1 Yohanes 2:11 - Perjanjian Baru Bahasa Melayu Maluku Utara

¹¹ Tapi sapa yang binci pa dia pe sudara yang percaya pa Tuhan, dia itu masi hidup di galap. Dia tara tau mo pigi di mana, karna galap itu yang biking sampe dia so tara lia apa-apa.

1 Yohanes 2:11 Referans Kwoze

Yohanes 12:35

Kong Yesus bilang pa dorang, “So tara lama lagi, Tarang ini ada sama-sama deng ngoni. Jadi waktu Tarang ini masi ada, ngoni musti bajalang sama-sama deng Tarang ini turus, jang sampe galap tutu ngoni pe jalang. Barang, sapa yang bajalang di galap, dia tara akan tau ka mana dia mo pigi.

Titus 3:3

Barang, dulu waktu torang bolong percaya pa Yesus, torang tara mangarti apa-apa. Jadi torang malawang pa Tuhan, torang me tapengaru deng hal-hal yang jahat. Napsu deng keinginan yang tara bae so kuasai di torang pe hati kong torang hidup baku mangiri deng orang laeng. Torang jahat pa orang deng torang salalu baku binci.

Wahyu 3:17

Ngoni bilang ngoni kaya, ngoni pe hidup lengkap, ngoni tara perlu apa-apa lagi! Padahal ngoni tara tau, pa Tuhan Allah pe muka, ngoni pe hati buta, miskin skali deng talanjang lagi. Kasiang skali ngoni!

1 Yohanes 1:6

Kalu torang bilang torang so hidup satu hati deng Dia tapi torang pe hidup masi di galap, torang so bafoya kong yang torang biking itu tara butul.

1 Yohanes 2:9

Sapa saja yang bilang dia hidup di tarang tapi dia binci pa dia pe sudara yang percaya, itu sama deng dia masi hidup di galap sampe skarang.

2 Korintus 4:4

Dorang tara percaya Kabar Bae itu karna Iblis, setang-setang pe raja, yang tutu dong pe pikiran. Iblis itu yang orang banya di dunia iko pa dia. Deng bagitu, dorang tara dapa tau Kabar Bae itu butul, deng dorang tara mangarti Yesus Kristus yang pe kuasa luar biasa itu sama persis deng Tuhan Allah.

Yohanes 12:40

“Tuhan so biking dorang pe mata buta, jadi dorang tara mo lia apa yang butul. Tuhan lagi so biking dorang pe hati karas, jadi dorang tara mo mangarti apa yang butul. Karna dorang memang so tara mau bertobat, jadi Kita tara mo kase slamat pa dorang.”

2 Korintus 3:14

Tapi orang Israel itu pe pikiran tatutu sampe tara mangarti aturan-aturan itu pe maksut. Kong skarang ini me waktu orang Israel baca janji yang lama itu lagi, dorang pe pikiran masi tatutu, macam deng kaeng yang Musa pake untuk tutu pa dia pe muka itu, jadi dorang tara mampo mangarti. Nanti kalu dorang so percaya pa Yesus Kristus, baru dong bole mangarti butul-butul Tuhan Allah pe janji.

2 Petrus 1:9

Tapi orang-orang percaya yang tara biking samua itu, dorang pe cara bapikir pende, dorang itu lagi sama deng orang buta, karna dorang lupa Tuhan Allah so kase ampun dong pe dosa-dosa.

1 Yohanes 2:10

Sapa yang sayang pa dia pe sudara yang percaya, dia tetap ada di tarang, kong tarada yang biking dia jadi berdosa.

1 Yohanes 3:15

Sapa yang binci dia pe sudara yang percaya, dia itu sama deng pangbunu. Kong ngoni tau to, tarada pangbunu yang mo dapa hidup deng Tuhan Allah slama-lamanya.

1 Yohanes 4:20

Kalu ada orang bilang, “Kita sayang pa Tuhan Allah,” tapi dia binci dia pe sudara yang percaya, itu dia bafoya. Karna sapa saja yang tara sayang pa orang laeng yang dia lia, tara mungkin dia sayang pa Tuhan Allah yang dia tara dapa lia.