Filipi 2:5 - Perjanjian Baru Bahasa Melayu Maluku Utara

⁵ Kong ngoni pe sifat musti sama deng Kristus Yesus pe sifat yang macam bagini:

Filipi 2:5 Referans Kwoze

1 Yohanes 2:6

Jadi sapa saja yang bilang dia hidup satu hati deng Tuhan Allah, dia musti hidup sama deng Yesus Kristus pe cara hidup.

Matius 11:29

Dengar kong iko suda Kita pe parenta, sama deng sapi yang ada kase pake tali kong iko dia pe tuang pe parenta. Balajar suda dari Kita karna Kita ini bae-bae deng tara sombong, kong ngoni pe hati akan jadi tenang.

1 Petrus 2:21

Karna Tuhan Allah pangge pa ngoni untuk biking barang yang bae biar lagi menderita, barang Yesus Kristus me so menderita kong so kase conto tahang menderita, supaya ngoni pe hidup me iko conto yang Dia so kase tunju.

1 Petrus 4:1

Yesus Kristus so menderita, karna itu ngoni musti kase kuat ngoni pe hati deng pikiran supaya siap menderita sama deng Dia. Karna sapa yang menderita, dia so berenti biking dosa.

1 Korintus 10:33

Ngoni biking suda sama deng yang kita jaga biking: di samua hal yang kita biking, kita biking samua itu bae-bae supaya samua orang sanang deng apa yang kita biking itu. Apa saja yang kita biking, itu bukang untuk kita pe bae sandiri, tapi untuk orang banya pe bae, supaya dorang me bole dapa slamat.

Efesus 5:2

Ngoni musti hidup baku-baku sayang, sama deng Kristus Yesus me sayang pa torang sampe Dia serakan Dia pe diri mati untuk torang. Kong apa yang Dia biking itu Tuhan Allah tarima, sama deng korban persembahan yang bobou sadap yang biking Tuhan Allah pe hati sanang.

Roma 15:5

Tuhan Allah yang biking orang bole tetap percaya biar dapa siksa, deng yang kase smangat orang pe hati supaya lebe tamba kuat iko pa Dia. Kita minta pa Dia supaya Dia tolong pa ngoni la ngoni bole hidup satu hati deng ngoni pe sudara yang sama-sama percaya, iko Kristus Yesus pe cara hidup.

Kisah Para Rasul 20:35

Deng karja karas bagitu, kita so kase conto pa ngoni la ngoni me karja karas untuk bantu pa orang-orang yang tara mampo. Torang musti inga yang Tuhan Yesus so bilang, karna Dia sandiri yang bilang, ‘Kalu torang dapa apa-apa dari orang, torang pasti sanang, tapi yang lebe sanang itu torang yang bakase apa-apa pa orang laeng.’ ”

Roma 15:3

Torang musti biking bagitu, karna Yesus Kristus me tara cari Dia pe sanang sandiri, tapi Dia siap orang hina. Itu sama deng yang ada tatulis di Kitab Suci bagini, “Kata-kata tara bae yang orang-orang bilang pa Tuhan Allah, itu so kanal pa kita.”

Lukas 22:27

Coba ngoni pikir, sapa yang lebe penting, orang yang dudu makang, atau orang yang jaga layani pa dia? Tantu orang yang ada dudu makang, to? Tapi Kita tara bagitu, waktu Kita ada pa ngoni pe tenga-tenga, Kita yang layani pa ngoni.

Roma 14:15

Tapi kalu ngoni makang makanang yang ngoni pe sudara yang percaya anggap haram sampe dia pe hati saki, itu berarti, ngoni tara sayang pa dia. Jadi jang ngoni makang atau minum apa-apa yang dia anggap haram, kalu gara-gara itu dia jadi berdosa, barang Yesus Kristus me mati untuk dia.

Kisah Para Rasul 10:38

Tuhan Allah pili pa Yesus dari Nazaret kong kase Dia pe Roh Kudus deng kase Dia pe kuasa. Abis itu, Yesus bajalang bakuliling kong biking banya barang yang bae, deng kase sembu pa orang-orang yang Iblis kuasai, barang Tuhan Allah ada sama-sama deng Dia.

Filipi 1:1

Sudara-sudara yang so jadi Tuhan Allah pe umat di kota Filipi, deng ngoni yang pimpin jemaat, deng diaken-diaken. Salam dari kita Paulus deng Timotius. Torang dua ini yang jaga biking apa yang Kristus Yesus suru.