Efesus 3:8 - Perjanjian Baru Bahasa Melayu Maluku Utara

⁸ Dari samua yang so jadi Tuhan Allah pe umat, kita ini suda yang paling tarada arti apa-apa. Tapi biar bagitu, Tuhan Allah kase Dia pe bae pa kita untuk kita kase tau Kabar Bae tentang Yesus Kristus pa orang-orang bukang Yahudi. Kita kase tau pa dorang tentang sagala hal yang talebe-lebe, yang Dia so rencana mo kase pa orang yang percaya pa Dia.

Efesus 3:8 Referans Kwoze

Kolose 1:27

Yang Tuhan Allah kase mangarti pa dorang itu, Dia pe rencana yang paling hebat deng luar biasa pa ngoni orang-orang bukang Yahudi. Dia pe rencana itu bagini: Yesus Kristus tinggal di ngoni pe hati, jadi ngoni bole baharap deng yakin, nanti ngoni me sama-sama deng Dia di Dia pe tampa yang luar biasa.

1 Korintus 15:9

Sebenarnya kita ini tara pantas dapa bilang rasul, barang dulu itu, so kita ini suda yang jaga siksa pa Tuhan Allah pe jemaat. Karna itu, dari samua rasul, kita ini suda yang paling tara arti.

Efesus 3:16

Kita minta pa Tuhan Allah yang paling hebat la Dia pe Roh pe kuasa kase kuat ngoni pe hati,

Efesus 2:7

Tuhan Allah biking bagitu, supaya mulai dari sini ka sana orang-orang bole dapa tau Tuhan Allah pe bae deng pe sayang yang talebe-lebe, yang Dia kase pa torang karna torang so satu hati deng Kristus Yesus.

1 Timotius 2:7

Untuk kase tau pa orang-orang Kabar Bae itu, Tuhan Allah pili pa kita jadi Dia pe utusan yang orang sebut rasul. Dia suru pa kita pigi kase tau deng kase ajar pa orang-orang yang bukang Yahudi, supaya dorang percaya pa Yesus deng iko ajaran yang butul. Samua yang kita bilang ini butul, kita tara bafoya.

1 Timotius 1:13

Dulu kita yang kase tara bae Dia pe nama. Waktu itu, kita siksa deng hina pa orang-orang yang percaya pa Dia. Tapi biar bagitu me, Dia kase tunju Dia pe rasa kasiang pa kita, karna kita bolong percaya pa Dia, deng tara mangarti apa yang kita biking itu sala.

Galatia 1:16

Waktu Tuhan Allah pangge pa kita itu, deng sanang hati Dia kase lia Dia pe Anak, la kita kanal sapa Dia supaya kita bole kase tau pa orang-orang yang bukang Yahudi tentang Dia pe Anak itu. Kong waktu kita so abis lia Dia pe Anak, kita tara minta pa sapa-sapa untuk bantu pa kita kase mangarti Kabar Bae tentang Yesus Kristus itu, karna kita so tarima langsung dari Dia.

Roma 11:33

Bukang maeng, pe luar biasa skali Tuhan Allah! Dia tau samua hal, deng Dia tau ator samua. Tarada satu orang yang bisa mangarti Dia pe keputusan, deng tarada orang yang tau maksut dari apa yang Dia so biking.

Roma 2:4

Ngoni so tau Tuhan Allah pe hati itu bae skali, Dia itu sabar deng Dia pe sayang itu tara abis-abis. Tapi jang ngoni pandang enteng kong bilang kata, ngoni so butul jadi tara usa suda ngoni bertobat. Pasti ngoni so tau, Tuhan Allah pe sabar deng pe bae pa ngoni itu ada dia pe maksut, Dia mau supaya ngoni bertobat.

2 Timotius 1:11

Tuhan Allah pili pa kita jadi rasul, la kita kase tau Kabar Bae itu pa orang-orang, deng kita kase ajar pa dorang la percaya pa Tuhan Yesus.

Efesus 3:19

kong Dia pe sayang itu, lebe basar dari apa yang torang pikir. Kita minta pa Tuhan Allah la ngoni bole butul-butul mangarti Yesus Kristus pe sayang itu, supaya orang lebe tamba dapa lia Tuhan Allah pe sifat pa ngoni pe hidup.

1 Korintus 2:9

Rencana itu sama deng yang tatulis di Kitab Suci, bagini: “Tuhan Allah so kase sadia banya hal untuk orang-orang yang sayang pa Dia. Yang Dia so kase sadia itu, bolong perna manusia lia deng dia pe mata, bolong perna manusia dengar deng dia pe talinga, deng bolong perna ada pa manusia pe pikiran.”

Roma 12:10

Ngoni so sama deng basudara, jadi ngoni musti baku-baku sayang. Kong tiap orang musti lebe kamuka hormati turus-turus pa orang laeng lebe dari yang orang laeng biking.

Kisah Para Rasul 5:41

Pe kaluar dari Mahkama Agama pe tampa urus perkara, rasul-rasul itu sanang skali karna Tuhan Allah anggap dorang pantas dapa siksa karna iko pa Tuhan Yesus.

Wahyu 3:18

Jadi Kita kase nasehat pa ngoni bagini: Kita so ada barang yang berharga sama deng mas yang dapa bakar di api supaya jadi murni, jadi ngoni musti bili suda supaya Kita lia ngoni butul-butul kaya pa Kita pe muka. Kita me ada baju puti bersi, ngoni musti bili kong pake la Kita lia ngoni tara talanjang lagi yang biking ngoni jadi malu. Kita me ada obat mata yang kase sembu mata. Jadi ngoni musti bili suda obat itu pa Kita la ngoni bisa lia butul-butul.

1 Timotius 1:15

Kata-kata yang kita mo bilang ini, butul skali. Ngana musti tarima deng percaya deng hati yang sunggu-sunggu bagini, “Kristus Yesus datang di dunia untuk kase slamat orang berdosa.” Kong dari samua orang yang perna biking dosa, kita ini suda yang paling banya biking dosa.

Kisah Para Rasul 9:15

Tapi Tuhan bilang pa dia, “Ngana pigi suda! Barang, Kita so pili pa dia itu la mo kase tau Kabar Bae tentang Kita pa suku-suku bangsa yang bukang Yahudi, pa raja-raja, deng pa orang-orang Israel.

Filipi 4:19

Kita pe Tuhan Allah kaya dalam sagala hal, deng Dia itu hebat, jadi Dia akan kase apa saja yang ngoni perlu, karna ngoni so satu hati deng Kristus Yesus.

Galatia 2:8

Barang, Tuhan Allah yang kase kuasa pa Petrus jadi rasul pa orang-orang Yahudi itu, deng Tuhan Allah itu lagi yang kase kuasa pa kita jadi rasul untuk orang-orang yang bukang Yahudi.

Filipi 2:3

Jang ngoni biking satu barang cuma untuk kase sanang ngoni pe diri sandiri, atau supaya ngoni dapa puji. Tapi lebe bae, ngoni hidup tara basombong. Yang satu musti anggap yang laeng lebe penting dari dia pe diri.

Efesus 3:2

Pasti ngoni so dengar, Tuhan Allah pe bae pa kita sampe Dia so kase tugas pa kita untuk kase tau Kabar Bae tentang Yesus Kristus pa ngoni.

1 Korintus 1:30

Barang, Tuhan Allah sandiri yang buka jalang untuk ngoni, supaya ngoni bole percaya pa Kristus Yesus. Deng bagitu, torang bole tau Tuhan Allah pe rencana yang bijaksana untuk kase slamat pa manusia. Yesus Kristus itu yang biking torang jadi orang yang tara sala pa Tuhan Allah pe muka deng yang biking torang jadi Dia pe umat, deng Yesus me yang tebus torang pe dosa-dosa.

Yohanes 1:16

Dia pe sayang pa torang tara perna abis-abis. Kong karna Dia pe sayang itu, Dia tara berenti-berenti kase Dia pe bae pa torang samua.

Efesus 3:1

Sudara-sudara, kita Paulus dapa kase maso di penjara, barang kita kase tau Kabar Bae tentang Kristus Yesus untuk ngoni orang-orang bukang Yahudi.

Lukas 14:22

Abis dengar parenta itu, orang karja itu pigi biking sama deng yang dia pe tuang suru. Waktu pulang, dia bilang pa dia pe tuang, ‘Bapa, samua yang bapa parenta, kita so biking. Tapi masi ada tampa dudu yang kosong.’