Efesus 5:4 - Perjanjian Baru Bahasa Melayu Maluku Utara

⁴ Bagitu lagi, ngoni tara bole bilang kata-kata yang kotor, deng kata-kata yang tarada dia pe guna. Ngoni me jang basangaja deng kata-kata yang kurang ajar. Barang, samua kata-kata itu tara pantas untuk ngoni yang so percaya pa Yesus Kristus mo bilang. Tapi yang paling bae yang ngoni musti biking itu, ngoni bilang tarimakasi suda pa Tuhan Allah.

Efesus 5:4 Referans Kwoze

Kolose 3:8

Tapi skarang, ngoni buang suda samua yang tara bae, macam ini: pangmara, mara-mara sampe marontak, binci sampe biking barang jahat, kase tara bae orang pe nama, deng kase kaluar kata-kata kotor.

Efesus 4:29

Kalu ngoni bicara, jang ada kata-kata tara bae kaluar dari ngoni pe mulu. Lebe bae, yang musti ngoni pake waktu bicara itu, kata-kata yang bisa kase kuat orang laeng pe hati, deng kata-kata yang perlu dorang dengar untuk dong pe bae.

1 Tesalonika 5:18

Ada apa saja, mo susa ka sanang ka, ngoni musti bilang tarimakasi turus pa Tuhan Allah. Barang, itu Tuhan Allah pe mau untuk samua orang yang percaya pa Kristus Yesus.

2 Petrus 2:18

Barang, dorang kalu bicara, makang puji skali, padahal yang dong bicara itu tara ada guna. Dorang buju orang-orang yang baru percaya pa Tuhan supaya dorang biking barang yang tara bae iko manusia pe napsu saja. Padahal orang-orang yang dapa buju itu bolong lama talapas dari dong pe percaya yang sala.

Ibrani 13:15

Kong karna Yesus Kristus so jadi korban di kayu salib untuk hapus torang pe dosa, torang so tara perlu lagi bawa binatang korban persembahan untuk hapus torang pe dosa. Jadi, mari suda torang puji-puji pa Tuhan Allah. Torang pe kata-kata itu, so sama deng torang so serakan torang pe korban persembahan pa Dia.

Filipi 4:6

Jadi tara usa suda ngoni hawater tentang apa-apa. Tapi, ngoni musti berdoa suda, minta pa Tuhan Allah tentang samua hal. Ngoni kase tau suda samua ngoni pe perlu pa Tuhan Allah, deng bilang tarimakasi banya pa Dia.

Yudas 1:10

Tapi orang-orang yang bawa ajaran tara butul itu, dorang bicara tara bae tentang samua ajaran yang dong tara mangarti. Dorang itu pe kalakuang sama deng binatang. Dorang itu tara bapikir, tapi iko saja apa yang dong pe badan pe mau. Itu yang nanti biking dong dapa hukuman tapisa deng Tuhan Allah slama-lamanya.

2 Korintus 9:15

Mari torang bilang tarimakasi pa Tuhan Allah, karna waktu Dia kase Yesus Kristus mati untuk kase slamat pa torang dari dosa-dosa, itu bole kase sama deng hadia yang paling bagus. Hadia itu pe bagus, torang tara dapa bilang deng kata-kata.

Markus 7:22

baku suka deng orang yang bukang dia pe laki atau dia pe bini, golojo orang pe barang, kalakuang jahat, putar bale, napsu tara bae, mangiri, kase tara bae orang pe nama, sombong deng suka malawang.

Yudas 1:13

Dorang tara tau malu kase lia dong pe kalakuang yang tara bae, sama deng omba basar yang kase tinggal kotor-kotor di pante. Dorang me sama deng bintang-bintang yang bapinda kasana-kamari. Jadi untuk dorang itu, so tasadia tampa yang paling galap untuk slama-lamanya.

2 Korintus 1:11

Kong ngoni me musti kase berdoa pa torang turus-turus, karna deng ngoni pe doa itu, nanti ada banya orang yang bilang tarimakasi pa Tuhan Allah karna Dia kase Dia pe bae pa torang, deng karna Dia so dengar ngoni samua pe doa itu untuk torang.

Roma 1:28

Deng karna dorang rasa dong tara perlu tau tentang Tuhan Allah, jadi Tuhan Allah kase biar dorang pe pikiran yang tara guna itu kuasai pa dorang. Dia pe ahir kabawa, dorang biking barang yang tara pantas dong biking.

2 Petrus 2:7

Tapi Lot, Tuhan Allah kase slamat pa dia dari kota itu. Lot itu orang yang jaga biking apa yang butul pa Tuhan Allah pe muka. Dia turus-turus sedi skali karna orang-orang yang ada di sekitar dia pe cara hidup tara bae, karna dorang cuma iko dong pe napsu.

Filemon 1:8

Filemon, Yesus Kristus ada kase kuasa pa kita, karna itu kita bole mo suru pa ngana untuk biking apa yang musti ngana biking.

1 Tesalonika 3:9

Torang bilang tarimakasi banya pa Tuhan Allah torang pe Tuhan deng hati yang sanang skali, karna ngoni tetap percaya pa Dia.

Efesus 1:16

kita tara berenti-berenti bilang tarimakasi banya pa Tuhan Allah karna ngoni. Deng waktu kita berdoa, kita salalu inga pa ngoni.

Yohanes 6:23

Sementara itu, ada orang-orang laeng yang datang deng dorang pe parau-parau dari kota Tiberias. Dorang sampe di dekat tampa yang orang banya ada makang roti kalamaring, waktu Yesus abis bilang tarimakasi pa Tuhan Allah.