Efesus 2:12 - Perjanjian Baru Bahasa Melayu Maluku Utara

¹² Waktu itu, ngoni tara tau sama skali sapa itu Yesus Kristus. Ngoni itu orang asing yang bukang dari bangsa Israel. Jadi ngoni bukang Tuhan Allah pe umat yang Dia pili, deng ngoni tara akan dapa apa yang Tuhan Allah janji pa orang Israel. Ngoni hidup di dunia ini tara ada hubungan deng Tuhan Allah, jadi ngoni tara bisa baharap pa sapa-sapa supaya bole dapa slamat dari dosa-dosa.

Efesus 2:12 Referans Kwoze

Galatia 4:8

Dulu, waktu ngoni bolong kanal pa Tuhan Allah, ngoni pe puji-puji suru-suru pa ngoni sama deng jadi ngoni pe tuhan, padahal ngoni pe puji-puji itu bukang Tuhan Allah.

Kolose 1:21

Dulu, waktu ngoni bolong percaya pa Tuhan Yesus, ngoni hidup jao dari Tuhan Allah. Waktu itu ngoni pe pikiran deng kalakuang jahat sampe ngoni biking Tuhan Allah jadi ngoni pe musu.

1 Petrus 1:3

Puji suda pa Tuhan Allah, Dia itu torang pe Tuhan Yesus Kristus pe Bapa. Dia pe rasa kasiang pa torang basar skali, sampe Dia kase pa torang hidup yang baru waktu Dia so kase hidup ulang pa Yesus Kristus. Kong karna itu, torang bole baharap deng percaya sunggu-sunggu pa Dia.

1 Tesalonika 4:13

Sudara-sudara, kalu ada orang yang mati, torang tara mau ngoni sedi skali sama deng orang-orang yang tara ada harapan. Jadi torang mo kase tau pa ngoni apa sebenarnya yang jadi pa orang-orang yang so mati.

Efesus 4:18

Dorang pe pikiran itu so galap, dorang susa mo tau yang butul. Dorang pe hidup so jao dari hidup yang Tuhan Allah mo kase pa dorang karna dorang tara mau tau tentang Dia deng karna dorang pe kapala batu.

1 Tesalonika 4:5

Jang ngoni hidup iko ngoni pe napsu yang tara bae. Cuma orang-orang yang tara kanal pa Tuhan Allah yang jaga biking bagitu.

Yohanes 15:5

Kita ini sama deng pohong anggur kong ngoni ini sama deng pohong anggur pe cabang-cabang. Jadi, sama deng pohong deng cabang yang jadi satu, bagitu lagi deng ngoni, kalu ngoni hidup satu hati deng Kita, Kita lagi hidup satu hati deng ngoni, turus ngoni bole biking yang bae yang kase sanang Tuhan Allah pe hati. Karna kalu ngoni tara satu hati deng Kita, ngoni ini tara mampo biking yang bae untuk kase sanang pa Tuhan Allah.

Ibrani 6:18

Jadi ada dua hal yang tara perna beruba: pertama, Tuhan Allah pe janji, deng kedua, Dia pe sumpa. Barang, Tuhan Allah tara perna bafoya. Kong karna itu, torang yang cari slamat pa Dia, torang pe hati jadi kuat kong torang bole percaya deng yakin, tong akan tarima samua yang Tuhan Allah so janji pa torang.

Roma 9:8

Itu berarti, tara samua Abraham pe turunan yang Tuhan Allah biking jadi Dia pe ana-ana, tapi cuma orang yang percaya pa Tuhan Allah pe janji saja, dorang itu yang Tuhan Allah biking jadi Dia pe ana-ana.

1 Petrus 3:15

Tapi ngoni musti hormati pa Kristus kong biking Dia jadi Raja di ngoni pe hati. Kalu ada orang yang batanya tentang ngoni pe harapan pa Tuhan Yesus, ngoni musti salalu siap bajawab pa dorang. Kong waktu ngoni bajawab, ngoni musti bajawab pa dorang itu deng bae-bae deng kase tunju ngoni pe rasa hormat,

Kisah Para Rasul 28:20

Karna itu, kita minta mo baku dapa deng bapa-bapa di sini la kita kase tau, samua yang dorang kase sala pa kita itu tara butul. Kita dapa ika bagini, barang kita percaya deng yakin pa Mesias, Raja yang Tuhan Allah janji mo kase slamat pa torang orang Israel.”

Kisah Para Rasul 3:25

Dorang so bilang kamuka Tuhan Allah pe janji tentang Yesus pa torang pe orang tua dulu-dulu, kong ngoni ini suda so dapa bagian dari janji itu. Janji itu, dulu Tuhan Allah bilang pa Abraham bagini, ‘Dari ngana pe turunan, samua bangsa di dunia ini mo dapa berkat.’

1 Yohanes 3:3

Samua orang yang baharap pa Tuhan sama deng itu, orang itu musti salalu hidup deng hati bersi sama deng Yesus Kristus yang suci itu.

1 Petrus 1:21

Karna Yesus Kristus so kase slamat pa ngoni, ngoni bole percaya pa Tuhan Allah. Tuhan Allah itu yang so kase hidup ulang pa Yesus Kristus waktu Dia mati, deng yang biking Yesus Kristus dapa puji deng hormat. Deng bagitu, ngoni bole percaya deng baharap pa Tuhan Allah.

Ibrani 11:34

Deng karna dorang percaya pa Tuhan Allah, ada yang slamat dari api basar, ada yang lolos dari orang yang mo potong pa dorang, turus ada yang tara kuat, tapi Tuhan Allah biking dong jadi kuat. Ada lagi yang Tuhan Allah kase kuat waktu baku prang kong kase kala dorang pe musu-musu dari tentara bangsa-bangsa laeng.

1 Timotius 1:1

Timotius, salam dari kita Paulus, Kristus Yesus pe utusan yang orang sebut rasul. Kita jadi rasul, itu karna iko Tuhan Allah deng Kristus Yesus pe parenta. Tuhan Allah itu yang kase slamat pa torang, deng Kristus Yesus itu yang jadi torang pe harapan.

2 Tesalonika 2:16

Yesus Kristus, torang pe Tuhan, deng Tuhan Allah, torang pe Bapa, sayang skali pa torang deng salalu kase kuat torang pe hati sampe torang bole baharap deng yakin torang dapa hidup deng Dia slama-lamanya. Torang bole yakin bagitu, karna torang tau, Yesus Kristus pe bae pa torang.

Kolose 1:27

Yang Tuhan Allah kase mangarti pa dorang itu, Dia pe rencana yang paling hebat deng luar biasa pa ngoni orang-orang bukang Yahudi. Dia pe rencana itu bagini: Yesus Kristus tinggal di ngoni pe hati, jadi ngoni bole baharap deng yakin, nanti ngoni me sama-sama deng Dia di Dia pe tampa yang luar biasa.

Kolose 1:5

Ngoni percaya deng sayang macam bagitu, barang ngoni so yakin, ngoni akan tarima apa yang Tuhan Allah so kase sadia untuk ngoni di sorga. Ngoni jadi yakin itu, mulai dari pertama kali ngoni dengar ajaran yang butul, itu Kabar Bae tentang Yesus Kristus.

Yohanes 10:16

Tapi pa Kita lagi ada domba-domba laeng, yang bukang dari kandang ini. Domba-domba itu musti Kita bawa lagi kong dorang mo dengar Kita pe suara. Dorang itu mo jadi satu kelompok deng Kita pe domba-domba yang ada di kandang ini, kong Kita jadi dorang samua pe gembala.

Yohanes 4:22

Memang ngoni orang Samaria, ngoni basambayang pa Tuhan Allah, tapi ngoni tara tau sapa Dia sebenarnya. Torang orang Yahudi basambayang pa Tuhan Allah, kong torang tau sapa Dia sebenarnya. Barang, Dia yang Tuhan Allah janji mo kase slamat pa manusia itu yang datang dari torang orang Yahudi pe turunan.

Lukas 1:72

Tuhan mo biking bagitu, karna Dia tara lupa yang Dia janji pa torang pe orang tua dulu-dulu. Dia inga Dia pe janji yang kudus itu deng cara kase tunju Dia pe sayang pa dorang.

Kisah Para Rasul 2:39

Barang, samua itu Tuhan Allah so janji pa ngoni deng pa ngoni pe turunan, deng pa orang-orang bukang Yahudi lagi. Janji itu Tuhan Allah mo kase pa samua orang yang Dia pangge iko pa Dia.”

Efesus 2:19

Jadi sudara-sudara yang bukang Yahudi, ngoni itu bukang lagi sama deng orang asing atau orang pendatang, tapi ngoni itu so jadi Tuhan Allah pe umat, deng ngoni itu so termasuk Tuhan Allah pe keluarga.

Ibrani 8:6

Tapi Yesus Kristus so jadi Imam Basar yang lebe hebat dari imam-imam yang biking dong pe tugas di Tenda Ibada di dunia ini. Barang, Dia yang jadi sama deng manusia pe wakil untuk biking janji yang baru antara Tuhan Allah deng manusia. Kong deng janji yang baru itu biking manusia pe hubungan deng Tuhan Allah jadi bae ulang. Tuhan Allah pe janji yang baru itu lebe bagus skali dari janji yang lama, karna Tuhan Allah ada janji hal-hal yang lebe bagus di janji yang baru itu.