JAKOB 3:18 - Ombibeli Iyapuki

¹⁸ Noiimati youyuki ohai kunwa mombili kwaava hava ningi ombili.

JAKOB 3:18 Referans Kwoze

MATEUS 5:9

“Ovanelao ovanambili, osheshi ovo tava ka ifanwa ovana vaKalunga.

HOSEA 10:12

Likunineni ekuno louyuki, opo mu teye eteyo lefilonghenda. Likokoleleni oshikokola, osheshi efimbo la fika okukonga Omwene, fiyo Ye ote uya ndele te mu lokifile odula youyuki.

OVAFILIPPI 1:11

mwa yadifwa noiimati youyuki, oyo i li po molwaJesus Kristus okufimanekifa nokuhambelelifa Kalunga.

OVAGALATI 6:8

Ou ta kunu mombelela yaye, ota ka teya enyonauko kombelela; ndele ou ta kunu mOmhepo, oye ta ka teya omwenyo waalushe okOmhepo.

OMAYELETUMBULO 11:30

Oshiimati shomuyuki osho omuti womwenyo, ndele ou ta likola eemwenyo oye omunongo.

OVAHEBERI 12:11

Heeno, edengo keshe pefimbo lalo katu li wete olo ehafo, ndelenee olo oluhodi, ndele komesho otali imikile ava va tekulwa kulo oshiimati shombili oshomouyuki.

OMAYELETUMBULO 11:18

Omuhenakalunga te likongele eliko loipupulu, ndelenee ou ha kunu ouyuki, ondjabi i shii kulineekelwa.

JAKOB 1:20

osheshi ehandu lomulumenhu ihali longo osho sha yuka koshipala shaKalunga.

JOHANNES 4:36

Ndele paife omutei ta mono ondjabi, noiimati te i ongelele omwenyo waalushe, opo omukuni a hafe pamwe nomutei.

AMOS 6:12

Eenghambe otadi dulu tuu okulonda eemhunda domamanya ile omunhu ota dulu tuu okupulula ko neengobe? Osheshi etokolo la yuka nye mwe li lundulula oudiyo noshiimati shouyuki mwe shi lundululila edimba.

OMAYELETUMBULO 11:28

Ou te lineekele oupuna waye, ota ka punduka. Ndelenee ovayuki tava ka hapa ngaashi ohapo.

OMAPSALOME 92:14

vo nande nava kulupe, otava imike natango oiimati, omiti ditalala da twiyauka omafo,