Efesus 3:7 - Perjanjian Baru Bahasa Melayu Maluku Utara

⁷ Tuhan Allah pe bae pa kita sampe Dia kase tugas pa kita untuk kase tau Kabar Bae tentang Yesus Kristus pa orang-orang. Dia pe bae pa kita itu bantu pa kita supaya kita bole biking tugas itu pake Tuhan Allah pe kuasa yang bakarja di kita pe hati.

Efesus 3:7 Referans Kwoze

Efesus 1:19

Kong kita minta lagi pa Tuhan Allah, supaya Dia biking ngoni mangarti pe hebat skali Dia pe kuasa yang bakarja pa torang yang percaya pe hati. Kuasa yang ada pa torang itu luar biasa skali,

Efesus 3:20

Tuhan Allah pe kuasa yang bakarja pa torang pe hidup itu paling basar skali, kong deng Dia pe kuasa itu Dia bisa biking lebe dari apa yang torang minta, deng lebe dari apa yang torang pikir.

Efesus 3:2

Pasti ngoni so dengar, Tuhan Allah pe bae pa kita sampe Dia so kase tugas pa kita untuk kase tau Kabar Bae tentang Yesus Kristus pa ngoni.

2 Korintus 3:6

Dia itu yang so biking torang mampo biking apa yang Dia suru, untuk kase tau Tuhan Allah pe janji yang baru pa orang-orang, janji antara Tuhan Allah deng manusia. Janji yang baru itu bukang bagantong dari apa yang so tatulis dalam aturan-aturan di lima kitab Musa, karna aturan-aturan itu kalu torang tara bisa iko samua, nanti waktu torang mati, torang tapisa deng Tuhan Allah slama-lamanya. Tapi janji yang baru itu bagantong dari Roh Kudus. Tuhan Allah kase Dia pe Roh pa torang, la torang ada kuasa iko Tuhan Allah pe mau, deng torang bole hidup deng Tuhan Allah slama-lamanya.

Ibrani 13:21

supaya Dia kase pa ngoni samua yang ngoni perlu la ngoni bisa biking Dia pe mau, deng supaya Yesus Kristus bakarja di torang pe hati la biking torang mampo biking Tuhan Allah pe hati sanang. Puji deng hormat suda pa Dia sampe slama-lamanya! Amin.

1 Tesalonika 2:13

Torang lagi salalu bilang tarimakasi pa Tuhan Allah karna waktu torang kase tau pa ngoni Kabar Bae dari Tuhan Allah, ngoni tarima itu deng sanang hati. Ngoni tarima Kabar Bae itu karna ngoni tau, kata-kata itu bukang dari manusia, tapi dari Tuhan Allah. Deng memang itu butul dari Tuhan Allah. Kong Kabar Bae itu bakarja di ngoni pe hati yang percaya pa Yesus Kristus.

Kolose 1:29

Karna itu, kita berusaha sunggu-sunggu biking kita pe karja ini pake kekuatan yang luar biasa, yang Yesus Kristus kase pa kita.

1 Korintus 15:10

Tapi kita jadi rasul skarang, cuma karna Tuhan Allah pe bae pa kita. Deng Dia pe bae itu tara parcuma. Mala dari samua rasul, yang karja karas itu kita. Tapi samua karja itu kita mampo biking bukang karna kita pe kemampuan sandiri, tapi karna Tuhan Allah pe bae pa kita.

1 Korintus 3:5

Jang ngoni anggap kita deng Apolos orang penting. Torang dua ini cuma orang-orang yang jaga biking apa yang Tuhan suru. Torang kase tau Kabar Bae tentang Yesus Kristus pa ngoni sampe ngoni jadi percaya. Torang cuma biking tugas yang Tuhan kase pa torang masing-masing.

Roma 15:16

Dia pangge pa kita jadi Yesus Kristus pe utusan untuk kase tau Kabar Bae dari Tuhan Allah pa orang-orang yang bukang Yahudi. Kita pe tugas itu kita kase sama deng orang Yahudi pe imam pe tugas, karna kalu kita kase tau Kabar Bae itu pa orang bukang Yahudi kong dorang jadi percaya pa Yesus, itu kita so kase sanang Tuhan Allah pe hati, sama deng imam kase binatang korban persembahan pa Tuhan Allah. Kong Tuhan Allah tarima pa dorang karna Roh Kudus so biking dong jadi Tuhan Allah pe umat sandiri.

Roma 1:5

Kong karna Yesus Kristus itu, Tuhan Allah kase Dia pe bae pa kita sampe Dia pili pa kita jadi rasul untuk kase tau Kabar Bae tentang Yesus Kristus pa samua suku bangsa, supaya samua orang bole percaya, deng bole iko Yesus Kristus pe mau.

Efesus 4:16

Kong Dia yang biking torang yang percaya jadi satu, sama deng torang ini satu badan: torang ini sama deng Dia pe kaki, tangan, deng samua-samua yang ada pa Dia pe badan. Dia pe kuasa ada pa torang samua, jadi kalu torang masing-masing biking tong pe tugas yang Dia so kase, kuasa itu biking torang lebe hari lebe tamba baku sayang deng lebe tamba baku kase kuat torang pe percaya.

Efesus 3:8

Dari samua yang so jadi Tuhan Allah pe umat, kita ini suda yang paling tarada arti apa-apa. Tapi biar bagitu, Tuhan Allah kase Dia pe bae pa kita untuk kita kase tau Kabar Bae tentang Yesus Kristus pa orang-orang bukang Yahudi. Kita kase tau pa dorang tentang sagala hal yang talebe-lebe, yang Dia so rencana mo kase pa orang yang percaya pa Dia.

Galatia 2:8

Barang, Tuhan Allah yang kase kuasa pa Petrus jadi rasul pa orang-orang Yahudi itu, deng Tuhan Allah itu lagi yang kase kuasa pa kita jadi rasul untuk orang-orang yang bukang Yahudi.

2 Korintus 4:1

Karna Tuhan Allah pe sayang pa torang, Dia pili pa torang untuk kase tau Kabar Bae tentang Yesus Kristus pa orang-orang. Kong karna itu, torang tara ilang smangat waktu biking tugas ini.

Kisah Para Rasul 9:15

Tapi Tuhan bilang pa dia, “Ngana pigi suda! Barang, Kita so pili pa dia itu la mo kase tau Kabar Bae tentang Kita pa suku-suku bangsa yang bukang Yahudi, pa raja-raja, deng pa orang-orang Israel.

Roma 12:3

Tuhan Allah kase Dia pe bae pa kita, sampe Dia so pili pa kita. Karna itu, kita kase nasehat pa ngoni bagini: jang ngoni pikir tinggi-tinggi tentang ngoni pe diri. Tapi lebe bae ngoni pikir yang pas tentang ngoni pe diri, iko ngoni pe percaya yang Tuhan Allah so kase pa ngoni satu-satu.