Efesus 4:11 - Perjanjian Baru Bahasa Melayu Maluku Utara

¹¹ Yesus Kristus itu suda yang kase kemampuan pa Dia pe umat yang baku-baku beda: ada yang jadi Yesus Kristus pe utusan-utusan yang orang sebut rasul-rasul, ada yang jadi nabi-nabi yang jaga kase turus Tuhan Allah pe pasáng, ada yang kase tau Kabar Bae tentang Yesus Kristus di tampa yang orang-orang bolong dengar, ada yang jadi pemimpin di jemaat sama deng gembala jaga dia pe domba bae-bae, deng ada lagi yang mangajar di jemaat.

Efesus 4:11 Referans Kwoze

Efesus 2:20

Skarang torang yang so jadi Tuhan Allah pe keluarga bole kase sama deng ruma yang Tuhan Allah ada kase badiri. Kong kalu orang kase badiri satu ruma, musti taru kamuka batu yang paling penting di fandasi itu untuk kase kuat ruma itu. Kristus Yesus itu bole kase sama deng batu yang paling penting di fandasi itu. Kong ada Yesus Kristus pe utusan yang orang sebut rasul-rasul, deng ada lagi nabi-nabi yang jaga kase turus Tuhan Allah pe pasáng, dorang itu bole kase sama deng ruma pe tiang-tiang.

2 Timotius 4:5

Tapi biar bagitu me, Timotius, ngana musti tetap tenang dalam samua hal. Kalu ngana biking ngana pe tugas kong dapa siksa, ngana musti sabar. Ngana kase tau pa orang-orang Kabar Bae itu supaya dorang jadi percaya pa Yesus. Deng samua tugas yang Tuhan so kase pa ngana, biking bae-bae sampe selesai.

Matius 28:20

Kong ngoni ajar pa dorang supaya dorang biking samua parenta yang Kita so perna ajar pa ngoni. Ngoni inga bae-bae e, Kita salalu sama-sama deng ngoni turus sampe ahir jaman.”

Kisah Para Rasul 20:28

Karna itu sudara-sudara, ngoni musti jaga bae-bae ngoni pe diri, deng jemaat yang Roh Kudus so kase pa ngoni untuk ngoni jaga. Ngoni jaga Tuhan Allah pe jemaat sama deng gembala yang jaga dia pe domba. Jemaat-jemaat itu so jadi Tuhan Allah punya, barang Dia pe Anak Yesus so mati di kayu salib untuk tebus pa torang.

Efesus 4:8

Itu butul, karna ini yang so tatulis di Kitab Suci, “Waktu Dia nae di tampa yang tinggi, Dia bawa Dia pe musu-musu yang Dia so kase kala itu, kong Dia kase hal-hal yang bae deng cuma-cuma pa manusia.”

Efesus 3:5

Dulu, Tuhan Allah bolong kase tau Dia pe rencana itu pa orang-orang, tapi skarang Dia pe Roh so pili pa kita supaya kase tau Dia pe rencana itu pa orang-orang yang Dia so pili. Dorang itu, Yesus Kristus pe utusan-utusan yang orang sebut rasul-rasul, deng pa nabi-nabi yang jaga kase turus Tuhan Allah pe pasáng.

Roma 12:7

Kalu Tuhan Allah so kase karunia pa torang untuk tolong orang, torang musti tolong orang. Kalu Tuhan Allah so kase karunia pa torang untuk mangajar, torang musti mangajar.

Ibrani 5:12

Ngoni so lama percaya pa Yesus Kristus, jadi sebenarnya ngoni ini yang musti ajar pa orang laeng. Tapi ternyata skarang ini, ngoni masi perlu lagi mo dapa ajar tentang ajaran-ajaran dasar dari Tuhan Allah pe firman. Ngoni masi sama deng ana-ana kacil yang cuma bisa minum susu, bolong bisa makang makanang karas.

Wahyu 18:20

Abis itu, ada suara yang bilang bagini, “Ee ngoni yang hidup di sorga, sanang suda ngoni, barang kota Babel itu Tuhan Allah so hukum. Sanang suda ngoni orang-orang yang so jadi Tuhan Allah pe umat, ngoni Tuhan pe utusan-utusan yang orang sebut rasul-rasul, deng ngoni nabi-nabi yang jaga kase turus Tuhan Allah pe pasáng! Barang, Tuhan Allah so kase hukuman pa kota itu karna samua kajahatan yang orang-orang di kota itu perna biking pa ngoni.”

Kisah Para Rasul 21:8

Dia pe beso, torang kase tinggal tampa itu kong bajalang kaki pigi di kota Kaisarea. Di situ torang tinggal di Filipus pe ruma. Dia itu orang yang jaga kase tau Kabar Bae pa orang-orang yang bolong dengar Kabar Bae itu, deng dia me satu dari tuju orang yang tapili di Yerusalem untuk kase bage-bage makanang pa janda-janda yang miskin.

Kisah Para Rasul 13:1

Di jemaat yang ada di kota Antiokhia itu, ada babarapa orang yang Tuhan Allah pake untuk jaga kase turus Dia pe pasáng deng untuk jaga mangajar tentang Yesus pa orang-orang. Dorang itu: Barnabas, Simeon (yang orang jaga pangge Niger), Lukius (orang Kirene), Menahem (yang dapa piara dari kacil sama-sama deng raja Herodes), deng Saulus.

Wahyu 21:14

Pagar tembok di kota itu ada kase badiri di atas dua blas batu fandasi basar. Di tiap batu itu, masing-masing ada tatulis Anak Domba itu pe dua blas rasul pe nama-nama.

Yudas 1:17

Tapi ngoni sudara-sudara yang kita sayang, inga apa yang torang pe Tuhan Yesus Kristus pe utusan-utusan so perna bilang.

1 Korintus 12:4

Ada macam-macam karunia yang Roh Kudus kase, tapi samua itu pe asal dari Roh Kudus yang cuma satu itu saja.