Efesus 1:11 - Perjanjian Baru Bahasa Melayu Maluku Utara

¹¹ Tuhan Allah ator samua yang ada itu, iko Dia pe mau yang Dia so tentukan. Dari dulu, Dia so pili pa torang supaya torang bole tarima apa yang Dia so janji mo kase pa torang karna torang percaya pa Yesus Kristus.

Efesus 1:11 Referans Kwoze

Roma 8:28

Torang tau ini: sapa saja yang sayang pa Tuhan Allah deng so dapa pangge la iko Dia pe mau, apa saja yang jadi pa dorang, mo bae ka, tara bae ka, torang tau, Tuhan Allah mo biking samua itu untuk dorang pe bae.

1 Petrus 1:4

Torang yakin nanti Tuhan Allah kase pa torang berkat yang Dia so simpang di sorga. Berkat-berkat itu tara ancor, tara perna busu, deng tara beruba.

Efesus 1:14

Roh Kudus itu jadi tanda, torang akan dapa samua hal yang Tuhan Allah janji untuk torang, karna torang ini yang so jadi Tuhan Allah punya. Dia so kase janji itu pas di waktu yang Dia so tentukan untuk kase bebas pa torang dari samua-samua yang jahat. Karna itu, mari suda torang puji pa Tuhan Allah yang hebat itu.

Efesus 3:11

Tuhan Allah biking dorang jadi satu itu iko apa yang Dia so rencana dari dulu, waktu Dia bolong biking dunia ini. Kong Dia pe rencana itu bole jadi karna apa yang Kristus Yesus torang pe Tuhan so biking.

Efesus 1:5

Tuhan Allah sayang pa torang, kong karna itu, dari dulu Dia so ada rencana untuk kase jadi torang Dia pe ana-ana. Torang jadi Dia pe ana-ana itu karna apa yang Yesus Kristus biking, kong memang itu suda yang Tuhan Allah ingin biking.

Galatia 3:18

Karna itu, skarang jang ngoni pikir kalu orang iko aturan-aturan di lima kitab Musa turus, Tuhan Allah pasti mo kase pa dia apa yang Tuhan Allah so janji pa Abraham waktu dulu itu. Sebenarnya Tuhan Allah memang mo kase pa ngoni apa yang Dia so janji pa Abraham dulu, tapi Dia mo kase itu pa ngoni deng cuma-cuma. Jadi kalu ngoni lebe kamuka biking aturan-aturan itu supaya ngoni bole tarima apa yang Tuhan Allah janji itu, itu dia pe nama bukang janji lagi.

Ibrani 6:17

Bagitu lagi deng Tuhan Allah. Waktu Tuhan Allah bajanji pa Dia pe umat, Tuhan Allah suka kase kuat torang pe hati la torang tau, Dia pe rencana tara perna beruba. Jadi Dia basumpa pake Dia pe nama supaya jelas, apa yang Dia so janji itu, pasti Dia biking.

Titus 3:7

Tuhan Allah kase Dia pe bae pa torang, itu yang biking torang jadi orang yang tara sala pa Dia pe muka, kong deng bagitu, torang ada hak tarima Tuhan Allah pe janji untuk hidup deng Dia slama-lamanya, sama deng yang torang so harap.

Roma 8:17

Deng karna torang ini so jadi Tuhan Allah pe ana-ana, nanti tong mo dapa warisan dari Dia, itu berarti, torang ini me ada hak dari samua yang Dia so kase sadia untuk Dia pe ana-ana. Kong torang mo dapa samua itu sama-sama deng Yesus Kristus. Tapi kalu torang mau dapa itu, tong lagi musti menderita iko pa Tuhan Allah sama deng Yesus Kristus so menderita, supaya torang nanti dapa puji deng hormat sama-sama deng Dia.

Kolose 1:12

Deng kita minta lagi supaya ngoni salalu bilang tarimakasi banya pa Dia, torang pe Bapa. Bapa itu suda yang biking ngoni jadi pantas mo dapa apa yang Dia so janji pa orang-orang yang so jadi Dia pe umat. Kong janji itu, Dia so sadia untuk Dia pe umat di tampa yang tarang, tampa yang Dia Berkuasa sebagai Raja.

Kolose 3:24

Inga, ngoni ada karja untuk Yesus Kristus, sama deng Dia itu ngoni pe tuang. Deng Dia akan kase pa ngoni samua yang bae yang Dia so janji pa Dia pe ana-ana.

Kisah Para Rasul 26:18

Ngana ka sana untuk buka dorang pe pikiran supaya dorang tara hidup lagi di galap tapi hidup di tarang, supaya dorang talapas dari Iblis, setang-setang pe raja pe kuasa, kong Tuhan Allah pe kuasa mo ada sama-sama deng dorang. Kong karna dorang so percaya pa Kita, dorang pe dosa-dosa mo dapa ampun deng dorang mo dapa samua yang Tuhan Allah janji mo kase pa orang-orang yang Dia so biking jadi Dia pe umat.’

Kisah Para Rasul 20:32

Jadi skarang, kita minta Tuhan Allah jaga pa ngoni deng bantu ngoni inga turus Dia pe firman tentang Dia pe bae pa ngoni. Firman itu yang bisa kase kuat ngoni pe percaya, deng yang nanti mo kase pa ngoni samua yang Dia so janji mo kase pa orang-orang yang Dia so biking jadi Dia pe umat sandiri.

Kisah Para Rasul 2:23

Tapi biar ngoni so tau itu, ngoni serakan Yesus pa orang jahat, kong dorang paku pa Dia di salib sampe mati. Tapi itu Tuhan Allah pe maksut deng rencana dari dulu, Dia yang serakan Yesus pa ngoni.

Kisah Para Rasul 20:27

Barang, kita so salalu kase tau samua Tuhan Allah pe rencana pa ngoni.

Kisah Para Rasul 4:28

Itu samua jadi karna Tuhan Allah so tentukan dari dulu, kong itu Tuhan Allah pe mau deng Tuhan Allah pe kuasa.

1 Petrus 3:9

Jang balas yang jahat deng yang jahat, deng jang balas momake deng momake. Tapi ngoni musti minta pa Tuhan supaya berkati pa dorang, karna Tuhan pangge pa ngoni untuk berkati pa orang laeng. Deng bagitu ngoni me akan dapa berkat.

Roma 11:34

Sama deng yang tatulis di Kitab Suci bagini, Tarada satu orang yang tau Tuhan Allah pe pikiran. Deng tarada satu orang yang bisa kase nasehat pa Dia.

Yakobus 2:5

Sudara-sudara yang kita sayang, dengar yang kita mo bilang ini: orang miskin yang ada di dunia ini, Tuhan Allah so pili pa dorang la butul-butul percaya pa Dia. Dorang itu yang mo jadi Tuhan Allah pe umat yang Dia Berkuasa sebagai Raja pa dorang pe hidup, sama deng yang Dia so janji pa samua orang yang sayang pa Dia.

Efesus 1:8

Dia pe bae itu Dia kase talebe-lebe pa torang, kong Dia biking torang bijaksana deng biking torang mangarti banya hal tentang Dia pe rencana.

Kisah Para Rasul 13:48

Waktu orang-orang bukang Yahudi dengar Paulus bilang bagitu, dorang sanang skali. Turus, dorang puji deng hormat pa Tuhan karna Tuhan pe ajaran itu. Abis itu, samua orang yang Tuhan Allah so pili mo dapa hidup deng Dia slama-lamanya, dorang itu jadi percaya.

Roma 8:29

Karna dari dulu, Tuhan Allah so pili pa sapa saja yang Tuhan Allah tau dorang itu nanti mo percaya pa Dia. Tuhan Allah so pili pa dorang itu supaya dorang pe sifat bole sama deng Yesus Kristus, Tuhan Allah pe Anak. Jadi, dorang itu so sama deng Yesus Kristus pe sudara, kong Tuhan Allah biking Yesus Kristus jadi Anak yang tua dari samua sudara yang percaya.

Roma 8:30

Kong dorang yang Tuhan Allah so pili dari dulu itu, Dia pangge pa dorang jadi Dia pe umat. Dorang itu, Tuhan Allah biking jadi orang yang tara sala pa Dia pe muka. Kong nanti dorang itu mo dapa puji deng hormat sama-sama deng Dia.

Roma 9:11

Waktu ana dua itu bolong lahir, kong dorang bolong tau biking barang yang bae deng yang jahat, Tuhan Allah so bilang bagini pa Ribka, “Ngana pe ana yang bongso nanti mo jadi tuang pa dia pe kaka.” Tuhan Allah pe maksut supaya torang bole lia, Dia pili bukang iko apa yang dorang dua ada biking, tapi iko Tuhan Allah pe mau.

Efesus 1:9

Dulu, tarada orang yang tau Dia pe rencana itu, tapi skarang Dia so kase tau pa torang. Dia pe rencana itu tentang Yesus Kristus, kong rencana itu suda yang Dia ingin biking dari dulu.

Efesus 1:18

Kong kita minta lagi supaya Dia buka ngoni pe hati, la ngoni bisa mangarti butul samua hal yang ngoni bole harap pa Dia karna ngoni yang Dia so pili jadi Dia pe umat. Deng kita minta lagi supaya ngoni mangarti pe hebat skali samua janji yang Dia mo kase pa ngoni itu.

Titus 2:14

Dia yang so serakan Dia pe diri untuk mati la kase bebas pa torang dari torang pe dosa. Dia biking torang pe hati jadi bersi, sampe torang jadi Dia pe umat sandiri yang suka biking barang yang bae.