase bae-bae torang pe hubungan deng Tuhan Allah, barang Dia itu Kudus, Dia tarada sala, deng Dia tara perna biking dosa. Tuhan Allah taru pa Yesus Kristus di tampa yang jao dari orang-orang berdosa, kong Dia angka pa Yesus Kristus di tampa yang paling terhormat di sorga.

Efesus 4:1

Sudara-sudara, karna Tuhan so kase Dia pe bae yang basar itu pa torang, jadi ini nasehat dari kita yang skarang ada di penjara gara-gara kita jaga biking apa yang Tuhan suru. Tuhan so pangge pa ngoni la iko pa Dia, jadi kita bilang pa ngoni supaya ngoni hidup butul sama deng yang pantas untuk orang yang so iko pa Dia.

1 Petrus 2:9

Tapi ngoni ini suda yang Tuhan Allah so pili jadi Dia pe umat, kong biking ngoni jadi sama deng imam yang jaga layani pa Dia yang jadi torang pe Raja. Dia kase pisa pa ngoni dari samua orang untuk jadi Dia pe umat sandiri, kong ngoni jadi Dia pe rakyat yang pe hati bersi pa Dia pe muka. Ngoni jadi bagitu, supaya ngoni bole kase tau pa orang-orang hal-hal luar biasa yang Dia so biking. Dia itu suda yang so pangge pa ngoni kaluar dari galap, maso pa Dia pe tarang yang luar biasa.

Ibrani 2:17

Kong karna Dia mo tolong pa torang yang jadi Dia pe sudara, Tuhan Allah musti biking Yesus jadi sama persis deng torang manusia. Deng karna Yesus so rasa samua yang torang so rasa, Dia bole kase tunju Dia pe rasa kasiang pa torang manusia, sampe bole kase Dia pe diri mati untuk tebus torang pe dosa-dosa. Deng Dia mati itu, Yesus jadi Imam Basar yang setia pa Tuhan Allah supaya torang deng Tuhan Allah pe hubungan jadi bae ulang.

Ibrani 10:21

Kong Yesus Kristus itu skarang so jadi torang pe Imam Basar yang hebat yang pimpin pa torang samua Tuhan Allah pe umat.

Efesus 4:4

Torang yang percaya pa Yesus so jadi satu, sama deng torang so jadi satu badan, deng Roh Kudus yang ada pa torang me cuma satu. Kong cuma pa Tuhan Allah saja torang baharap karna Dia yang pangge pa torang untuk iko pa Dia.

1 Tesalonika 2:12

Itu, torang kase smangat deng kase kuat ngoni pe hati supaya ngoni pe hidup pantas untuk orang yang iko pa Tuhan Allah. Tuhan Allah pangge pa ngoni la jadi Dia pe umat yang Dia berkuasa sebagai Raja, kong ngoni nanti dapa puji deng hormat sama-sama deng Dia.

1 Korintus 9:23

Samua yang kita biking itu, kita biking la tamba hari tamba banya orang yang percaya Kabar Bae tentang Yesus Kristus, supaya kita deng dorang bole dapa samua yang bae yang Tuhan Allah so janji di Kabar Bae itu.

2 Timotius 2:7

Perhatikan bae-bae conto-conto yang kita so bilang itu! Kalu ngana perhatikan bae-bae, Tuhan pasti mo kase mangarti samua itu pa ngana.

1 Timotius 6:12

Ngana musti berusaha turus percaya pa Tuhan Allah, sama deng orang yang iko lomba yang berusaha mo dapa piala. Tuhan Allah so pangge pa ngana untuk hidup deng Dia slama-lamanya. Waktu Tuhan Allah pangge pa ngana, ngana mangaku sunggu-sunggu percaya pa Yesus Kristus di orang banya pe muka.

Roma 15:8

Kita kase inga pa ngoni bagini: Yesus Kristus datang di dunia untuk tolong pa torang orang Yahudi la iko apa yang Tuhan Allah janji pa torang pe orang tua dulu-dulu. Deng bagitu, Tuhan Allah kase tunju butul-butul Dia tara lupa biking Dia pe janji.

Ibrani 2:11

Yesus yang tebus torang manusia pe dosa supaya torang jadi bersi pa Tuhan Allah pe muka. Dia deng torang pe Bapa cuma satu. Karna itu, Dia tara malu bilang, torang ini Dia pe sudara-sudara.

Yohanes 20:21

Kong Yesus bilang ulang pa dorang, “Tuhan Allah biking ngoni hidup deng hati tenang! Kita pe Bapa so utus pa Kita, bagitu lagi Kita utus pa ngoni skarang.”

Yudas 1:1

Sudara-sudara, ngoni yang Tuhan Allah torang pe Bapa so pangge untuk iko pa Dia, yang Dia sayang, deng yang Dia salalu jaga sampe Yesus Kristus datang ulang. Salam dari kita Yudas. Kita ini Yakobus pe sudara, deng kita me yang jaga biking apa yang Yesus Kristus suru.

Ibrani 3:14

Barang, kalu torang tetap pegang turus apa yang torang so percaya dari pertama sampe waktu dunia ini kiamat, torang akan dapa bagian dari samua yang ada pa Yesus Kristus.

2 Tesalonika 2:14

Tuhan Allah memang mau bagitu, jadi Dia pangge pa ngoni supaya dapa slamat waktu torang kase tau pa ngoni Kabar Bae tentang Yesus Kristus. Deng bagitu, ngoni bole rasa Yesus Kristus pe bae deng nanti dapa puji deng hormat sama-sama deng Dia, torang pe Tuhan.

2 Tesalonika 1:11

Kong karna torang tau Tuhan mo datang, torang salalu berdoa lagi untuk ngoni. Tuhan Allah so pangge pa ngoni jadi Dia pe umat sandiri, jadi torang berdoa la Tuhan biking ngoni pantas jadi Dia pe umat. Torang me berdoa supaya Tuhan Allah pake Dia pe kuasa la tolong pa ngoni kase selesai samua hal yang bae yang ngoni suka mo biking, ngoni biking samua itu karna ngoni percaya pa Yesus.

1 Tesalonika 5:27

Kita ini Tuhan Yesus Kristus pe utusan, jadi kita minta pa ngoni supaya ngoni baca surat ini pa samua sudara yang percaya pa Tuhan.

Kolose 3:12

Tuhan Allah so pili pa ngoni, ngoni yang so jadi Dia pe umat, deng yang Dia sayang. Jadi ngoni pe hidup musti bagini: ada rasa kasiang, hati bae, tara sombong, tara kasar, deng salalu sabar.

Kolose 1:22

Tapi skarang, Tuhan Allah biking supaya ngoni pe hubungan bole bae-bae ulang deng Dia, karna Yesus Kristus so mati di kayu salib. Dia mati itu, supaya di Dia pe muka, ngoni jadi orang yang bersi dari dosa, tara sala apa-apa, kong tarada orang yang bisa kase sala pa ngoni.

Kolose 1:12

Deng kita minta lagi supaya ngoni salalu bilang tarimakasi banya pa Dia, torang pe Bapa. Bapa itu suda yang biking ngoni jadi pantas mo dapa apa yang Dia so janji pa orang-orang yang so jadi Dia pe umat. Kong janji itu, Dia so sadia untuk Dia pe umat di tampa yang tarang, tampa yang Dia Berkuasa sebagai Raja.

2 Korintus 1:7

Jadi torang yakin skali ngoni akan tetap batahang percaya pa Tuhan. Barang, ngoni so dapa sengsara sama deng sengsara yang tong rasa, jadi torang tau, pasti Tuhan kase kuat lagi ngoni pe hati sama deng yang torang rasa.

1 Korintus 1:2

Kita tulis surat ini untuk ngoni Tuhan Allah pe jemaat yang ada di kota Korintus. Dia so biking ngoni jadi Dia pe umat sandiri yang bersi dari dosa, karna ngoni so percaya pa Yesus Kristus. Dia pangge pa ngoni untuk jadi Dia pe umat, sama-sama deng samua orang percaya di sagala tampa, yang salalu semba deng puji pa Yesus Kristus, torang samua pe Tuhan.

Roma 15:27

Dorang ada sumbang itu deng hati sanang. Deng memang pantas dorang mo bantu pa dong pe sudara yang percaya, orang-orang Yahudi di Yerusalem. Barang, orang-orang bukang Yahudi, dorang dengar Kabar Bae tentang Yesus Kristus dari orang-orang Yahudi. Jadi pantas dorang balas orang Yahudi pe bae deng cara bantu dorang pe perlu.

Roma 11:17

Tapi orang Yahudi yang tara percaya pa Yesus Kristus, dorang itu sama deng cabang-cabang yang dapa potong dari pohong zaitun yang ada tanam di kobong. Kong orang yang bukang Yahudi, kalu dorang percaya pa Yesus Kristus, dong itu sama deng cabang-cabang dari pohong zaitun yang batumbu sandiri kong tuang kobong datang potong cabang-cabang itu turus kase malakat di pohong zaitun yang ada tanam di kobong itu. Deng bagitu, cabang dari pohong yang batumbu sandiri dapa hidup dari pohong yang ada tanam di kobong itu. Cabang itu sama deng ngoni orang yang bukang Yahudi, ngoni ini yang so percaya, jadi ngoni so tarima Tuhan Allah pe janji yang dulu Dia so kase pa orang Yahudi.

Roma 9:24

Kong orang-orang itu bukang cuma torang orang Yahudi saja tapi orang yang bukang Yahudi lagi.

Yohanes 20:27

Kong Dia bilang pa Tomas, “Tomas, lia Kita pe tangan ini kong ngana cucu suda ngana pe jari pa Kita pe tangan. Ngana kase maso ngana pe tangan pa Kita pe lambung ini. Jadi jang bilang ngana tara percaya lagi Kita so hidup ulang, tapi percaya suda.”

Wahyu 18:20

Abis itu, ada suara yang bilang bagini, “Ee ngoni yang hidup di sorga, sanang suda ngoni, barang kota Babel itu Tuhan Allah so hukum. Sanang suda ngoni orang-orang yang so jadi Tuhan Allah pe umat, ngoni Tuhan pe utusan-utusan yang orang sebut rasul-rasul, deng ngoni nabi-nabi yang jaga kase turus Tuhan Allah pe pasáng! Barang, Tuhan Allah so kase hukuman pa kota itu karna samua kajahatan yang orang-orang di kota itu perna biking pa ngoni.”

Wahyu 17:14

Dorang mo baku prang deng Anak Domba. Tapi Anak Domba itu sama-sama deng Dia pe umat mo kase kala pa dorang, karna Anak Domba itu, Tuhan dari samua tuhan, deng Raja dari samua raja. Kong orang-orang yang sama-sama deng Anak Domba, dorang itu yang Tuhan so pangge, so pili deng yang setia pa Dia.”

1 Yohanes 1:3

Skarang torang kase tau pa ngoni apa yang torang so lia deng so dengar dari Dia, supaya ngoni deng torang bole hidup satu hati, deng bagitu torang samua bole hidup satu hati deng torang pe Bapa, Tuhan Allah deng Dia pe Anak Yesus Kristus.

1 Petrus 5:10

Tapi siksa yang ngoni rasa itu cuma sementara saja. Nanti Tuhan Allah sandiri yang mo kase bae-bae ngoni pe keadaan, kase kuat ngoni pe hati, kase kuat ngoni pe percaya, deng biking ngoni tetap percaya pa Dia. Dia itu suda Tuhan Allah yang kase Dia pe bae pa manusia, yang so pangge pa ngoni untuk percaya pa Yesus Kristus, kong ngoni mo rasa Dia pe kuasa yang luar biasa untuk slama-lamanya.

1 Petrus 5:1

Skarang kita mo kase nasehat pa ngoni yang jadi penatua di jemaat-jemaat karna kita me penatua. Kita ini perna lia deng mata kapala sandiri waktu Yesus Kristus dapa siksa. Kong nanti waktu Yesus Kristus datang ulang yang kedua kali kase tunju Dia pe kuasa yang luar biasa pa samua orang, kita me akan tarima bagian itu. Jadi ini kita pe nasehat:

1 Petrus 3:5

Karna parampuang-parampuang dulu-dulu yang hidup bersi pa Tuhan Allah pe muka me, dorang pe hidup macam bagitu. Dorang itu cuma baharap pa Tuhan Allah, deng dorang dengar-dengaran pa dong pe laki.

Ibrani 9:11

Skarang ini, Yesus Kristus so datang kong so jadi Imam Basar untuk kase pa torang samua yang bae dari Tuhan Allah pe janji yang baru itu. Dia tara maso di Tuhan Allah pe Tenda Ibada yang manusia biking di dunia ini, tapi Dia maso di Tuhan Allah pe tampa tinggal di sorga yang lebe hebat deng sempurna.

Ibrani 6:20

Jadi torang tara usa tako lagi mo datang pa Tuhan Allah, karna Yesus Kristus yang so kamuka maso di situ la bicara pa Tuhan Allah untuk torang. Dia jadi torang pe Imam Basar untuk slama-lamanya, sama deng Melkisedek dulu yang jadi imam basar.

Efesus 3:6

Tuhan Allah pe rencana itu bagini: ngoni orang-orang yang bukang Yahudi akan percaya Kabar Bae tentang Yesus Kristus, jadi ngoni me bole sama-sama deng orang-orang Yahudi jadi Dia pe ana-ana yang tarima samua yang Tuhan Allah so janji. Ngoni orang bukang Yahudi deng torang orang Yahudi so jadi satu sama deng jadi satu badan. Kong torang samua itu mo dapa yang Tuhan Allah janji pa torang yang so percaya pa Kristus Yesus.

1 Korintus 10:17

Roti itu cuma satu kong ada pela-pela, baru torang makang sama-sama dari roti itu. Jadi, biar torang banya orang tapi torang samua sama deng so jadi satu badan karna torang pe hubungan deng Yesus Kristus itu.

Yohanes 17:3

Kong hidup deng Bapa slama-lamanya itu, pe maksut bagini: dorang so kanal Bapa itu Tuhan Allah yang butul, tara ada yang laeng, deng dorang so kanal Yesus Kristus itu yang Bapa utus untuk datang di dunia ini.

Kisah Para Rasul 1:15

Satu kali bagini, waktu orang-orang yang percaya pa Yesus bakumpul sama-sama, dorang itu pe banya mangkali saratus dua pulu orang. Turus Petrus badiri pa dong pe tenga-tenga kong bilang,

2 Korintus 9:13

Jadi waktu ngoni kase doi sumbangan yang talebe-lebe itu, itu biking banya orang mo puji deng hormat pa Tuhan Allah karna dorang lia ngoni butul-butul percaya Kabar Bae tentang Yesus Kristus, deng karna dorang lia ngoni pe hati bae waktu ngoni bakase pa orang laeng.

Ibrani 3:12

Jadi sudara-sudara, ngoni musti ati-ati. Jang sampe ada satu dari ngoni yang pe hati jahat sama deng itu, sampe so tara percaya deng tara iko lagi pa Tuhan Allah yang hidup.

Ibrani 7:28

Barang, kalu iko aturan-aturan di lima kitab Musa, orang yang dapa angka jadi imam basar, dorang itu cuma manusia biasa saja yang gampang tagoda biking dosa. Tapi abis Tuhan Allah kase aturan-aturan itu, Dia biking lagi janji yang baru deng sumpa la Dia angka Dia pe Anak sandiri, Yesus Kristus. Dia pe Anak itu sempurna, deng Dia jadi Imam yang kase bae-bae torang pe hubungan deng Tuhan Allah sampe slama-lamanya.

Ibrani 9:15

Kong deng samua yang Yesus Kristus biking itu, Dia jadi sama deng jambatan untuk biking janji yang baru antara Tuhan Allah deng manusia. Deng Yesus Kristus mati untuk kase slamat itu, samua orang yang Tuhan Allah pangge iko pa Dia mo tarima apa yang Dia janji. Janji itu hidup deng Tuhan Allah slama-lamanya. Barang, Yesus Kristus mati untuk tebus manusia pe dosa-dosa yang dong biking waktu masi iko janji yang lama.

Ibrani 10:19

Sudara-sudara, Yesus Kristus pe dara so tatumpa untuk hapus torang pe dosa-dosa, jadi skarang torang tara usa tako lagi untuk datang pa Tuhan Allah, itu sama deng torang barani maso pa Tuhan Allah pe Ruang Paling Suci.

Ibrani 10:23

Mari suda torang tetap pegang kuat torang pe percaya pa Yesus yang torang so akui itu, Dia itu torang pe tampa baharap. Barang, Tuhan Allah itu setia, Dia pasti biking samua yang Dia so janji pa torang.

Ibrani 13:22

Sudara-sudara, kita minta deng sunggu-sunggu supaya ngoni dengar bae-bae kita pe nasehat ini, biar lagi cuma pende saja kita pe surat ini.