Yohana 3:3 - Testamente Ledrimpswha ni Mapsalma

³ Yesu amuyangula, aku: Nihlayelamfuri nili ku wene, akuna mhunu lweyi angavonaka Mfumu wa Xikwembu Nkulukumba, loko angatlhelanga apswaliwa hi vumpswha

Yohana 3:3 Referans Kwoze

II Kor 5:17

Hiswoswo-ke, loko mhunu ali ku Kriste, i xivumbeko ximpswha. A mintxhumu ya khale mi hundrile, hinkwaswu i swimpswha.

I Yhn 3:9

Lweyo ni lweyo apswaliwiki hi Xikwembu Nkulukumba angahanyi hi kuyentxa swidoho; hikusa ambewu ya Xikwembu Nkulukumba yitrhami ku yene; angana kuswikota kuhanya hikudoha, hikusa apswaliwi hi Xikwembu Nkulukumba.

I Yhn 5:1

Lweyo ni lweyo apfumelaka leswaku Yesu i Kriste, a pswaliwa hi Xikwembu Nkulukumba. Ni lweyo ni lweyo arandraka Tatana arandra ni lava vapswaliwiki ha Yene.

Tito 3:5

kungali hi mintiro ya vululami leyi hine himiyentxaka, kambe hi kulandra a lirere drakwe, ahihuluxi hi kuhlampswa loku kunyikaka a vutomi byimpswha, ni kuyentxiwa vampswha hi Moya wa Kuxwenga,

Yohana 1:13

lava vangapswaliwangakiki hi ngati, nambi kukurandra ka nyama, nambi kukurandra ka wanuna, kambe vapswaliwiki hi kurandra ka Xikwembu Nkulukumba.

I Yhn 2:29

N'waswitiva n'wine leswaku Yene alulamile, ni leswaku lweyo ni lweyo lweyi alulamiki, apswaliwi ha Yene.

I Ptr 1:3

Akukhensiwe Xikwembu Nkulukumba, Tatana wa Hosi yeru Yesu Kriste, lweyi hikola ka lirere drakwe ledri drikulu ngopfu, ahitumbuluxiki ka vubiri, akuva hivani kulavisela loku kuhanyaka, hikola ka kupfuka ku lava vakufa ka Yesu Kriste amakari ka vafi,

Gl 6:15

Akuva ni soka kumbe ni nga soki, aswipfuni ntxhumu; swipfuna kuva ni vutomi lebyi byimpswha.

I Yhn 5:18

Haswitiva leswaku lweyo ni lweyo apswaliwiki hi Xikwembu Nkulukumba angadohi ni kan'we, kambe lweyi apswaliwiki ha Xikwembu Nkulukumba awa mubekisa; kutani a mubihi anganakuswikota kumukhumba.

II Kor 4:4

Vone lava a swikwembu swa nkama lowu swidlayiki miyanakanyu yava kuka kupfumela, akuva vangati vaningeliwa hi Ivangeli ya kutwala ka Kriste, lweyi angaxifaniso xa Xikwembu Nkulukumba.

Yohana 12:40

Adlayi mahlu yavu, anonohisi timbilu tavu, leswaku vangatitxhuka vavona hi mahlu, vayingelisisa hi timbilu, vandruluka, mine nivadaha.

Ef 2:1

An'winyiki vutomi hileswi khale afaka n'wifile, hikola ka milandru yenu ni swidoho swenu.

Yohana 1:5

A livaningo dritivonekisi munyameni, kutani munyama awudrihlulanga.

Yakobe 3:17

Kambe a vutlhari lebyi pfaka hi le henhla i kusungula ka hinkwaswu, kubasa; byirulile, ni kunabyala, ni kuyingelana, byitali hi lirere, mintiro ya hombe; abyi yentxi xihlawu-hlawu xa vhanu, abyi na kutiyentxisa.

Yohana 1:51

Ayengeta aku ku yene: Nihlayelamfuri nili ku n'wine: n'witavona tilo dripfulekile, ni ntrumi ya Xikwembu Nkulukumba yili kari yintlhantuka ni kuxikela ku N'wana wa Mhunu.

Mt 16:17

Kutani Yesu aku ku yene: Ukatekile wene Simoni n'wana Yona, hikusa ahi nyama ni ngati leswi swikupfuleteliki leswo, kambe hi Tatana wanga lweyi anga Matilweni.

Mt 5:18

Nihlayelamfuri nili ku n'wine: Loko a tilo ni misava swingasinahundra, kungatisusiwa a Nawini letela kumbe xintrhatana xin'we, na hinkwaswu swingasinahetiseka.

Mpfuletelo 3:14

Ku ntrumi ya kereke ledri dringa Lawodikiya trala uku: Lweyi anga Amen, a mboni leyi ya kudumbeka ni ya xihlayelamfuri, masungulu ya ntiro wa vutumbuluxi wa Xikwembu Nkulukumba, ahlaya leswi:

Mt 19:24

Nan'wibyela na kone leswaku swanabyala akuva a kamela drinhingena hi moya wa ximari, kutlula loko a mufuyi anhingena a Mfun'wini wa Xikwembu Nkulukumba.

Mt 21:31

Hi wini ku lava vabiri ayentxiki a kurandra ka tatana wakwe? Vamuyangula vaku: Hi lweyi wa kusungula. Kutani Yesu aku ku vone: Hikusa nihlayelamfuri nili ku n'wine: A vahlengisi ni vavasati va vumbuye vatan'wirangela kunhingena a Mfun'wini wa Xikwembu Nkulukumba.

Marka 9:47

Ni loko a tihlu draku drikudohisa drisuse. I swahombe unhingena a Mfun'wini wa Xikwembu Nkulukumba na una tihlu drin'we ntsena, kutlula loko una mahlu mabiri utxukumetiwa kheleni,

Marka 10:14

Yesu atiki aswivona, asola, aku ku vone: Trikani a vatrongwana vata ku mine, n'wingavatsimbeni hikusa a Mfumu wa Xikwembu Nkulukumba i wa volava vafanaka na vone.

Yohana 3:4

Nikodema aku ku yene: Loko mhunu aduhwalile, swingayentxisa kuyini a kutlhela apswaliwa xana? Xana angaswikota kutlhelela ndreni a khurini dra mamana wakwe, atlhela apswaliwa ka vubiri xana?

I Yhn 5:4

hikusa lweyo ni lweyo lweyi apswaliwiki hi Xikwembu ahlula misava. Kutani akuhlula loku hi kone kunga henhla ka misava, inga kupfumela kweru.