Efesus 4:16 - Perjanjian Baru Bahasa Melayu Maluku Utara

¹⁶ Kong Dia yang biking torang yang percaya jadi satu, sama deng torang ini satu badan: torang ini sama deng Dia pe kaki, tangan, deng samua-samua yang ada pa Dia pe badan. Dia pe kuasa ada pa torang samua, jadi kalu torang masing-masing biking tong pe tugas yang Dia so kase, kuasa itu biking torang lebe hari lebe tamba baku sayang deng lebe tamba baku kase kuat torang pe percaya.

Efesus 4:16 Referans Kwoze

Kolose 2:19

Orang-orang macam bagitu so tara butul-butul lagi iko pa Yesus Kristus. Padahal Yesus Kristus itu Kapala dari samua Dia pe umat. Dia yang biking pa torang jadi satu, deng supaya torang pe percaya pa Tuhan lebe tamba kuat. Ini bole kase sama deng kapala deng badan yang jadi satu karna ada sendi-sendi yang tara biking tapisa satu deng yang laeng.

Yohanes 15:5

Kita ini sama deng pohong anggur kong ngoni ini sama deng pohong anggur pe cabang-cabang. Jadi, sama deng pohong deng cabang yang jadi satu, bagitu lagi deng ngoni, kalu ngoni hidup satu hati deng Kita, Kita lagi hidup satu hati deng ngoni, turus ngoni bole biking yang bae yang kase sanang Tuhan Allah pe hati. Karna kalu ngoni tara satu hati deng Kita, ngoni ini tara mampo biking yang bae untuk kase sanang pa Tuhan Allah.

Kolose 2:2

Kita berusaha karas la ngoni lebe tamba percaya pa Yesus deng lebe tamba baku sayang sampe ngoni jadi satu hati. Kita mau supaya ngoni butul-butul mangarti deng yakin, Tuhan Allah pe rahasia yang hebat. Rahasia itu tentang Yesus Kristus yang dari dulu Tuhan Allah tara kase tau pa orang-orang, tapi skarang ngoni so bole tau.

Efesus 4:12

Yesus Kristus kase Dia pe kemampuan pa dorang itu, supaya dorang bole tolong pa orang-orang yang so jadi Tuhan Allah pe umat. Tuhan Allah pe umat itu sama deng Yesus Kristus pe badan. Kalu Tuhan Allah pe umat dapa tolong bagitu, Dia pe umat bole biking dorang pe tugas, deng dorang lagi bole baku kase kuat dong pe percaya,

1 Korintus 13:13

Jadi, skarang tinggal tiga hal yang penting yang torang musti biking turus-turus: percaya pa Tuhan, baharap pa Dia, deng sayang pa orang laeng. Kong dari tiga ini, yang paling penting, itu sayang pa orang laeng.

Efesus 4:15

Tapi torang bilang yang butul pa orang laeng karna torang sayang pa dorang. Kong dalam samua hal, torang pe sifat lebe hari lebe tamba bae sampe sama deng Yesus Kristus pe sifat. Dia itu torang samua yang percaya pe pemimpin, sama deng Dia itu torang pe kapala.

1 Timotius 1:5

Kita kase nasehat ini pa ngana, dia pe tujuan supaya orang-orang percaya baku sayang. Torang bisa baku sayang kalu torang pe hati so bersi, torang pe hati tau apa yang butul, deng tong so butul-butul percaya pa Tuhan.

1 Tesalonika 2:13

Torang lagi salalu bilang tarimakasi pa Tuhan Allah karna waktu torang kase tau pa ngoni Kabar Bae dari Tuhan Allah, ngoni tarima itu deng sanang hati. Ngoni tarima Kabar Bae itu karna ngoni tau, kata-kata itu bukang dari manusia, tapi dari Tuhan Allah. Deng memang itu butul dari Tuhan Allah. Kong Kabar Bae itu bakarja di ngoni pe hati yang percaya pa Yesus Kristus.

Filipi 1:9

Jadi ini kita pe doa untuk ngoni: kita minta pa Tuhan supaya ngoni pe sayang lebe tatamba turus pa Tuhan Allah deng pa samua orang, deng ngoni lebe tamba tau deng mangarti sagala macam hal deng butul-butul,

Efesus 3:17

supaya Yesus Kristus tetap tinggal di ngoni pe hati karna ngoni percaya pa Dia. Kita minta pa Tuhan Allah supaya ngoni pe sayang lebe tamba basar pa Tuhan Allah deng pa samua orang, itu sama deng pohong pe akar yang lebe tatanam kuat di tana.

1 Petrus 1:22

Jadi karna ngoni so iko ajaran yang butul tentang Yesus Kristus, ngoni pe hati so jadi bersi. Deng bagitu, ngoni bisa baku sayang deng hati yang tulus di antara ngoni sudara-sudara yang sama-sama percaya. Karna itu, ngoni musti sunggu-sunggu baku sayang satu deng yang laeng deng hati yang tulus,

Efesus 3:7

Tuhan Allah pe bae pa kita sampe Dia kase tugas pa kita untuk kase tau Kabar Bae tentang Yesus Kristus pa orang-orang. Dia pe bae pa kita itu bantu pa kita supaya kita bole biking tugas itu pake Tuhan Allah pe kuasa yang bakarja di kita pe hati.

Efesus 1:4

Barang, dulu waktu Tuhan Allah bolong biking dunia ini, Dia so pili pa torang untuk percaya pa Yesus Kristus supaya torang bole jadi Tuhan Allah pe umat yang pe hati bersi, deng tarada sala pa Dia pe muka.

Galatia 5:22

Tapi orang yang Roh Kudus kuasai itu dapa lia dari dorang pe hidup macam bagini: pangsayang, hati sanang, hati tenang, pangsabar, pangbae, biking barang yang bae, setia,

1 Yohanes 4:16

Torang so tau deng so percaya, Tuhan Allah paling sayang pa torang. Tuhan Allah itu pangsayang. Jadi sapa yang sayang pa orang-orang, orang itu tetap satu hati deng Tuhan Allah, kong Tuhan Allah me satu hati deng dia.

2 Tesalonika 1:3

Sudara-sudara, torang salalu bilang tarimakasi pa Tuhan Allah untuk ngoni. Torang memang musti biking bagitu karna ngoni pe percaya pa Yesus Kristus lebe tatamba, deng karna ngoni lebe tamba baku sayang.

1 Tesalonika 3:12

Torang minta la Tuhan Allah biking ngoni lebe tamba baku sayang, deng ngoni pe sayang pa orang laeng lebe tatamba, sama deng torang pe sayang pa ngoni.

1 Tesalonika 1:3

Tiap kali torang berdoa pa Tuhan Allah torang pe Bapa, torang inga pa ngoni jemaat di kota Tesalonika. Torang inga samua yang ngoni biking karna ngoni pe percaya. Torang inga ngoni pe bae pa orang-orang karna ngoni sayang pa dorang. Torang inga lagi bagimana ngoni tetap biking barang yang bae biar ngoni dapa susa, karna ngoni salalu batahang percaya deng yakin pa Yesus Kristus, torang pe Tuhan.

Galatia 5:6

Karna untuk torang yang so sama-sama percaya pa Kristus Yesus, torang mo iko aturan sunat itu ka, tarada ka, itu tara penting, tapi yang paling penting torang pe percaya pa Yesus Kristus yang dapa lia dari torang pe sayang pa orang laeng.

1 Korintus 8:1

Skarang kita mo bicara tentang daging yang orang so biking persembahan untuk dorang pe puji-puji. Memang ngoni orang percaya so tau, orang pe puji-puji itu tarada kuasa. Tapi karna ngoni so tau itu, ada dari ngoni yang jadi sombong. Lebe bae ngoni baku sayang, itu yang bole kase kuat orang pe percaya.

Roma 12:4

Ambe conto dari torang pe badan. Pa torang pe badan ini, ada kaki, tangan deng laeng-laeng lagi, kong samua itu ada dia pe tugas masing-masing.

1 Korintus 10:17

Roti itu cuma satu kong ada pela-pela, baru torang makang sama-sama dari roti itu. Jadi, biar torang banya orang tapi torang samua sama deng so jadi satu badan karna torang pe hubungan deng Yesus Kristus itu.