Ibrani 2:14 - Perjanjian Baru Bahasa Melayu Maluku Utara

¹⁴ Ana-ana yang Yesus bilang itu, dorang itu cuma manusia biasa saja. Yesus datang di dunia jadi manusia supaya jadi sama deng dorang. Kong karna Dia jadi manusia, Dia bisa mati. Deng karna Dia mati itu, Dia kase kala pa Iblis, setang-setang pe raja yang ada kuasa biking orang mati.

Ibrani 2:14 Referans Kwoze

2 Timotius 1:10

Kong skarang Tuhan Allah so kase Dia pe bae itu pa torang. Yesus Kristus so datang deng kase slamat pa torang dari tong pe dosa, kong kase ancor kuasa yang biking sampe orang bisa mati slama-lamanya. Jadi sapa yang percaya Kabar Bae tentang Yesus Kristus, dia hidup deng Tuhan Allah sampe slama-lamanya.

Roma 8:3

Kalu torang iko aturan-aturan di lima kitab Musa, tara mungkin torang dapa slamat, karna torang ini manusia yang tara mampo biking samua aturan itu. Tapi torang bole dapa slamat karna Tuhan Allah. Tuhan Allah kase slamat pa torang deng cara Dia utus Dia pe Anak sandiri datang di dunia ini. Dia pe Anak pe badan itu, sama deng torang manusia berdosa pe badan. Kong Dia pe Anak itu mati supaya hapus torang pe dosa. Deng Dia kase Dia pe Anak mati bagitu, itu pe arti, Dia pe Anak so kase kala dosa pe kuasa.

Kolose 2:15

Kong waktu Yesus Kristus mati di kayu salib itu, Dia so kase kala pa samua kuasa jahat yang berkuasa, supaya Tuhan Allah kase tunju pa samua orang, Dia itu yang menang.

Yohanes 1:14

Tuhan Allah pe Firman itu so jadi manusia, kong Dia tinggal di antara torang. Torang so lia Dia pe kuasa yang hebat, kuasa yang Dia dapa dari Tuhan Allah, Dia pe Bapa, karna Dia itu Tuhan Allah pe Anak. Kong Tuhan Allah pe Anak itu cuma satu itu saja. Dia yang biking torang bole tau yang butul tentang Tuhan Allah deng tentang Tuhan Allah pe sayang pa torang.

Ibrani 9:15

Kong deng samua yang Yesus Kristus biking itu, Dia jadi sama deng jambatan untuk biking janji yang baru antara Tuhan Allah deng manusia. Deng Yesus Kristus mati untuk kase slamat itu, samua orang yang Tuhan Allah pangge iko pa Dia mo tarima apa yang Dia janji. Janji itu hidup deng Tuhan Allah slama-lamanya. Barang, Yesus Kristus mati untuk tebus manusia pe dosa-dosa yang dong biking waktu masi iko janji yang lama.

1 Korintus 15:50

Sudara-sudara, kita pe maksut itu bagini: torang pe badan yang dari dunia ini ada daging deng dara, jadi tara bisa maso di Tuhan Allah pe tampa Berkuasa sebagai Raja. Torang tara bisa tinggal di sorga deng badan yang akan mati deng ancor ini, karna di sorga tara ada yang akan mati.

Wahyu 1:18

Kita ini yang hidup! Memang Kita so perna mati, tapi lia skarang Kita so hidup ulang, kong Kita tetap hidup sampe slama-lamanya. Kita yang pegang samua kunci maut, itu berarti, Kita ada kuasa untuk kase hidup ulang orang yang so mati. Pa Kita me ada kunci kerajaan maut, itu berarti, Kita ada kuasa di tampa orang-orang yang mati.

Roma 14:9

Karna untuk itu suda, Yesus Kristus so mati kong hidup ulang, supaya Dia jadi samua orang pe Tuhan, orang-orang yang masi hidup deng orang-orang yang so mati.

Ibrani 2:18

Jadi, karna Dia sandiri so perna menderita waktu dapa goda, Dia me mampo tolong pa torang waktu torang dapa goda.

Wahyu 2:10

Ngoni tara usa tako kalu nanti ngoni masi dapa siksa. Dengar bae-bae, nanti babarapa orang dari ngoni, Iblis mo coba, ngoni butul-butul percaya pa Kita ka tarada. Cobaan itu macam bagini, ngoni mo dapa maso di penjara kong dapa siksa di situ selama spulu hari. Tapi biar ngoni dapa siksa sampe mo mati me, ngoni musti tetap percaya pa Kita. Kalu ngoni tetap batahang percaya, Kita mo kase pa ngoni hidup deng Tuhan Allah slama-lamanya, itu sama deng ngoni dapa makota, tanda ngoni so menang.

Ibrani 4:15

Barang, Yesus Kristus torang pe Imam Basar itu, Dia mangarti skali torang manusia ini tara kuat kong gampang tagoda biking barang jahat. Karna waktu Dia di dunia, Dia me perna dapa goda macam-macam sama deng torang, cuma Dia tara perna tagoda sampe biking dosa.

Galatia 4:4

Tapi, bagitu waktu yang Tuhan Allah tentukan so sampe, Tuhan Allah utus Dia pe Anak datang di dunia. Anak itu yang lahir dari parampuang satu, kong Anak itu, hidup iko agama Yahudi pe aturan-aturan yang ada di lima kitab Musa.

Yohanes 12:24

Inga bae-bae yang Kita bilang ini. Apa yang mo jadi pa Kita nanti, Kita ambe conto bagini: kalu orang tanam gandum pe biji, biji itu tara batumbu kalu tara isi dalam tana. Itu sama deng biji itu mati dulu baru mo batumbu, abis itu baru dia mo babua banya.

Wahyu 20:2

Dia tangka pa naga itu kong ika. Naga itu, ular tua yang orang sebut ‘Iblis, setang-setang pe raja’. Dia ika pa naga itu selama saribu taong,

Wahyu 12:9

Naga basar itu, setang-setang pe raja yang dong jaga bilang ‘Iblis’. Naga itu yang dari dulu salalu kase sesat orang-orang di seluru dunia ini. Dia deng malaekat-malaekat yang iko pa dia, samua dapa buang dari sorga di bumi.

1 Timotius 3:16

Ajaran yang Tuhan Allah kase pa torang itu butul, kong pe bagus skali, tarada yang bisa lawan! Biar dulu orang bolong tau ajaran itu, skarang Tuhan Allah so kase tau pa torang bagini: Yesus so datang jadi manusia. Roh Kudus yang kase tunju pa torang Dia itu Orang yang butul, deng malaekat-malaekat lia pa Dia. Dia pe Kabar so tasiar sampe di bangsa-bangsa laeng, kong orang-orang di dunia ini percaya pa Dia. Tuhan Allah so angka pa Dia di sorga deng cara yang luar biasa.

Matius 25:41

Turus, Dia mo babilang pa orang-orang yang ada pa Dia pe sabla kiri bagini, ‘Bajao suda dari sini ngoni orang-orang yang Tuhan so kutuk, kong ka sana suda maso di api yang tara mati-mati itu, yang so kase sadia untuk Iblis deng dia pe ana-ana bua.

Matius 16:17

Kong Yesus bilang pa Simon, “Simon, Yunus pe ana! Ngana paling sanang suda, barang yang ngana bilang itu bukang manusia yang kase tau, tapi Kita pe Bapa di sorga yang kase tau.

1 Korintus 1:28

Tuhan Allah me pili pa orang-orang yang manusia anggap tara penting, yang hina, deng yang manusia anggap tara pake-pake, jadi percaya pa Dia. Deng bagitu, orang yang manusia anggap penting jadi sadar, samua yang dorang anggap penting, tara ada arti apa-apa pa Tuhan Allah.

Ibrani 2:17

Kong karna Dia mo tolong pa torang yang jadi Dia pe sudara, Tuhan Allah musti biking Yesus jadi sama persis deng torang manusia. Deng karna Yesus so rasa samua yang torang so rasa, Dia bole kase tunju Dia pe rasa kasiang pa torang manusia, sampe bole kase Dia pe diri mati untuk tebus torang pe dosa-dosa. Deng Dia mati itu, Yesus jadi Imam Basar yang setia pa Tuhan Allah supaya torang deng Tuhan Allah pe hubungan jadi bae ulang.

Ibrani 10:5

Kong karna binatang korban persembahan pe dara itu tara cukup untuk hapus manusia pe dosa, itu yang biking sampe Yesus Kristus bilang bagini waktu Dia datang di dunia, “Tuhan Allah, Tuhan tara mau binatang korban persembahan deng persembahan-persembahan laeng, tapi Tuhan Allah so sadia Kita pe badan untuk jadi persembahan pa Tuhan Allah.

Ibrani 10:10

Yesus Kristus ada iko Tuhan Allah pe mau waktu Dia jadi korban persembahan satu kali untuk slama-lamanya. Kong deng Dia kase korban Dia pe diri itu, Dia biking torang jadi Dia pe umat yang bersi dari dosa satu kali untuk slama-lamanya.

1 Petrus 1:20

Waktu dunia ini bolong ada, Tuhan Allah so pili pa Yesus Kristus. Kong di hari-hari yang so dekat deng kiamat ini, Dia so datang di dunia supaya ngoni samua bole slamat dari ngoni pe dosa-dosa.