LUKAS 6:25 - Ombibeli Iyapuki

²⁵ “Woo nye, ava mu nekuta paife, osheshi tamu ka fya ondjala. “Woo nye, tamu yolo, osheshi otamu ka nyika oluhodi nokulila.

LUKAS 6:25 Referans Kwoze

JESAJA 65:13

Opo nee Omwene, Kalunga ota ti ngaha: Tala, ovapiya vange otava ka lya, ndelenee nye otamu ka fya ondjala, tala, ovapiya vange otava ka nwa, ndelenee nye otamu ka fya enota, tala, ovapiya vange otava ka hafa, ndelenee nye otamu ka fifwa ohoni.

JAKOB 4:9

Shiiveni oluhepo leni, nyikeni oluhodi nokulila; okuyola kweni naku shituke oluhodi, nehafo leni nali shituke oufiye.

OMAYELETUMBULO 14:13

Mokuyola yo omutima tau dulu okuyehama, nexulilo lehafo lao olo oluhodi.

EHOLOLO 3:17

Shaashi ove oto ti: Aame oshipuna, heeno, nda punapala, ndihe na eshi nda pumbwa, ndele ku shi shii, nokutya ove epongo, omukwanaluhepo, omupofi, u li hamunghele.

1 OVATESSALONIKI 5:3

Fimbo tava ti: “Ombili, kape na nande ombili,” opo nee ehanauno tali va vakele, ngaashi omufimba ta hangwa koshifeta, ndele kave na apa tava i onhapo.

OVAEFESO 5:4

neendjovo defifohoni nomashendjo oulai inali udika mo, ndelenee edi domapandulo.

LUKAS 13:28

Ndele oko tapa ka kala omalilaano nelikweshelo lomayoo, nge tamu mono Abraham naIsak naJakob novaxunganeki aveshe mouhamba waKalunga, ndelenee nye mwa undulilwa pondje.

LUKAS 12:20

Ndelenee Kalunga okwe mu lombwela: ‘Elai ove, oufiku tuu ou wonena omwenyo woye oto u kufwa, hano aishe ei we i likola otai ningi yalyelye?’

LUKAS 8:53

Ndele ovo ve mu yola, osheshi ova li ve shii nokutya, ye okwa fya.

NAHUM 1:10

Osheshi nande vo va kale nokukitakana mumwe ngaashi omano nonande va kale va tutikwa komaviinyu, va tuta ngaashi omaviinyu oovene, vo otava ka xwikwa po ngaashi oihati ikukutu.

AMOS 8:10

Oivilo yeni ohandi i lundululila moluhodi nomaimbilo eni aeshe omaimbilo oupongo, ndele Ame ohandi tula moiya aishe oshako nokomitwe adishe ongwala. Ndele ame ohandi shi ningi ngaashi okulilwa kwomona ewifa, ndele tashi ka xula ngaashi efiku lilula.

JESAJA 28:7

Naava yo tava i oshidungwe komaviinyu, noikolwifa tai va pungaukifa, omupristeli nomuxunganeki otava i oshindungwe koikolwifa, omaviinyu e va etela oshitelele, ova pungaukifwa koikolwifa. Otava puka momamoniko, ndele tava i pomunghulo mokutokola.

JESAJA 9:20

Ndele otava lumata kolulyo nove nondjala, otava li kolumosho, ndele vo itava kuta; keshe umwe ota li ombelela yokwooko kwaye mwene.

JESAJA 8:21

Otava kala nokweendaenda musho, va hepa nova fya ondjala, nomondjala yavo otava handuka ndele tava fingi ohamba yavo naKalunga kavo; opo nee otava ka lyaalala;

OMUUDIFI 7:6

Osheshi ngaashi omano taa topatopa koshi yombiya, osho okuyola kwelai. Okwo yo ongahoelela.

OMUUDIFI 7:3

Oluhodi li dule okuyola, osheshi tashi wapalele omwenyo ngeenge oshipala sha nyika oufiye.

OMUUDIFI 2:2

Nda lombwela oindjola, oyo oulai. Nehafo nde lilombwela: Otashi kwafa shike?

OMAYELETUMBULO 30:9

opo ngeenge nda kutilila, ndihe ku lidimbike nokutya: ‘Omwene olyelye?’ Nongeenge nda fya oluhepo, ndiha vake, nondi nyone kedina laKalunga kange.”

OMAPSALOME 49:19

ota i nokuli, apa pa ya ooxe, ava itava mono nande vali ouyelele womutenya.

1 SAMUEL 2:5

Ava va li va kuta, hava longele ondjabi yomungome, ndelenee ava va li va fya ondjala, itava fi vali ondjala. Ongadji otai dala vaheyali, ndelenee oshipuna shovana tashi kanifa eenghono.

LUKAS 6:24

“Ndelenee woo nye oipuna, osheshi ehekeleko leni omwe li mona nokuli.

LUKAS 6:26

“Woo nye, ava ovanhu aveshe tave mu popile mouwa, osheshi osho tuu ngaha ooxe va ningila ovaxunganeki ovanaipupulu.