1 Yohanes 2:8 - Perjanjian Baru Bahasa Melayu Maluku Utara

⁸ Tapi biar so lama, parenta yang kita tulis ini me tetap baru, karna parenta itu ngoni so lia Yesus jaga biking, deng ngoni me jaga biking. Itu sama deng galap so mulai ilang, kong tarang yang butul so bacahaya.

1 Yohanes 2:8 Referans Kwoze

Efesus 5:8

Memang dulu, ngoni pe kalakuang me tara bae, sama deng orang-orang yang hidup dalam galap. Tapi skarang, karna ngoni so percaya pa Tuhan, itu sama deng ngoni so hidup dalam tarang. Jadi ngoni pe hidup musti bae-bae sama deng ana-ana tarang.

Roma 13:12

Torang pe waktu untuk hidup di dunia ini so mo abis karna so tara lama lagi Tuhan mo datang. Itu sama deng so lewat tenga malam kong so mo amper siang. Karna itu, mari suda torang berenti biking barang yang jahat, yang biasa orang yang hidup di galap jaga biking. Deng mari suda torang kase siap tong pe diri untuk lawan samua yang tara bae, sama deng torang ada pake senjata.

Yohanes 13:34

Skarang, Kita mo kase parenta yang baru pa ngoni, bagini: ngoni ini musti baku sayang. Ngoni musti baku sayang sama deng Kita so sayang pa ngoni.

Yohanes 8:12

Yesus kase turus Dia pe bicara pa orang banya yang masi ada di situ bagini, “Kita ini tarang dunia yang kase tarang manusia pe hati. Sapa saja yang iko pa Kita, dia itu tara akan hidup dalam galap, tapi dia akan hidup di dalam tarang, yang biking dia dapa hidup deng Tuhan Allah slama-lamanya.”

Yohanes 1:9

Tarang yang butul itu Yesus suda, kong Dia sementara datang di dunia. Dia mo kase tarang samua orang pe hati la dorang bole tau tentang Tuhan Allah.

Yohanes 12:46

Kita datang di dunia ini sebagai Tarang, supaya sapa saja yang percaya pa Kita, dia itu so tara hidup lagi di dalam galap.

1 Yohanes 4:21

Ini parenta yang torang tarima dari Tuhan Allah: sapa saja yang sayang pa Tuhan Allah, dia me musti sayang pa dia pe sudara yang percaya.

1 Yohanes 4:11

Sudara-sudara yang kita sayang, karna Tuhan Allah sayang skali pa torang, torang me musti baku sayang.

2 Timotius 1:10

Kong skarang Tuhan Allah so kase Dia pe bae itu pa torang. Yesus Kristus so datang deng kase slamat pa torang dari tong pe dosa, kong kase ancor kuasa yang biking sampe orang bisa mati slama-lamanya. Jadi sapa yang percaya Kabar Bae tentang Yesus Kristus, dia hidup deng Tuhan Allah sampe slama-lamanya.

2 Korintus 8:9

Sebenarnya kita tara perlu suru ngoni bantu pa dorang, barang ngoni so tau Yesus Kristus torang pe Tuhan pe bae yang Dia so kase pa ngoni. Biar Dia punya samua-samua yang ada, tapi karna Dia sayang pa torang, Dia kase tinggal samua itu supaya jadi manusia yang tara punya apa-apa. Dia biking bagitu la torang dapa banya yang bae dari Tuhan Allah.

Kisah Para Rasul 26:18

Ngana ka sana untuk buka dorang pe pikiran supaya dorang tara hidup lagi di galap tapi hidup di tarang, supaya dorang talapas dari Iblis, setang-setang pe raja pe kuasa, kong Tuhan Allah pe kuasa mo ada sama-sama deng dorang. Kong karna dorang so percaya pa Kita, dorang pe dosa-dosa mo dapa ampun deng dorang mo dapa samua yang Tuhan Allah janji mo kase pa orang-orang yang Dia so biking jadi Dia pe umat.’

Kisah Para Rasul 17:30

Dulu, torang manusia bolong tau cara mo percaya pa Tuhan Allah sampe torang biking dosa banya skali. Tapi Tuhan Allah so tara rekeng samua dosa-dosa itu. Kong skarang Tuhan Allah parenta pa samua orang di mana saja, la dorang bertobat kong iko pa Dia.

Lukas 1:79

la kase sinar. Dia itu mo datang kase tarang pa orang-orang yang hidup dalam galap, deng pa orang-orang yang hidup deng rasa tako. Dia mo datang pa torang supaya torang tau jalang hidup yang biking torang pe hati salalu tenang.”

Yohanes 12:35

Kong Yesus bilang pa dorang, “So tara lama lagi, Tarang ini ada sama-sama deng ngoni. Jadi waktu Tarang ini masi ada, ngoni musti bajalang sama-sama deng Tarang ini turus, jang sampe galap tutu ngoni pe jalang. Barang, sapa yang bajalang di galap, dia tara akan tau ka mana dia mo pigi.

Matius 4:16

Orang-orang di situ tara kanal pa Tuhan Allah, sama deng orang yang tinggal di dalam galap. Tapi dorang so lia Tarang satu yang luar biasa. Orang-orang yang tinggal dalam galap itu mo mati tapisa deng Tuhan Allah slama-lamanya, tapi Tarang itu so muncul di situ la kase tunju jalang supaya dorang bole dapa slamat.”

1 Petrus 1:21

Karna Yesus Kristus so kase slamat pa ngoni, ngoni bole percaya pa Tuhan Allah. Tuhan Allah itu yang so kase hidup ulang pa Yesus Kristus waktu Dia mati, deng yang biking Yesus Kristus dapa puji deng hormat. Deng bagitu, ngoni bole percaya deng baharap pa Tuhan Allah.

1 Yohanes 3:23

Tuhan pe parenta itu bagini: torang musti percaya pa Yesus Kristus, Anak Allah, deng torang lagi musti baku sayang, sama deng parenta yang Yesus Kristus so kase pa torang.