Efesus 5:2 - Perjanjian Baru Bahasa Melayu Maluku Utara

² Ngoni musti hidup baku-baku sayang, sama deng Kristus Yesus me sayang pa torang sampe Dia serakan Dia pe diri mati untuk torang. Kong apa yang Dia biking itu Tuhan Allah tarima, sama deng korban persembahan yang bobou sadap yang biking Tuhan Allah pe hati sanang.

Efesus 5:2 Referans Kwoze

Yohanes 13:34

Skarang, Kita mo kase parenta yang baru pa ngoni, bagini: ngoni ini musti baku sayang. Ngoni musti baku sayang sama deng Kita so sayang pa ngoni.

Galatia 2:20

Jadi, skarang kita hidup tara iko kita pe kekuatan sandiri lagi, tapi Yesus Kristus yang hidup deng berkuasa pa kita pe diri. Kong selama kita hidup di dunia skarang ini, kita hidup cuma deng percaya saja pa Anak Allah. Dia yang so sayang pa kita deng yang so serakan Dia pe diri mati untuk kita.

Kolose 3:14

Kong yang paling penting dari samua itu, ngoni musti baku-baku sayang satu deng yang laeng. Barang, deng ngoni baku-baku sayang bagitu, ngoni taika jadi satu, deng sempurna.

2 Korintus 2:15

Barang, waktu torang kase tau Kabar Bae tentang Yesus Kristus pa orang-orang, torang sama deng kemenyan yang jadi persembahan yang bobou sadap dari Yesus Kristus untuk Tuhan Allah. Orang-orang yang akan dapa slamat dari dosa-dosa, dorang tarima Kabar Bae itu sama deng Kabar Bae itu jadi bobou sadap pa dorang. Tapi orang-orang yang akan mati tapisa deng Tuhan Allah, dorang itu tara tarima Kabar Bae itu, sama deng Kabar Bae itu jadi bobou busu pa dorang.

Titus 2:14

Dia yang so serakan Dia pe diri untuk mati la kase bebas pa torang dari torang pe dosa. Dia biking torang pe hati jadi bersi, sampe torang jadi Dia pe umat sandiri yang suka biking barang yang bae.

1 Korintus 16:14

Samua yang ngoni biking, ngoni biking suda itu deng rasa sayang.

Matius 20:28

Itu sama deng Anak Manusia yang dari sorga datang di dunia ini bukang untuk dapa layani, tapi untuk layani deng kase diri mati la tebus orang banya pe dosa.”

1 Petrus 4:8

Yang paling penting, ngoni musti butul-butul baku sayang satu deng yang laeng. Karna deng torang baku sayang, tong so tara inga orang laeng pe sala pa torang biar pe banya skali.

2 Korintus 8:9

Sebenarnya kita tara perlu suru ngoni bantu pa dorang, barang ngoni so tau Yesus Kristus torang pe Tuhan pe bae yang Dia so kase pa ngoni. Biar Dia punya samua-samua yang ada, tapi karna Dia sayang pa torang, Dia kase tinggal samua itu supaya jadi manusia yang tara punya apa-apa. Dia biking bagitu la torang dapa banya yang bae dari Tuhan Allah.

1 Yohanes 3:16

Torang tau sayang yang butul-butul itu sama deng Yesus Kristus pe sayang. Dia so kase Dia pe diri sampe mati untuk torang supaya torang dapa slamat. Jadi torang me musti siap kase tong pe diri sampe mati untuk torang pe sudara-sudara yang percaya.

Wahyu 1:5

deng pa Yesus Kristus. Yesus Kristus itu yang setia kase tau Tuhan Allah pe pasáng. Dia itu yang kamuka hidup ulang dari antara orang mati. Kong Dia itu Yang Paling Berkuasa dari samua raja di bumi ini. Yesus Kristus itu sayang pa torang. Dia pe dara yang tatumpa waktu Dia mati di kayu salib, kase bebas pa torang dari torang pe dosa-dosa.

Ibrani 9:26

Barang, kalu ulang-ulang kali Dia kase korban Dia pe diri, itu berarti, mulai dari dunia ini jadi, Dia musti ulang-ulang menderita turus. Tapi skarang ini, yang orang bilang dunia so mo kiamat, Dia datang di dunia cuma satu kali saja untuk hapus manusia pe dosa-dosa deng cara Dia kase Dia pe diri sandiri mati untuk jadi korban persembahan.

Ibrani 9:14

Jadi kalu dara deng abu binatang saja bisa kase bersi orang pe dosa-dosa, apalagi deng Yesus Kristus pe dara! Yesus Kristus so kase Dia pe diri sandiri pa Tuhan Allah jadi korban persembahan yang sempurna. Yesus Kristus jadi korban yang sempurna, barang Roh Kudus yang ada turus sampe slama-lamanya itu yang biking Dia mampo kase Dia pe diri bagitu. Dia pe dara itu yang kase bersi torang pe hati dari hal-hal yang tarada dia pe guna, supaya torang bole semba pa Tuhan Allah yang hidup.

1 Timotius 2:6

Dia serakan Dia pe diri untuk kase slamat samua manusia dari dosa. Deng bagitu, Tuhan Allah kase tunju bukti di waktu yang Dia tentukan, Dia ingin supaya samua manusia dapa slamat.

Efesus 4:15

Tapi torang bilang yang butul pa orang laeng karna torang sayang pa dorang. Kong dalam samua hal, torang pe sifat lebe hari lebe tamba bae sampe sama deng Yesus Kristus pe sifat. Dia itu torang samua yang percaya pe pemimpin, sama deng Dia itu torang pe kapala.

1 Yohanes 3:23

Tuhan pe parenta itu bagini: torang musti percaya pa Yesus Kristus, Anak Allah, deng torang lagi musti baku sayang, sama deng parenta yang Yesus Kristus so kase pa torang.

1 Timotius 4:12

Jang kase biar orang pandang enteng pa ngana gara-gara ngana masi muda. Tapi lebe bae, ngana jadi conto pa orang percaya pake ngana pe bicara, ngana pe kalakuang, ngana pe sayang pa orang laeng, ngana pe percaya pa Tuhan, deng lagi ngana pe cara hidup yang bersi pa Tuhan Allah pe muka.

1 Tesalonika 4:9

Turus tentang bagimana cara ngoni hidup baku sayang deng sudara-sudara yang percaya, kita rasa itu so tara perlu torang mo kase ajar lagi, barang Tuhan Allah sandiri so kase ajar pa ngoni.

Efesus 4:2

Ngoni pe hidup musti bagini: tara basombong, tara kasar pa orang, deng salalu sabar. Biar ada orang yang biking sala pa ngoni, jang capat mara, barang ngoni so baku sayang.

Efesus 3:17

supaya Yesus Kristus tetap tinggal di ngoni pe hati karna ngoni percaya pa Dia. Kita minta pa Tuhan Allah supaya ngoni pe sayang lebe tamba basar pa Tuhan Allah deng pa samua orang, itu sama deng pohong pe akar yang lebe tatanam kuat di tana.

Galatia 1:4

Tuhan Yesus Kristus yang so serakan Dia pe diri untuk tebus torang pe dosa-dosa, supaya Dia bole kase bebas pa torang dari kuasa jahat yang skarang ada di dunia ini. Dia biking samua itu, iko Tuhan Allah, torang pe Bapa pe mau.

Wahyu 5:9

Kong dorang manyanyi puji pa Anak Domba itu deng lagu baru bagini: “Anak Domba ini yang pantas tarima kitab tagulung itu, deng yang pantas buka tuju segel yang talém di kitab itu. Barang, Anak Domba ini so perna dapa bunu, kong Dia pe dara so tatumpa untuk hapus orang-orang pe dosa dari tiap fam, suku, bahasa deng bangsa supaya dorang jadi Dia pe umat.

Ibrani 9:23

Jadi, Tuhan Allah pe Tenda Ibada deng samua alat yang dong pake di dalam Tenda, samua itu bole kase sama deng tampa semba pa Tuhan Allah di sorga. Tenda di dunia deng samua alat itu musti kase bersi pake binatang korban persembahan pe dara supaya barang-barang itu jadi bersi pa Tuhan Allah pe muka. Tapi tampa semba pa Tuhan Allah di sorga itu musti ada dara korban persembahan yang lebe bae dari binatang korban persembahan pe dara, itu jadi waktu Yesus Kristus kase Dia pe diri jadi korban kong Dia pe dara tatumpa untuk hapus manusia pe dosa.

Efesus 3:19

kong Dia pe sayang itu, lebe basar dari apa yang torang pikir. Kita minta pa Tuhan Allah la ngoni bole butul-butul mangarti Yesus Kristus pe sayang itu, supaya orang lebe tamba dapa lia Tuhan Allah pe sifat pa ngoni pe hidup.

Roma 8:3

Kalu torang iko aturan-aturan di lima kitab Musa, tara mungkin torang dapa slamat, karna torang ini manusia yang tara mampo biking samua aturan itu. Tapi torang bole dapa slamat karna Tuhan Allah. Tuhan Allah kase slamat pa torang deng cara Dia utus Dia pe Anak sandiri datang di dunia ini. Dia pe Anak pe badan itu, sama deng torang manusia berdosa pe badan. Kong Dia pe Anak itu mati supaya hapus torang pe dosa. Deng Dia kase Dia pe Anak mati bagitu, itu pe arti, Dia pe Anak so kase kala dosa pe kuasa.

Efesus 5:25

Ngoni laki-laki yang so kawing, ngoni musti sayang pa ngoni pe bini sama deng Yesus Kristus sayang pa Dia pe jemaat, sampe Dia serakan Dia pe diri mati untuk jemaat itu.

1 Korintus 5:7

Buang suda samua ngoni pe kalakuang yang jahat itu, la ngoni jadi jemaat yang pe hati bersi. Itu bole kase sama deng waktu torang orang Yahudi biking hari raya Roti Tara Pake Ragi, torang buang samua ragi dari torang pe ruma, kong tong biking adonan yang baru yang tara pake ragi. Ngoni memang so bersi karna ngoni so percaya pa Yesus Kristus yang mati untuk tebus torang pe dosa-dosa. Dia itu bole kase sama deng domba yang torang potong untuk biking jadi korban persembahan di torang pe hari raya.

Roma 4:25

Yesus itu yang so serakan Dia pe diri mati untuk torang samua karna torang pe dosa. Tapi Tuhan Allah kase hidup ulang pa Dia supaya Tuhan Allah biking torang jadi orang yang tara sala pa Dia pe muka.

Yohanes 6:51

Kita ini suda makanang yang so turung dari sorga, yang bole kase hidup pa manusia. Sapa saja yang makang makanang ini, dia akan dapa hidup deng Tuhan Allah slama-lamanya. Kong makanang yang Kita mo kase itu, Kita pe badan suda, yang Kita mo kase pa samua orang di dunia ini supaya dorang bole hidup.”

Roma 8:37

Tapi, biar torang mo dapa samua susa itu, itu tara akan bisa kase kala pa torang, mala torang lebe tamba menang karna Yesus Kristus sayang deng tolong pa torang.

Roma 15:16

Dia pangge pa kita jadi Yesus Kristus pe utusan untuk kase tau Kabar Bae dari Tuhan Allah pa orang-orang yang bukang Yahudi. Kita pe tugas itu kita kase sama deng orang Yahudi pe imam pe tugas, karna kalu kita kase tau Kabar Bae itu pa orang bukang Yahudi kong dorang jadi percaya pa Yesus, itu kita so kase sanang Tuhan Allah pe hati, sama deng imam kase binatang korban persembahan pa Tuhan Allah. Kong Tuhan Allah tarima pa dorang karna Roh Kudus so biking dong jadi Tuhan Allah pe umat sandiri.

2 Korintus 2:14

Tapi biar bagitu me, kita bilang tarimakasi banya pa Tuhan Allah, karna Dia salalu pimpin pa torang yang percaya pa Yesus Kristus, supaya torang bisa menang dari kuasa jahat. Tuhan Allah pake pa torang di mana-mana untuk kase tau Kabar Bae tentang Yesus Kristus, supaya orang-orang bisa kanal pa Dia. Waktu dorang dengar Kabar Bae itu, dorang jadi sanang, sama deng dong dapa ciom bobou sadap.

Efesus 1:4

Barang, dulu waktu Tuhan Allah bolong biking dunia ini, Dia so pili pa torang untuk percaya pa Yesus Kristus supaya torang bole jadi Tuhan Allah pe umat yang pe hati bersi, deng tarada sala pa Dia pe muka.

Efesus 5:15

Jadi perhatikan bae-bae ngoni pe cara hidup, jang jadi sama deng orang yang tara tau apa-apa. Tapi ngoni musti hidup sama deng orang yang tau mana yang bae deng mana yang jahat.

Filipi 4:18

Skarang kita so tarima samua yang kita perlu dari ngoni, mala so talebe-lebe lagi. Samua itu Epafroditus yang bawa. Apa yang ngoni kase pa kita, itu biking Tuhan Allah pe hati sanang, kong apa yang ngoni kase itu pantas Tuhan Allah tarima, sama deng dulu orang bakar binatang korban persembahan yang bobou sadap pa Tuhan Allah.

Ibrani 8:3

Barang, tiap imam basar di dunia ini dapa pili untuk biking tugas serakan umat pe binatang korban persembahan deng persembahan laeng pa Tuhan Allah. Bagitu lagi deng Yesus Kristus. Karna Dia torang pe Imam Basar, Dia lagi musti ada persembahan yang Dia kase pa Tuhan Allah.