Ibrani 12:13 - Perjanjian Baru Bahasa Melayu Maluku Utara

¹³ Kong hidup iko turus pa Tuhan Allah saja supaya orang laeng yang kurang percaya pa Tuhan Allah bole iko ngoni pe conto itu, turus dorang me jadi percaya kuat pa Tuhan Allah. Itu bole kase sama deng ngoni bajalang di jalang yang lurus supaya orang yang pe kaki tempang mo iko pa ngoni la jang dong bajalang tasala lagi tapi bisa bajalang bae-bae.

Ibrani 12:13 Referans Kwoze

Galatia 6:1

Sudara-sudara, kalu ngoni dapa ngoni pe sudara satu yang percaya ada biking dosa, lebe bae ngoni yang Roh Kudus kuasai kase nasehat pa dia bae-bae supaya jang dia biking bagitu lagi, kong dia bole bale ulang di jalang yang butul. Ngoni me musti jaga-jaga supaya ngoni sandiri jang sampe tagoda untuk biking dosa sama deng orang itu.

Yakobus 5:16

Jadi lebe bae ngoni baku mangaku ngoni pe dosa deng baku kase berdoa, supaya ngoni jadi sembu. Orang yang hidup butul pa Tuhan Allah pe muka, dia pe doa ada kuasa basar skali sampe ada dia pe hasil.

Lukas 3:5

Tiap jurang akan dapa tutu deng tana, tiap gunung deng bukit akan dapa kase rata. Jalang yang babelok-belok akan dapa kase lurus, deng jalang yang babalobang akan dapa kase rata,

Galatia 2:14

Yang dorang biking itu, kita lia tara baku cocok deng Kabar Bae tentang Yesus Kristus. Padahal, cuma Kabar Bae itu yang butul. Jadi kita bilang pa Petrus di samua orang pe muka, “Ngana orang Yahudi, tapi ngana so percaya pa Yesus Kristus, jadi ngana tara musti hidup iko aturan yang orang Yahudi jaga iko. Tapi bikiapa kong ngana paksa orang yang bukang Yahudi hidup iko agama Yahudi pe aturan-aturan untuk jadi percaya pa Yesus Kristus?”

1 Petrus 2:24

Dia sandiri yang tanggung torang pe dosa waktu Dia mati di kayu salib, supaya torang bole bebas dari dosa pe kuasa, kong torang bole hidup untuk biking barang yang butul pa Tuhan Allah pe muka. Kong karna Dia pe luka-luka itu, torang jadi bae.