Ibrani 2:16 - Perjanjian Baru Bahasa Melayu Maluku Utara

¹⁶ Jadi so jelas skali, Yesus datang di dunia bukang untuk tolong pa malaekat-malaekat, tapi Dia datang untuk tolong pa torang, bapa Abraham pe turunan.

Ibrani 2:16 Referans Kwoze

Galatia 3:29

Kong karna ngoni itu Yesus Kristus pe umat, itu berarti, ngoni me so jadi Abraham pe turunan, deng ngoni lagi ada hak mo tarima apa yang Tuhan Allah ada janji dulu pa Abraham.

Galatia 3:16

Bagitu lagi deng Tuhan Allah pe janji-janji yang Dia biking pa Abraham deng Abraham pe turunan. Di Kitab Suci itu, tara tatulis Tuhan Allah kase Dia pe janji itu pa “Abraham pe turunan-turunan” sama deng janji itu untuk banya orang, tapi ada tulis, Dia kase Dia pe janji itu cuma pa “Abraham pe turunan” saja, jadi itu pe maksut, janji itu cuma pa satu orang saja, Dia itu Yesus Kristus.

Ibrani 12:10

Barang, torang pe papa di dunia, dorang togor pa torang tara lama, cuma selama torang jadi ana saja. Kong dorang togor pa torang itu, iko deng apa yang dong anggap butul. Tapi kalu Tuhan Allah togor pa torang, Dia ingin supaya torang jadi bae, deng supaya torang jadi sama deng Dia yang suci.

Ibrani 6:16

Barang, biasa kalu ada orang kase kuat dia pe janji, dia basumpa pake nama yang lebe tinggi dari dia. Dia pe sumpa itu biking kuat dia pe janji, supaya samua orang jadi percaya dia mo biking apa yang dia so janji itu.

Roma 2:25

Torang orang Yahudi, torang dapa sunat supaya jadi tanda, Tuhan Allah pili pa torang jadi Dia pe umat. Kalu torang biking aturan di lima kitab Musa, sunat itu ada arti torang itu butul-butul Tuhan Allah punya. Tapi kalu torang tara iko aturan di lima kitab Musa, sunat itu jadi tarada arti.

1 Petrus 1:20

Waktu dunia ini bolong ada, Tuhan Allah so pili pa Yesus Kristus. Kong di hari-hari yang so dekat deng kiamat ini, Dia so datang di dunia supaya ngoni samua bole slamat dari ngoni pe dosa-dosa.

Ibrani 2:15

Deng karna Yesus kase kala Iblis pe kuasa yang biking orang mati slama-lamanya itu, Dia kase ilang torang manusia pe rasa tako mati yang kuasai torang pe hidup ini. Barang, selama manusia hidup, manusia rasa tako mati, macam deng orang karja yang tako pa dia pe tuang.

Ibrani 2:17

Kong karna Dia mo tolong pa torang yang jadi Dia pe sudara, Tuhan Allah musti biking Yesus jadi sama persis deng torang manusia. Deng karna Yesus so rasa samua yang torang so rasa, Dia bole kase tunju Dia pe rasa kasiang pa torang manusia, sampe bole kase Dia pe diri mati untuk tebus torang pe dosa-dosa. Deng Dia mati itu, Yesus jadi Imam Basar yang setia pa Tuhan Allah supaya torang deng Tuhan Allah pe hubungan jadi bae ulang.