JAKOB 1:27 - Ombibeli Iyapuki

²⁷ Elongelokalunga la yela nolihe nedilo lasha koshipala shaKalunga naTate oleli: okutalela po eefiye novafiyekadi momaudjuu avo, nokuliamena aha nyatekwe kounyuni.

JAKOB 1:27 Referans Kwoze

OVAROMA 12:2

Ndele nye inamu faafana nounyuni ou, ndelenee shitukeni vape momadiladilo eni, opo mu shiive okukonakona ehalo laKalunga olilipi, naashi shiwa, sha wapalela nosha wana.

JAKOB 4:4

Ovanyoni vohombo nye, kamu shi shii hamba nokutya, oukaume wounyuni ou owo okutonda Kalunga? Hano ou a hala okukala kaume kounyuni, ota ningi omutondi waKalunga.

1 TIMOTEUS 5:4

Ndelenee omufiyekadi ngeenge e nounona ile ovatekulu, vo nave lilonge tete okufila oshisho ovaneumbo lavo mouyuki nokwaalulila ovakulunhu vavo eyakulo liwa, osheshi osho sha wapala moipafi yaKalunga.

OMAPSALOME 119:1

Ovanelao ovava, ve nondjila ya yuka, ndele tava ende pamhango yOmwene.

1 TIMOTEUS 1:5

Ndelenee efikilo lekumaido olo ohole tai di momutima wa yela nomeliudo liwa nomeitavelo lihe noihelele,

LUKAS 1:6

Ndele vo aveshe vavali ova li ovayuki koshipala shaKalunga nokweenda moipango aishe nomeenghedi dOmwene, ndele va li vehe na oshipo.

OMAPSALOME 68:5

Oye xe yeefiye nomuyukifi wovafiyekadi, Kalunga moukalelo waye uyapuki.

MATEUS 5:8

“Ovanelao ovo ve nomitima da yela, osheshi ovo tava ka mona Kalunga.

JESAJA 1:23

Ovakulunhu voye ova ninga ovanandubo novakwao vovalunga; keshe umwe womuvo e hole okupewa ombubo, ndele ta lovelele ondjabi. Eefiye itadi yakulwa, neendjovo dovafiyekadi itadi fiki ko kuvo.

1 JOHANNES 5:18

Ofye otu shi shii, keshe ou a dalwa kuKalunga, oye iha nyono, ndele ou a dalwa kuKalunga, oye te lidiinine ye mwene, nomunawii ite mu kumu.

JAKOB 3:17

Ndelenee ounongo ou hau di kombada, tete owa yela nopo nee u nombili nou nolukeno nowiitaveleli nou yadi onghenda noiimati iwa; kau nomalimbililo ile oihelele.

OVAGALATI 6:14

Ndelenee ame, nashi kale nge kokule, ndi litangele ngeno oshinima shi lili, omushiyakano wOmwene wetu Jesus Kristus oo auke, molwao ounyuni wa valelelwa nge, naame nda valelelwa ounyuni.

OVAGALATI 1:4

ou e liyandja omolwomatimba etu, opo e tu xupife mefimbo lii lounyuni wopaife opahalo laKalunga, Tate yetu;

OVAGALATI 5:6

Osheshi muKristus Jesus nande epitotanda ile okuhapita etanda kaku nekwafo, ndelenee eitavelo hali longo mohole.

DEUTERONOMION 14:29

Opo nee Omulevi te uya, osheshi ehe noshitukulwafyuululwa pamwe naave, nomunailongo nofiye nomufiyekadi, ava ve li peenhu doye, vo ove nokulya nokukuta, opo Omwene Kalunga koye a shiive oku ku nangeka noupuna moilonga aishe yomake oye ho ningi.

OMAPSALOME 146:9

Omwene omwaameni wovanailongo. Oye omuyakeli weefiye nowovafiyekadi; ndelenee Ye omutwali moxwati wondjila yeembudi.

MATEUS 12:32

Ndele ngeenge ku na ou ta popi ondjovo a twa ondubo nOmona wOmunhu, otai mu diminwa po, ndele ou ta popi Omhepo Iyapuki, oye ite shi diminwa po nande nomounyuni ou nomwaawinya tau uya.

OVAROMA 2:13

osheshi ava tava pwilikine omhango, havo ovayuki koshipala shaKalunga, ndelenee ovawanifi vomhango ovo tava ka yukipalifwa.

OVAGALATI 3:11

Nokape na ou ta yukipalifwa koshipala shaKalunga omolwomhango: “Apa kape nomalimbililo, osheshi omuyuki ota kala e nomwenyo okeitavelo.”

OVAEFESO 2:2

omu mwa endaenda nale panghedi yefimbo lounyuni eli noyomupangeli weenghonopangelo domomhepo nokutya, pamhepo yomupangeli ou ta longo paife movana vokuhadulika,

TITUS 2:12

ndele tali tu tekula, fye tu efe okudina Kalunga nouhalu wopaunyuni, fye tu kale tu neendunge nouyuki nokuhola Kalunga fimbo tu li mounyuni ou wopaife,

JAKOB 3:9

Nelaka ohatu hambelele Omwene Tate, ndele hatu tuku nalo ovanhu va shitwa oshifefa shaKalunga;

2 PETRUS 1:4

omo tuu omo e tu pa oshali omaudaneko e nondilo nomanene unene kae shii okuyelekwa, opo mu kwatakanifwe noukalikalunga, ngeenge tamu kukuma enyonauko la kala mounyuni omolwouhalu.

2 PETRUS 2:20

Osheshi nande ova dja onhapo eenyata dounyuni, mokukoneka Omwene nOmuxupifi Jesus Kristus, ndele otava yulwa vali notava findwa kudo, hano oxuuninwa yavo oii i dule yotete.

2 PETRUS 3:14

Onghee hano, ovaholike, mokuteelela oinima ei kendabaleni shili, mu monike puye muhe nonyata nomuhe noshipo mombili;