Filemon 1:9 - Perjanjian Baru Bahasa Melayu Maluku Utara

⁹ Tapi kita inga ngana pe sayang pa orang-orang percaya. Karna itu, kita tara mo suru-suru pa ngana, tapi kita lebe suka minta pa ngana. Kita ini so tua, deng apalagi skarang kita me ada dapa kase maso dalam penjara karna kita kase tau tentang Kristus Yesus pa orang-orang.

Filemon 1:9 Referans Kwoze

Efesus 4:1

Sudara-sudara, karna Tuhan so kase Dia pe bae yang basar itu pa torang, jadi ini nasehat dari kita yang skarang ada di penjara gara-gara kita jaga biking apa yang Tuhan suru. Tuhan so pangge pa ngoni la iko pa Dia, jadi kita bilang pa ngoni supaya ngoni hidup butul sama deng yang pantas untuk orang yang so iko pa Dia.

2 Korintus 5:20

Jadi torang biking tong pe tugas itu, Yesus Kristus yang utus pa torang. Torang kase tau tentang Dia, itu sama deng Tuhan Allah sandiri yang bicara pa ngoni pake torang pe kata-kata. Deng Yesus Kristus pe kuasa, tong dua minta supaya ngoni kase ngoni pe diri suda pa Tuhan Allah la Dia biking ngoni pe hubungan jadi bae-bae ulang deng Dia.

Roma 12:1

Sudara-sudara, Tuhan Allah bagitu kasiang pa torang. Karna itu, kita minta butul-butul pa ngoni: serakan suda ngoni pe diri pa Tuhan Allah untuk iko Dia pe mau, itu sama deng ngoni pe hidup so jadi korban persembahan pa Dia. Ngoni kase ngoni pe hidup jadi Dia punya, deng ngoni hidup untuk biking Dia pe hati sanang. Itu baru bilang ngoni pe ibada itu butul.

Efesus 3:1

Sudara-sudara, kita Paulus dapa kase maso di penjara, barang kita kase tau Kabar Bae tentang Kristus Yesus untuk ngoni orang-orang bukang Yahudi.

1 Petrus 2:11

Sudara-sudara yang kita sayang, ngoni orang-orang percaya ini sama deng orang-orang pendatang deng orang-orang yang cuma hidup sementara saja di dunia ini. Jadi kita kase nasehat pa ngoni, jang ngoni hidup iko ngoni pe keinginan yang tara bae yang salalu baku lawan deng ngoni pe mau untuk biking barang yang bae.

Ibrani 13:19

Kong kita minta supaya ngoni kase berdoa kusus pa kita, ngoni minta supaya Tuhan Allah buka jalang la kita bisa capat bale ulang pa ngoni.

2 Korintus 6:1

Torang deng Tuhan Allah karja sama-sama untuk kase tau Kabar Bae tentang Yesus Kristus pa orang-orang. Ngoni ini so tarima Tuhan Allah pe bae waktu Yesus Kristus dapa salib, jadi torang minta pa ngoni, jang kase sia-sia Tuhan Allah pe bae itu.

Galatia 3:26

Jadi sudara-sudara, ngoni so jadi Tuhan Allah pe ana-ana karna ngoni so percaya pa Yesus Kristus.

Efesus 6:20

Kita ini Yesus Kristus pe utusan yang kase tau Kabar Bae itu. Kong karna kita kase tau Kabar Bae itu, kita dapa kase maso di penjara ini. Ngoni kase berdoa supaya kita bole barani kase tau Kabar Bae itu, sama deng yang musti kita bilang.

1 Timotius 1:12

Kita bersukur pa Kristus Yesus, torang pe Tuhan yang kase kuat pa kita. Kita bersukur pa Dia karna Dia anggap kita ini Dia pe orang yang setia sampe Dia kase percaya pa kita biking Dia pe tugas yang Dia suru.

Titus 2:2

Ngana kase ajar pa laki-laki yang so tua supaya dorang mampo batahang diri, deng dong pe kalakuang musti bae yang biking orang hormati pa dorang. Dorang musti tau bawa diri bae-bae, percaya kuat pa Tuhan, deng sayang pa orang laeng. Biar susa me, dorang musti tetap iko pa Tuhan.