Efesus 1:21 - Perjanjian Baru Bahasa Melayu Maluku Utara

²¹ Kong kuasa yang so ada pa Yesus Kristus itu paling basar skali, lebe basar dari samua kuasa deng dari samua yang berkuasa di langit deng di bumi. Kong Dia pe kuasa itu lebe basar dari samua-samua yang ada, bukang cuma skarang ini saja, tapi sampe slama-lamanya.

Efesus 1:21 Referans Kwoze

Kolose 2:10

Kong karna ngoni so satu hati deng Yesus Kristus, samua yang ngoni perlu, so ada pa Dia. Dia itu suda yang lebe berkuasa dari samua yang bapimpin deng dari samua kuasa yang ada di langit deng di bumi.

1 Petrus 3:22

Kong skarang, Yesus Kristus so nae ka atas di sorga, so dudu di tampa yang terhormat, pa Tuhan Allah pe sabla kanan. Kong samua malaekat, samua yang ada kuasa, deng samua yang ada pengaru, ada di bawa Yesus Kristus pe kuasa.

Ibrani 1:4

Karna Anak Allah so dudu di tampa yang terhormat itu, torang bole tau deng jelas Dia lebe hebat dari malaekat-malaekat. Bagitu lagi deng Dia pe nama yang Tuhan Allah kase pa Dia, itu jao lebe bagus dari malaekat-malaekat pe nama.

Kisah Para Rasul 4:12

Jadi, cuma Yesus saja yang bisa kase slamat pa manusia, karna di seluru dunia, cuma Dia saja yang Tuhan Allah pili untuk kase slamat pa manusia. Tara ada yang laeng.”

Kolose 2:15

Kong waktu Yesus Kristus mati di kayu salib itu, Dia so kase kala pa samua kuasa jahat yang berkuasa, supaya Tuhan Allah kase tunju pa samua orang, Dia itu yang menang.

Efesus 3:10

Tuhan Allah pe maksut supaya samua yang bapimpin deng yang berkuasa di langit bole tau, Tuhan Allah itu tau samua hal deng tara perna abis akal untuk ator samua yang ada. Dorang bole tau itu karna dorang lia Dia biking orang Yahudi deng orang bukang Yahudi jadi satu karna skarang dorang so percaya pa Yesus Kristus.

Efesus 6:12

Barang, torang pe musu itu bukang manusia tapi kuasa-kuasa jahat yang torang tara dapa lia. Torang lawan samua yang berkuasa di dunia yang galap ini, deng samua yang berkuasa di udara.

Ibrani 4:14

Skarang ini torang so untung, karna torang so ada Imam Basar yang Paling Hebat. Dia itu suda Yesus Kristus, Anak Allah. Dia yang kase bae-bae torang manusia yang berdosa pe hubungan deng Tuhan Allah. Dia so nae di sorga, kong so ada sama-sama deng Tuhan Allah. Jadi, mari suda torang tetap kuat percaya pa Dia.

Matius 12:32

Kalu ada orang yang bilang apa-apa yang malawang pa Anak Manusia yang dari sorga, dia masi bole mo dapa ampun. Tapi kalu orang bilang apa-apa yang malawang pa Roh Kudus, dia tara mo dapa ampun, skarang atau sampe slama-lamanya.”

Ibrani 2:5

Tuhan Allah tara kase kuasa pa malaekat-malaekat la mo berkuasa di dunia yang baru nanti, dunia yang sementara torang bicara ini.

Efesus 2:2

Waktu itu, ngoni hidup masi suka biking dosa sama deng orang yang bolong kanal pa Tuhan Allah, baru ngoni lagi iko Iblis pe mau. Iblis itu setang-setang pe raja yang berkuasa di udara, deng dia itu suda yang skarang ini ada pengaru pa orang-orang yang tara dengar-dengaran pa Tuhan Allah.