Efesus 4:9 - Perjanjian Baru Bahasa Melayu Maluku Utara

⁹ Jadi kalu di situ bilang, “Dia so nae di tampa yang tinggi,” itu berarti, Dia lagi so perna turung di bagian yang paling bawa, itu di bumi, to?

Efesus 4:9 Referans Kwoze

Yohanes 3:13

Tara ada satu orang yang so perna nae di sorga, kacuali Anak Manusia yang turung dari sorga kong kase tau pa ngoni tentang apa yang jadi di sorga.

Matius 12:40

Barang, sama deng nabi Yunus ada di dalam ikang basar pe puru selama tiga hari tiga malam, bagitu lagi deng Anak Manusia yang dari sorga, akan ada dalam kubur selama tiga hari tiga malam.

Yohanes 6:33

Barang, makanang yang butul itu makanang yang Tuhan Allah kase turung dari sorga kong biking manusia bole hidup deng Tuhan Allah slama-lamanya.”

Ibrani 2:9

Tapi yang so jelas itu, Yesus Kristus yang berkuasa pa samua-samua yang ada. Dia suda yang Tuhan Allah biking Dia pe posisi sadiki lebe randa dari malaekat-malaekat. Tapi itu cuma sementara saja, cuma waktu Dia ada di dunia ini. Skarang ini, Tuhan Allah so biking Dia jadi hebat deng dapa hormati sama deng Raja karna Dia so menderita sampe mati di kayu salib. Dia rasa samua itu karna Tuhan Allah kase Dia pe bae yang cuma-cuma pa torang samua, supaya torang samua dapa slamat dari dosa-dosa.

Yohanes 20:17

Yesus bilang pa Maria, “Jang pegang pa Kita, karna Kita bolong bale pa Kita pe Bapa. Tapi ngana pigi suda pa Kita pe sudara-sudara yang jaga iko pa Kita kong bilang pa dorang, Kita skarang mo nae pigi pa Kita pe Bapa deng ngoni pe Bapa lagi. Dia itu lagi Kita pe Tuhan Allah deng ngoni lagi pe Tuhan Allah.”

Ibrani 2:7

Tapi Tuhan Allah so biking dia pe posisi cuma sadiki lebe randa dari malaekat-malaekat. Tapi itu cuma sementara saja. Tuhan Allah biking dia jadi hebat, kong dia dapa hormati sama deng raja.

Yohanes 8:14

Yesus bilang pa dorang, “Biar lagi Kita basaksi tentang Kita pe diri sandiri, tapi yang Kita kase tau itu butul, karna Kita tau dari mana Kita datang deng ka mana Kita pigi. Tapi ngoni, ngoni tara tau, dari mana Kita datang deng ka mana Kita pigi.

Yohanes 6:62

Kalu ngoni tara sanang deng Kita pe ajaran ini, bagimana lagi kalu ngoni lia Anak Manusia taangka di sorga, bale pa Dia pe tampa yang dulu?

Yohanes 6:58

Kita ini suda makanang yang so turung dari sorga. Kita ini tara sama deng manna yang torang pe orang tua dulu-dulu makang di padang gurun, barang, biar dorang makang, dorang tetap mati. Tapi sapa saja yang makang makanang yang dari sorga ini, dia akan hidup deng Tuhan Allah slama-lamanya.”

Yohanes 6:51

Kita ini suda makanang yang so turung dari sorga, yang bole kase hidup pa manusia. Sapa saja yang makang makanang ini, dia akan dapa hidup deng Tuhan Allah slama-lamanya. Kong makanang yang Kita mo kase itu, Kita pe badan suda, yang Kita mo kase pa samua orang di dunia ini supaya dorang bole hidup.”

Yohanes 6:41

Kong orang-orang agama Yahudi bafeto tentang Yesus, barang Dia bilang Dia itu suda makanang yang so turung dari sorga.

Yohanes 6:38

Barang, Kita so turung dari sorga bukang untuk biking Kita pe mau, tapi mo biking Kita pe Bapa pe mau. Dia yang utus pa Kita.